MS Dhoni 45th Birthday: ભારતીય ક્રિકેટના ઇતિહાસમાં જ્યારે સફળ કેપ્ટનોની ચર્ચા થાય છે ત્યારે સૌથી પહેલું નામ આવે છે Mahendra Singh Dhoniનું. 'કેપ્ટન કૂલ' તરીકે વિશ્વભરમાં ઓળખ મેળવનાર ધોની આજે 45 વર્ષના થયા છે. મેદાન પર તેમની શાંતિ, દબાણની સ્થિતિમાં નિર્ણય લેવાની ક્ષમતા અને ભારતને અપાવેલી ઐતિહાસિક જીતોએ તેમને ક્રિકેટ જગતનો દંતકથા સમાન ખેલાડી બનાવી દીધા છે. ધોનીએ ભારતીય ક્રિકેટને માત્ર ટ્રોફી જ નથી અપાવી, પરંતુ કરોડો યુવાનો માટે પ્રેરણાસ્ત્રોત પણ બન્યા છે. 2007નો ટી-20 વર્લ્ડ કપ, 2011નો વન-ડે વર્લ્ડ કપ અને 2013ની ચેમ્પિયન્સ ટ્રોફી જીતાડનારા ધોનીના જીવનમાં ક્રિકેટ સિવાય પણ અનેક એવી રસપ્રદ વાતો છે, જેના વિશે ઘણા ચાહકો અજાણ છે. તેમના 45મા જન્મદિવસે જાણીએ માહીના જીવન સાથે જોડાયેલા સાત એવા તથ્યો, જે તમને પણ આશ્ચર્યમાં મૂકી દેશે.
ધોની ફોન કેમ નથી ઉપાડતા?
ક્રિકેટ જગતમાં ધોની વિશે સૌથી વધુ ચર્ચાતી બાબતોમાંની એક છે કે તેઓ ઘણી વખત ફોન રિસીવ કરતા નથી. ઘણા પૂર્વ અને વર્તમાન ક્રિકેટરોએ પણ આ બાબતને લઈને મજાકમાં ટિપ્પણીઓ કરી છે. Virat Kohli, VVS Laxman અને Suresh Raina જેવા ખેલાડીઓએ અનેક પ્રસંગોએ જણાવ્યું છે કે ધોની સુધી પહોંચવું સહેલું નથી. ખુદ ધોનીએ એક કાર્યક્રમ દરમિયાન સ્વીકાર્યું હતું કે તેઓ ટેક્નોલોજીના બહુ મોટા ચાહક નથી અને મોબાઇલ ફોનનો ઉપયોગ મર્યાદિત રીતે જ કરે છે. આ જ કારણ છે કે ઘણી વખત લોકોનો સંપર્ક તેમની સાથે થઈ શકતો નથી.
આ પણ વાંચો: રોનાલ્ડોની આંખોમાં છલકાયા આંસુ : તૂટી ગયું વર્લ્ડ કપ જીતવાનું સપનું; અંતિમ સફરનો કરુણ અંત
15 હજાર ફૂટની ઊંચાઈ પરથી લગાવી હતી છલાંગ
2011માં ભારતને વિશ્વ વિજેતા બનાવ્યા બાદ ધોનીને ભારતીય ટેરિટોરિયલ આર્મીમાં લેફ્ટનન્ટ કર્નલની માનદ પદવી આપવામાં આવી હતી. જોકે ધોની માત્ર સન્માન મેળવવામાં જ વિશ્વાસ રાખતા નહોતા, તેઓ તેને જીવી બતાવવામાં માનતા હતા. વર્ષ 2015માં તેમણે પેરાશૂટ રેજિમેન્ટ સાથે વિશેષ તાલીમ લીધી હતી. તાલીમ દરમિયાન તેમણે આગ્રા એરફોર્સ સ્ટેશન પરથી AN-32 વિમાનમાંથી આશરે 15 હજાર ફૂટની ઊંચાઈએથી પાંચ સફળ જમ્પ કર્યા હતા. આ સિદ્ધિ દર્શાવે છે કે ક્રિકેટની બહાર પણ ધોની સાહસિક જીવન જીવવાનું પસંદ કરે છે.
પ્રથમ પગાર હતો માત્ર 3 હજાર રૂપિયા
આંતરરાષ્ટ્રીય ક્રિકેટમાં પ્રવેશ કરતા પહેલાં ધોની સામાન્ય નોકરી કરતા યુવાન હતા. વર્ષ 2001થી 2003 દરમિયાન તેઓ ભારતીય રેલવેમાં ટિકિટ ચેકર (TTE) તરીકે કાર્યરત હતા. તે સમયે તેઓ ખડગપુર રેલવે સ્ટેશન પર ફરજ બજાવતા હતા અને તેમનો પ્રથમ પગાર આશરે 3 હજાર રૂપિયા હતો. આજે કરોડોની સંપત્તિના માલિક બનેલા ધોની માટે આ સફર સંઘર્ષ, મહેનત અને સમર્પણનું જીવંત ઉદાહરણ છે.
લાંબા વાળ પાછળ હતો જ્હોન અબ્રાહમનો પ્રભાવ
ધોનીની શરૂઆતની કારકિર્દી દરમિયાન તેમના લાંબા વાળ યુવાનોમાં ખૂબ લોકપ્રિય બન્યા હતા. તેમની આ સ્ટાઇલ એટલી ચર્ચામાં રહી કે પાકિસ્તાનના પૂર્વ રાષ્ટ્રપતિ Pervez Musharrafએ પણ જાહેરમાં તેના વખાણ કર્યા હતા. ધોનીએ એક ઇન્ટરવ્યુમાં જણાવ્યું હતું કે, તેઓ અભિનેતા John Abrahamના મોટા પ્રશંસક હતા અને તેમની સ્ટાઇલથી પ્રભાવિત થઈને લાંબા વાળ રાખવાનું શરૂ કર્યું હતું.
દૂધ અને મિલ્ક શેકના શોખીન
એક સમયે એવી ચર્ચાઓ હતી કે ધોની રોજ 4થી 5 લીટર દૂધ પી જાય છે. જોકે બાદમાં તેમણે આ દાવાને અફવા ગણાવ્યો હતો. ધોનીએ જણાવ્યું હતું કે, તેમને દૂધ, ચોકલેટ અને વિવિધ પ્રકારના મિલ્ક શેક ખૂબ પસંદ છે. તેઓ નિયમિત રીતે દૂધ અથવા શેકનું સેવન કરતા હતા, પરંતુ સોશિયલ મીડિયા પર પ્રચલિત આંકડાઓ વધારેલા હોવાનું તેમણે સ્પષ્ટ કર્યું હતું.
આ પણ વાંચો: વૈભવને ફરી તક, રિંકુ સિંહની વાપસી : ઝિમ્બાબ્વે T20 સિરીઝ માટે ટીમ ઇન્ડિયાની જાહેરાત
ફૂટબોલના ગોલકીપરથી બન્યા વિશ્વવિખ્યાત વિકેટકીપર
ઘણા લોકોને જાણીને આશ્ચર્ય થશે કે ધોનીનું પ્રથમ પ્રેમ ક્રિકેટ નહોતું. બાળપણમાં તેમને ફૂટબોલ અને બેડમિન્ટન વધુ ગમતા હતા. સ્કૂલ દરમિયાન તેઓ ફૂટબોલ ટીમમાં ગોલકીપર તરીકે રમતા હતા. તેમની ગોલકીપિંગ કૌશલ્ય જોઈને એક શિક્ષકે તેમને ક્રિકેટમાં વિકેટકીપિંગ અજમાવવાની સલાહ આપી હતી. આ નિર્ણયે આગળ જઈને ભારતીય ક્રિકેટને ઇતિહાસના સૌથી સફળ વિકેટકીપર-બેટ્સમેનમાંથી એક આપ્યો.
કાર કરતાં બાઇકનો છે વધુ શોખ
ધોની પાસે અનેક લક્ઝરી કાર છે, પરંતુ તેમની સૌથી મોટી પસંદગી બાઇક્સ છે. રાંચીમાં આવેલા તેમના ફાર્મહાઉસમાં 150થી વધુ બાઇક્સનો વિશાળ સંગ્રહ હોવાનું કહેવાય છે. આ સંગ્રહમાં જૂની રાજદૂતથી લઈને યામાહા RD350 જેવી ક્લાસિક બાઇક્સ પણ સામેલ છે. ખાસ વાત એ છે કે ધોની આજે પણ પોતાની બાઇક્સની દેખરેખ જાતે રાખવાનું પસંદ કરે છે. બાઇક્સ સાફ કરવી અને તેનું મેન્ટેનન્સ કરવું તેમના પ્રિય શોખમાં સામેલ છે.
ક્રિકેટથી આગળ પણ છે પ્રેરણાદાયક વ્યક્તિત્વ
ધોની માત્ર એક સફળ ક્રિકેટર નથી, પરંતુ સાદગી, શિસ્ત અને સંયમનું પ્રતિક પણ છે. સામાન્ય પરિવારથી શરૂઆત કરીને વિશ્વ ક્રિકેટના શિખર સુધી પહોંચવાની તેમની સફર લાખો યુવાનો માટે પ્રેરણાસ્ત્રોત બની છે. 45 વર્ષની ઉંમરે પણ ધોનીની લોકપ્રિયતા જરાય ઓછી થઈ નથી. મેદાનથી દૂર હોવા છતાં ચાહકોના દિલમાં માહી આજે પણ એટલા જ ખાસ છે જેટલા તેઓ વર્લ્ડ કપ જીતાડતી ક્ષણે હતા.
