અમરેલી: રાજ્યમાં ચોમાસાએ ફરી એકવાર જોર પકડ્યું છે અને હવામાન વિભાગે આગામી દિવસોમાં સૌરાષ્ટ્ર સહિત અમરેલી જિલ્લામાં ભારેથી અતિભારે વરસાદની આગાહી વ્યક્ત કરી છે. આ આગાહીને પગલે અમરેલી જિલ્લા વહીવટી તંત્ર સંપૂર્ણ એલર્ટ મોડમાં આવી ગયું છે. છેલ્લા કેટલાક દિવસોમાં જિલ્લાના રાજુલા, જાફરાબાદ, ખાંભા, સાવરકુંડલા સહિતના વિસ્તારોમાં અનરાધાર વરસાદ વરસતા અનેક ગામોમાં વરસાદી પાણી ફરી વળ્યા હતા, કેટલાક કોઝવે અને રસ્તાઓ પર પાણી ફરી વળતા વાહનવ્યવહાર પણ પ્રભાવિત બન્યો હતો. આવી સ્થિતિ ફરી સર્જાય તો કોઈપણ પ્રકારની જાનહાનિ ટાળી શકાય તે માટે જિલ્લા તંત્ર દ્વારા આગોતરા આયોજનને વધુ મજબૂત બનાવવામાં આવ્યું છે. પરિસ્થિતિને ધ્યાનમાં રાખીને વડોદરાથી NDRF (National Disaster Response Force)ની 6મી બટાલિયનની વિશેષ ટીમને અમરેલી મોકલવામાં આવી છે. આ ટીમને જિલ્લાના મધ્યસ્થ સ્થળ એવા સાવરકુંડલા ખાતે તૈનાત કરવામાં આવી છે જેથી જિલ્લામાં ગમે ત્યાં ઈમરજન્સી સર્જાય તો ખૂબ ઓછા સમયમાં બચાવ કામગીરી શરૂ કરી શકાય.
રાજુલા, જાફરાબાદ, ખાંભા અને સાવરકુંડલામાં વરસાદે વધારી ચિંતા
તાજેતરમાં જિલ્લામાં પડેલા ભારે વરસાદે અનેક વિસ્તારોમાં મુશ્કેલીઓ ઉભી કરી હતી. ખાસ કરીને રાજુલા, જાફરાબાદ, ખાંભા અને સાવરકુંડલા તાલુકાના નીચાણવાળા વિસ્તારોમાં વરસાદી પાણી ફરી વળતાં સામાન્ય જનજીવન પ્રભાવિત બન્યું હતું. કેટલાક ગામોમાં નાળા અને કોઝવે પર પાણી ફરી વળતાં લોકોનું આવાગમન ખોરવાયું હતું. કેટલાક વિસ્તારોમાં ખેતીને પણ અસર પહોંચી હતી. આ અનુભવને ધ્યાનમાં રાખીને આ વખતે તંત્ર કોઈપણ પરિસ્થિતિ માટે અગાઉથી જ તૈયાર થઈ ગયું છે.
સાવરકુંડલાને બનાવાયું NDRFનું સ્ટ્રેટેજિક બેઝ
અમરેલી જિલ્લાના મધ્યભાગમાં આવેલું સાવરકુંડલા જિલ્લાનાં વિવિધ તાલુકાઓ સાથે ઝડપથી જોડાય છે. આ કારણસર NDRFની ટીમને અહીં તૈનાત કરવાનો નિર્ણય લેવામાં આવ્યો છે. સાવરકુંડલાથી રાજુલા, જાફરાબાદ, લાઠી, બાબરા, ધારી, ખાંભા સહિતના વિસ્તારોમાં ઝડપથી પહોંચી શકાય છે, જેના કારણે આપત્તિના સમયે બચાવ કામગીરીમાં કિંમતી સમય બચી શકે છે.
30 જવાનો સાથે વડોદરાથી પહોંચી NDRFની 6મી બટાલિયન
જિલ્લા તંત્રની માંગને આધારે વડોદરાથી NDRFની 6મી બટાલિયનના 30 પ્રશિક્ષિત જવાનો અમરેલી જિલ્લામાં પહોંચી ગયા છે. ટીમ પાસે હાઈટેક બચાવ સાધનો, મોટરબોટ, લાઈફ જેકેટ, લાઈફ બોય, દોરડા, કટર મશીન, ફ્લડ રેસ્ક્યૂ કિટ, મેડિકલ કિટ અને અન્ય આધુનિક ઈમરજન્સી સાધનો ઉપલબ્ધ છે. ટીમને 24 કલાક સ્ટેન્ડબાય પર રાખવામાં આવી છે જેથી કોઈપણ સ્થળેથી કોલ મળતાં જ તરત જ રવાના થઈ શકાય.
પૂર, વરસાદી પાણી અને અન્ય આપત્તિમાં કરશે રેસ્ક્યૂ ઓપરેશન
NDRFની ટીમનું મુખ્ય કાર્ય વરસાદી પાણીમાં ફસાયેલા લોકોનો બચાવ, પૂર પ્રભાવિત વિસ્તારોમાં રાહત કામગીરી, નદી-નાળા અને કોઝવેમાં ફસાયેલા લોકોને સુરક્ષિત સ્થળે પહોંચાડવાનું રહેશે. જરૂર પડ્યે વૃક્ષો ધરાશાયી થવા, મકાન ધરાશાયી થવા અથવા અન્ય કુદરતી આપત્તિમાં પણ ટીમ કામગીરી કરશે.
કમાન્ડર સુરેન્દ્ર સિંહના નેતૃત્વમાં કામગીરી
NDRFની આ ટીમ કમાન્ડર સુરેન્દ્ર સિંહના નેતૃત્વ હેઠળ કામગીરી કરી રહી છે. તેમણે જણાવ્યું કે તમામ જવાનોને ફ્લડ રેસ્ક્યૂ અને આપત્તિ વ્યવસ્થાપનની વિશેષ તાલીમ આપવામાં આવી છે. કોઈપણ ગંભીર પરિસ્થિતિમાં ટીમ તાત્કાલિક સ્થળ પર પહોંચી માનવજીવન બચાવવા માટે સંપૂર્ણ રીતે તૈયાર છે. તેમણે વધુમાં જણાવ્યું કે ટીમ પાસે જરૂરી તમામ આધુનિક સાધનો ઉપલબ્ધ છે અને જિલ્લા વહીવટી તંત્ર સાથે સતત સંકલન રાખવામાં આવી રહ્યું છે.
જિલ્લા વહીવટી તંત્ર, પોલીસ અને ફાયર વિભાગ સાથે સતત સંકલન
અમરેલી જિલ્લા વહીવટી તંત્ર, પોલીસ વિભાગ, ફાયર બ્રિગેડ, આરોગ્ય વિભાગ, માર્ગ-મકાન વિભાગ અને વીજ વિભાગ સાથે NDRF સતત સંપર્કમાં રહેશે. કંટ્રોલ રૂમ મારફતે વરસાદની સ્થિતિ પર સતત નજર રાખવામાં આવી રહી છે અને જ્યાં જરૂર પડશે ત્યાં તાત્કાલિક બચાવ ટીમ મોકલવામાં આવશે.
હવામાન વિભાગની આગાહી બાદ તંત્રે વધારી સાવચેતી
હવામાન વિભાગે આગામી દિવસોમાં અમરેલી જિલ્લામાં ભારેથી અતિભારે વરસાદ પડવાની શક્યતા વ્યક્ત કરી છે. તેને ધ્યાનમાં રાખીને નીચાણવાળા વિસ્તારો, નદી કિનારા, ચેકડેમ, કોઝવે અને સંવેદનશીલ ગામો પર ખાસ નજર રાખવામાં આવી રહી છે. જો પરિસ્થિતિ વધુ ગંભીર બનશે તો લોકોને સલામત સ્થળે ખસેડવાની કામગીરી પણ હાથ ધરવામાં આવશે.
આ પણ વાંચો: અમરેલીમાં ભારે વરસાદ બાદ વીજકર્મીઓની યુદ્ધસ્તરની કામગીરી : 88 ગામોમાં ખોરવાયેલો વીજ પુરવઠો મોટા ભાગે પૂર્વવત
લોકોને બિનજરૂરી મુસાફરી ટાળવા અપીલ
જિલ્લા પ્રશાસને લોકોને ભારે વરસાદ દરમિયાન નદી, નાળા, ચેકડેમ અને કોઝવે પરથી પસાર ન થવા અપીલ કરી છે. વરસાદી પાણીનો પ્રવાહ ઓછો દેખાતો હોવા છતાં તેની ઊંડાઈ અને ગતિ જોખમી હોઈ શકે છે. તેથી કોઈપણ પ્રકારનું જોખમ ન લેવા અને માત્ર જરૂરી હોય ત્યારે જ બહાર નીકળવા લોકોને અનુરોધ કરવામાં આવ્યો છે. સાથે જ સોશિયલ મીડિયા પર ફેલાતી અફવાઓથી દૂર રહેવા અને માત્ર સત્તાવાર માહિતી પર જ વિશ્વાસ રાખવા પણ સૂચના આપવામાં આવી છે.
