Baramati Trainer Aircraft Crash: મહારાષ્ટ્રના પુણે જિલ્લામાં આવેલા બારામતીમાં આજે સવારે એક મોટી વિમાન દુર્ઘટના ઘટતા રહી ગઈ છે. બારામતી એરસ્ટ્રીપ પાસે આવેલા ગોજુબાબી ગામમાં એક ખાનગી ફ્લાઈટ ટ્રેનિંગ એકેડમીનું ટ્રેઈની વિમાન ક્રેશ લેન્ડિંગ દરમિયાન તૂટી પડ્યું હતું. આ ઘટનાએ સ્થાનિકોમાં ફફડાટ ફેલાવી દીધો હતો કારણ કે આ એ જ સ્થળ છે જ્યાં અગાઉ મહારાષ્ટ્રના નાયબ મુખ્યમંત્રી અજિત પવારનું વિમાન પણ અકસ્માતનો ભોગ બન્યું હતું. સદનસીબે, આ દુર્ઘટનામાં પાયલટનો આબાદ બચાવ થયો છે અને કોઈ ગંભીર જાનહાનિના સમાચાર નથી.
પ્રાપ્ત વિગતો અનુસાર, આ પ્લેન એક ટુ-સીટર ટ્રેઈની વિમાન હતું જે રેડબર્ડ ફ્લાઈટ ટ્રેનિંગ એકેડમીનું હોવાનું જાણવા મળ્યું છે. બુધવારે સવારે આશરે 8:50 વાગ્યે જ્યારે વિમાન ઉડાન ભરી રહ્યું હતું ત્યારે અચાનક ટેક્નિકલ ખામી સર્જાઈ હતી. વિમાન નીચી ઊંચાઈ પર ઉડી રહ્યું હોવાને કારણે પાયલટે તેને સલામત રીતે ઉતારવાનો પ્રયાસ કર્યો હતો, પરંતુ તે દરમિયાન એક વીજ થાંભલા સાથે અથડાઈને જમીન પર પટકાયું હતું.
દુર્ઘટનાનું કારણ: ટેક્નિકલ ખામી અને વીજ થાંભલો
મહારાષ્ટ્રના પુણે જિલ્લામાં બનેલી આ વિમાન દુર્ઘટના અંગે પોલીસ અને પ્રત્યક્ષદર્શીઓ દ્વારા મહત્વની વિગતો શેર કરવામાં આવી છે. પુણેના પોલીસ અધિક્ષક સંદીપ સિંહ ગીલે જણાવ્યું હતું કે, પ્રારંભિક તપાસ અને ઘટનાના સાક્ષીઓના નિવેદનો મુજબ વિમાનમાં અચાનક ટેક્નિકલ ખામી સર્જાઈ હતી. દુર્ઘટના સમયે વિમાન સરખામણીએ ઘણી નીચી ઊંચાઈ પર ઉડી રહ્યું હતું અને જ્યારે પાયલટે ક્રેશ લેન્ડિંગનો પ્રયાસ કર્યો, ત્યારે વિમાનનો એક ભાગ નજીકના વીજ થાંભલા સાથે અથડાયો હતો. આ ટક્કરને કારણે વિમાનનું સંતુલન સંપૂર્ણપણે બગડી ગયું હતું અને તે જમીન પર પટકાયું હતું. રાહતની વાત એ રહી કે વિમાનમાં માત્ર એક ટ્રેઈની પાયલટ જ સવાર હતો, જે આ ગંભીર અકસ્માત બાદ સુરક્ષિત રીતે બહાર નીકળવામાં સફળ રહ્યો છે.
પરમાણુ યુદ્ધ ટળશે?: ઈરાન મંત્રણા માટે તૈયાર પણ અમેરિકા સામે મૂકી 5 આકરી શરતો, જાણો તેહરાનનો માસ્ટરપ્લાન
અજિત પવારની દુર્ઘટનાની યાદ તાજી થઈ
આ ઘટનાએ જાન્યુઆરી મહિનામાં બનેલી એ ભયાનક દુર્ઘટનાની યાદ તાજી કરી દીધી છે, જેમાં મહારાષ્ટ્રના દિગ્ગજ નેતા અજિત પવારનું વિમાન પણ બારામતીના આ જ ગામ ગોજુબાબી પાસે ક્રેશ થયું હતું. એક જ વિસ્તારમાં વારંવાર બનતી આવી ઘટનાઓને પગલે હવે બારામતી એરસ્ટ્રીપની આસપાસની સુરક્ષા અને ટ્રેઈની વિમાનોના મેન્ટેનન્સ પર ગંભીર સવાલો ઉઠી રહ્યા છે.
ટ્રમ્પે મીડિયા પર લગાવ્યો દેશદ્રોહનો આરોપ!: કહ્યું- "તમે દુશ્મનને મદદ કરી રહ્યા છો" વૈશ્વિક રાજનીતિમાં ચકચાર!
તપાસ એજન્સીઓ એક્શનમાં
ઘટનાની જાણ થતા જ પોલીસ અને એરપોર્ટ ઓથોરિટીની ટીમ ઘટનાસ્થળે પહોંચી ગઈ હતી. તપાસ એજન્સીઓ હાલ એ જાણવાનો પ્રયાસ કરી રહી છે કે ખરેખર કઈ ટેક્નિકલ ખામીને કારણે પ્લેન ક્રેશ થયું અને શું તે એરસ્ટ્રીપના નિયમોનું ઉલ્લંઘન હતું. આ અકસ્માત બાદ સ્થાનિક ગ્રામજનોમાં પણ ભયનો માહોલ છે, કારણ કે વિમાન વીજ લાઈન સાથે અથડાયું હતું, જે મોટી દુર્ઘટનામાં પરિણમી શક્યું હોત.
