બોલિવૂડની 'જુબિલી ગર્લ' તરીકે જાણીતા પ્રખ્યાત અભિનેત્રી આશા પારેખે (Asha Parekh) પોતાની સુંદરતા અને શાનદાર અભિનયથી કરોડો દર્શકોના દિલ જીત્યા છે. 1960 અને 1970 ના દાયકામાં બોલિવૂડ પર રાજ કરનાર આશા પારેખે આખી જિંદગી લગ્ન નથી કર્યા. તાજેતરમાં સોશિયલ મીડિયા અને મીડિયા અહેવાલોમાં તેમની આજીવન કુંવારા રહેવા પાછળની ભાવનાત્મક કહાની ફરી ચર્ચામાં આવી છે, જે સાબિત કરે છે કે તેમનો પ્રેમ કેટલો સાચો અને ગરિમાપૂર્ણ હતો.
ડાયરેક્ટર નાસિર હુસૈન સાથે અનોખો સંબંધ
આ વાર્તા વર્ષ 1959 થી શરૂ થાય છે, જ્યારે જાણીતા ફિલ્મ નિર્માતા અને નિર્દેશક નાસિર હુસૈને (Nasir Hussain) આશા પારેખને ફિલ્મ 'દિલ દેકે દેખો' (Dil Deke Dekho) દ્વારા બોલિવૂડમાં એક મોટો બ્રેક આપ્યો હતો. આ ફિલ્મ સુપરહિટ રહી અને ત્યારબાદ બંનેની જોડીએ એકસાથે 7 સુપરહિટ ફિલ્મો આપી, જેમાં 'તીસરી મંઝિલ' (Teesri Manzil) અને 'કારવાં' (Caravan) જેવી બ્લોકબસ્ટર ફિલ્મો સામેલ હતી. આ ફિલ્મો મુંબઈના જુહુના સિનેમાઘરોમાં અઠવાડિયો સુધી હાઉસફુલ ચાલતી હતી. સાથે કામ કરતી વખતે આશા પારેખ ક્યારે નાસિર હુસૈનના પ્રેમમાં પડી ગયા તેની તેમને ખુદને પણ ખબર ન રહી.
'ઘર તોડનારી' તરીકે ઓળખાવાનું મંજૂર ન હતું
નાસિર હુસૈન પ્રત્યે અગાધ પ્રેમ હોવા છતાં, આશા પારેખે ક્યારેય તેમની સાથે લગ્ન કરવાની કે ઘર વસાવવાની જીદ ન કરી. તેનું મુખ્ય કારણ એ હતું કે નાસિર સાહેબ પહેલાથી જ પરિણીત હતા અને તેમને બાળકો પણ હતા. આશા પારેખ ક્યારેય એવું નહોતા ઈચ્છતા કે તેમના પ્રેમના કારણે નાસિર હુસૈનનો હસતો-ખેલતો પરિવાર વિખેરાઈ જાય અથવા સમાજ તેમને 'ઘર તોડનારી' તરીકે જુએ. બીજાના પરિવારની ખુશી અને બાળકોની તકલીફનો વિચાર કરીને તેમણે આજીવન કુંવારા રહેવાનો કઠોર નિર્ણય લીધો હતો.
ઓટોબાયોગ્રાફી ‘ધ હિટ ગર્લ’ માં કર્યો ખુલાસો
વર્ષો સુધી પોતાના આ મૌન પ્રેમને દિલમાં દબાવી રાખ્યા બાદ, આશા પારેખે વર્ષ 2017 માં રિલીઝ થયેલી પોતાની ઓટોબાયોગ્રાફી ‘ધ હિટ ગર્લ’માં (The Hit Girl) આ મોટો ખુલાસો કર્યો હતો. તેમણે પુસ્તકમાં સ્વીકાર્યું હતું કે નાસિર હુસૈન જ તેમના જીવનનો એકમાત્ર સાચો પ્રેમ હતા.
સૌથી સુંદર બાબત એ છે કે જ્યારે આ પુસ્તકનું લોન્ચિંગ થયું, ત્યારે નાસિર હુસૈનનો પરિવાર, તેમની પુત્રી નુસરત અને પૌત્ર તેમજ બોલિવૂડ અભિનેતા ઇમરાન ખાન (Imran Khan) પણ ખાસ ઉપસ્થિત રહ્યા હતા. આ બાબત દર્શાવે છે કે આશા પારેખે આ સંબંધને કેટલી ગરિમા, આદર અને પવિત્રતા સાથે સાચવ્યો હતો કે નાસિર હુસૈનના પરિવારના મનમાં પણ તેમના પ્રત્યે કોઈ કડવાશ નહોતી. આજે પણ આશા પારેખ પોતાની જિંદગી પૂરા આત્મસન્માન અને શાંતિ સાથે જીવી રહ્યા છે.
