બાંગ્લાદેશમાંથી અત્યંત કરૂણ ઘટના સામે આવી છે, જ્યાં મુસાફરો ભરેલી એક બસ ફેરીમાં ચઢતી વખતે નદીમાં ખાબકી ગઈ હતી. આ ઘટનાએ સ્થાનિક લોકોને જ નહીં, પરંતુ સમગ્ર દક્ષિણ એશિયાને ઝંઝોડી નાખ્યું છે.
શું બન્યું હતું આ દુર્ઘટનામાં?
બાંગ્લાદેશના રાજબારી જિલ્લામાં દૌલતદિયા ફેરી ટર્મિનલ નજીક બુધવારે સાંજે આશરે 5:15 વાગ્યે એક મોટી દુર્ઘટના સર્જાઈ હતી. ઢાકા જતી એક મુસાફર બસ ફેરીમાં ચઢવા જતી હતી ત્યારે અચાનક ડ્રાઇવરનો કાબૂ ગુમાયો અને બસ પદ્મા નદીમાં ખાબકી ગઈ હતી.
મળતી માહિતી મુજબ બસમાં લગભગ 40 થી 50 મુસાફરો સવાર હતા. અહેવાલો અનુસાર, બસમાં ઘણા પરિવારના સભ્યો પણ સાથે મુસાફરી કરી રહ્યા હતા, જેમાં મહિલાઓ અને બાળકોનો પણ સમાવેશ થાય છે. આ દુર્ઘટનામાં અત્યાર સુધીમાં ઓછામાં ઓછા 23 લોકોના મોતની પુષ્ટિ થઈ છે, જ્યારે ઘણા લોકો હજુ લાપતા હોવાનું માનવામાં આવે છે.
કેવી રીતે બસ નદીમાં પડી?
પ્રાથમિક માહિતી અનુસાર, બસના ડ્રાઈવરે ફેરીના પોન્ટૂન પર ચઢાવતા સમયે અચાનક કંટ્રોલ ગુમાવ્યો હતો. કેટલાક સાક્ષીઓએ જણાવ્યું કે એક નાની નૌકા પોન્ટૂન સાથે અથડાતા સ્થિતિ વધુ બગડી અને બસ સીધી નદીમાં ખાબકી ગઈ હતી.
નદીમાં પડ્યા પછી બસ લગભગ 30 થી 80 ફૂટ ઊંડાઈ સુધી ડૂબી ગઈ, જેના કારણે અંદર ફસાયેલા મુસાફરોને બચાવવું મુશ્કેલ બન્યું. કેટલાક મુસાફરો તરત જ પાણીમાં કૂદીને તરતા-તરતા કિનારે પહોંચી બચી ગયા, પરંતુ મોટાભાગના લોકો બસમાં જ ફસાઈ ગયા હતા.
બચાવ કામગીરી: 6–7 કલાકનો જંગ
દુર્ઘટના પછી તરત જ ફાયર સર્વિસ, નૌકાદળ, કોસ્ટ ગાર્ડ અને સ્થાનિક પ્રશાસને સંયુક્ત રીતે બચાવ કામગીરી શરૂ કરી. બચાવ માટે વિશેષ જહાજ “હમજા”ને પણ તૈનાત કરવામાં આવ્યું હતું, કલાકો સુધીના પ્રયાસો બાદ બસને નદીમાંથી બહાર કાઢવામાં આવી હતી.
રાત્રે લગભગ 11:50 વાગ્યે બસને પાણીમાંથી બહાર કાઢવામાં આવી અને ત્યારબાદ અંદરથી અનેક મૃતદેહો મળી આવ્યા. બચાવ કામગીરી દરમિયાન ભારે પ્રવાહ અને પાણીની ઊંડાઈને કારણે મુશ્કેલીઓ ઉભી થઈ હતી. હજુ પણ કેટલાક લોકો લાપતા હોવાના કારણે શોધ કામગીરી ચાલુ રાખવામાં આવી રહી છે.
