FIFA World Cup 2026ના રાઉન્ડ ઓફ-16માં ફૂટબોલ ચાહકોને એક યાદગાર મુકાબલો જોવા મળ્યો. એક સમયે 2-0થી પાછળ રહેલી અર્જેન્ટિનાએ શાનદાર કમબેક કરીને ઈજિપ્તને 3-2થી હરાવ્યું અને ક્વાર્ટર ફાઇનલમાં સ્થાન પાક્કું કર્યું. લિયોનેલ મેસીના મહત્વપૂર્ણ ગોલ અને એન્ઝો ફર્નાન્ડિઝના ઈન્જરી ટાઇમના વિજેતા ગોલે મેચનું આખું ચિત્ર બદલી નાખ્યું.
FIFA World Cup 2026માં રમાયેલી આ હાઇ-વોલ્ટેજ મેચની શરૂઆત ઈજિપ્ત માટે ખૂબ જ શાનદાર રહી હતી. પ્રથમ હાફમાં અર્જેન્ટિના પર સતત દબાણ જાળવી રાખનાર ઈજિપ્તે મેચની 15મી મિનિટે યાસર ઇબ્રાહિમના ગોલથી 1-0ની સરસાઈ મેળવી હતી. અર્જેન્ટિનાએ બરાબરી કરવાનો પ્રયાસ કર્યો, પરંતુ ઈજિપ્તના મજબૂત ડિફેન્સ સામે સફળતા મળી નહોતી.
ઈજિપ્તે બનાવ્યો મજબૂત દબદબો, પછી બદલાઈ ગઈ મેચ
બીજા હાફમાં પણ ઈજિપ્તનું આક્રમણ યથાવત રહ્યું. મેચની 67મી મિનિટે મોસ્તફા ઝિકોએ વધુ એક ગોલ કરીને સ્કોર 2-0 કર્યો અને અર્જેન્ટિના પર ભારે દબાણ ઊભું કર્યું. તે સમયે એવું લાગી રહ્યું હતું કે ઈજિપ્ત સરળતાથી ક્વાર્ટર ફાઇનલમાં પહોંચશે.
પરંતુ ત્યાર બાદ અર્જેન્ટિનાએ પોતાના રમતનું સંપૂર્ણ રૂપ બદલી નાખ્યું. 79મી મિનિટે ક્રિસ્ટિયન રોમેરોએ ગોલ કરીને ટીમને આશા અપાવી. માત્ર ચાર મિનિટ બાદ, 83મી મિનિટે લિયોનેલ મેસીએ પોતાના અનુભવ અને કુશળતાનો શાનદાર નમૂનો રજૂ કરતાં જાદૂઈ ગોલ કર્યો અને સ્કોર 2-2થી બરાબર કરી દીધો.
ઈન્જરી ટાઇમમાં એન્ઝો ફર્નાન્ડિઝ બન્યા હીરો
મેચ હવે એક્સ્ટ્રા ટાઇમ તરફ આગળ વધતો જણાતો હતો, પરંતુ ઈન્જરી ટાઇમમાં અર્જેન્ટિનાએ ફરી એકવાર ચમત્કાર સર્જ્યો. 90+3મી મિનિટે એન્ઝો ફર્નાન્ડિઝે શાનદાર ગોલ કરીને અર્જેન્ટિનાને 3-2ની નિર્ણાયક લીડ અપાવી. અંતિમ સિટી વાગતા જ અર્જેન્ટિનાના ખેલાડીઓ અને ચાહકોમાં ખુશીની લહેર ફરી વળી હતી.
આ જીત સાથે અર્જેન્ટિનાએ FIFA World Cup 2026ના ક્વાર્ટર ફાઇનલમાં પોતાનું સ્થાન નિશ્ચિત કર્યું છે, જ્યારે ઈજિપ્તનો શાનદાર અભિયાન રાઉન્ડ ઓફ-16માં જ સમાપ્ત થયો.
