Team India: પાકિસ્તાન દ્વારા આયોજિત ચેમ્પિયન્સ ટ્રોફીનો ખિતાબ જીતનાર ભારતીય ટીમ પર પૈસાનો વરસાદ થયો છે, જ્યાં BCCI એ ટીમને ઈનામ તરીકે 58 કરોડ રૂપિયાની મોટી રકમ આપી છે. આ સમગ્ર રકમ તમામ ખેલાડીઓમાં વહેંચવામાં આવશે. ટીમે ચેમ્પિયન્સ ટ્રોફીની ફાઈનલ મેચમાં શક્તિશાળી ન્યુઝીલેન્ડને ચાર વિકેટથી હરાવ્યું હતું, જ્યાં કેપ્ટન રોહિત શર્માએ 76 રનની મેચ વિનિંગ ઇનિંગ રમી હતી.
આ અંગે BCCI દ્વારા એક નિવેદન બહાર પાડવામાં આવ્યું છે. નિવેદનમાં કહેવામાં આવ્યું છે કે, 'કપ્તાન રોહિત શર્માના સક્ષમ નેતૃત્વ હેઠળ ભારતે ટૂર્નામેન્ટમાં પોતાનું વર્ચસ્વ જાળવી રાખ્યું અને એક પણ મેચ હારી નથી. ટીમે તેમના અભિયાનની શરૂઆત બાંગ્લાદેશ સામે છ વિકેટની મજબૂત જીત સાથે કરી હતી અને ત્યારબાદ પાકિસ્તાન સામે છ વિકેટથી અદભૂત જીત મેળવી હતી. સેમીફાઈનલમાં ઓસ્ટ્રેલિયાને ચાર વિકેટથી હરાવતા પહેલા તેઓએ ન્યુઝીલેન્ડ સામે 44 રને જીત મેળવીને પોતાનું ફોર્મ ચાલુ રાખ્યું હતું.
સતત ICC ટાઇટલ જીતવું ખાસ - રોજર બિન્ની
ટીમ ઈન્ડિયા માટે રોકડ પુરસ્કારની જાહેરાત કરતા BCCI પ્રમુખ રોજર બિન્નીએ કહ્યું, 'સતત આઈસીસી ટાઈટલ જીતવું ખાસ છે અને આ ઈનામી રકમ વૈશ્વિક સ્તરે ટીમ ઈન્ડિયાના સમર્પણને ઓળખે છે. રોકડ પુરસ્કાર એ પડદા પાછળની દરેક વ્યક્તિની મહેનતની માન્યતા છે. ICC અંડર-19 મહિલા વર્લ્ડ કપ જીત્યા પછી 2025માં આ અમારી બીજી ICC ટ્રોફી પણ હતી અને આપણા દેશમાં જે મજબૂત ક્રિકેટ ઇન્ફ્રાસ્ટ્રક્ચર છે તેને હાઇલાઇટ કરે છે.
આ જીત ઘણા વર્ષોની મહેનતનું પરિણામ - BCCI સેક્રેટરી
બીસીસીઆઈ સેક્રેટરી દેવજીત સાયકિયાએ કહ્યું, 'બીસીસીઆઈને ખેલાડીઓ અને સપોર્ટ સ્ટાફને આ સન્માન આપવામાં ગર્વ છે. વિશ્વ ક્રિકેટમાં તેમનું વર્ચસ્વ વર્ષોની મહેનત અને વ્યૂહરચનાનું પરિણામ છે. આ જીતે સફેદ બોલ ક્રિકેટમાં ભારતની ટોચની રેન્કિંગને યોગ્ય ઠેરવી છે અને અમને ખાતરી છે કે ટીમ આવનારા વર્ષોમાં વધુ સારું પ્રદર્શન કરવાનું ચાલુ રાખશે. ખેલાડીઓ દ્વારા દર્શાવવામાં આવેલ સમર્પણ અને પ્રતિબદ્ધતાએ એક નવો માપદંડ સ્થાપિત કર્યો છે અને અમને વિશ્વાસ છે કે ભારતીય ક્રિકેટ હંમેશા વૈશ્વિક સ્તરે તેના ધોરણોને ઉંચુ રાખશે.
ટીમ ઈન્ડિયાને ટાઈટલ જીતવા બદલ 20 કરોડ રૂપિયા મળ્યા
તમને જણાવી દઈએ કે ચેમ્પિયન્સ ટ્રોફીનો ખિતાબ જીતવા માટે મેન ઇન બ્લુને અંદાજે 20 કરોડ રૂપિયાની સત્તાવાર ઈનામી રકમ મળી હતી, જ્યારે ઉપવિજેતા ન્યુઝીલેન્ડને $1.12 મિલિયન (અંદાજે 9.72 કરોડ રૂપિયા) મળ્યા હતા. ચેમ્પિયન્સ ટ્રોફીના ઈતિહાસમાં ભારતની આ ત્રીજી ટાઈટલ જીત છે અને તે એક વર્ષથી ઓછા સમયમાં બીજી વખત આઈસીસી ટાઈટલ જીત્યું છે.
સતત પાંચમી વખત જીત્યું ગુજરાત: હૈદરાબાદ 86 રનમાં સમેટાયું
