Amit Shah on Ahmedabad visit : કેન્દ્રીય ગૃહ અને સહકારિતા મંત્રી અમિત શાહે આજે અમદાવાદમાં ₹1507 કરોડના વિવિધ પ્રજાલક્ષી વિકાસના પ્રકલ્પોનું લોકાર્પણ અને ખાતમુહૂર્ત કર્યું. શહેરના સર્વાંગી વિકાસ માટેના અનેક કામોની આ સાથે સત્તાવાર શરૂઆત થઈ. આ પ્રસંગે તેઓએ ગુજરાતની ભૂતપૂર્વ મુખ્યમંત્રી અને હાલની રાજ્યપાલ આનંદીબેન પટેલના જીવન પર આધારીત પુસ્તક ‘ચુનૌતીયા મુઝે પસંદ હૈ’નું વિમોચન પણ કર્યું. આ પુસ્તકમાં કુલ 252 પાનાં દ્વારા આનંદીબેનનું જીવન, સંઘર્ષ, સિદ્ધિઓ અને જાહેરજીવનની સફર વિગતવાર રજૂ કરી છે.
102 નવા સહાયક ફાયરમેનને નિયુક્તિ–પત્રો અપાયા
કાર્યક્રમમાં અમદાવાદ મ્યુનિસિપલ કોર્પોરેશન દ્વારા 102 નવા સહાયક ફાયરમેનને નિયુક્તિ–પત્રો પણ અમિત શાહના હસ્તે આપવામાં આવ્યા. ફાયર વિભાગની ક્ષમતામાં વધારો લાવવા માટેનું આ મહત્વપૂર્ણ પગલું છે.
'2036માં ઓલિમ્પિક પણ અમદાવાદમાં જ યોજોવાની છે'
અમિત શાહે ગોતા ખાતે જનસભાને સંબોધિત કરી અને રમતગમત તથા ભવિષ્યના આંતરરાષ્ટ્રીય ઇવેન્ટ અંગે મોટા નિવેદનો આપ્યા. તેમણે કહ્યું કે, “કોમનવેલ્થ ગેમ્સ 2030 માં અમદાવાદમાં રમાવવાની છે.” વધુમાં ઉમેર્યું કે, “તૈયારી રાખજો, 2036માં ઓલિમ્પિક પણ અમદાવાદમાં જ યોજોવાની છે. આખી દુનિયામાં દરેક રમત માટેનું ઉત્તમ અને આધુનિક સ્પોર્ટ્સ સેન્ટર અમદાવાદમાં બનવાનું છે.
''ખેલો ગુજરાતથી શરૂ થયેલી યાત્રા આજે ખેલો ઇન્ડિયા સુધી પહોંચી''
તેમણે કહ્યું કે, “ખેલો ગુજરાતથી શરૂ થયેલી યાત્રા આજે ખેલો ઇન્ડિયા સુધી પહોંચી છે.” જેમાં ગુજરાતની ભૂમિકા અને રમતગમતની દિશામાં રાજ્યના યોગદાનને તેમણે વખાણ્યું હતું. આજના કાર્યક્રમો સાથે અમદાવાદના વિકાસ, રમતગમતના ભવિષ્ય અને રાજ્યના પ્રશાસકીય ક્ષેત્રમાં એક મહત્વપૂર્ણ દિવસ નોંધાયો છે.
કેન્દ્રીય ગૃહ અને સહકારિતા મંત્રી અમિતભાઈ શાહે વિવિધ વિકાસ પ્રકલ્પો પ્રજાને અર્પણ કરતા જણાવ્યું હતું કે તત્કાલીન મુખ્યમંત્રી અને હાલના વડાપ્રધાન નરેન્દ્રભાઈ મોદીએ ગુજરાતમાં શરૂ કરેલ ખેલ મહાકુંભની યાત્રા આજે દેશમાં ખેલો ઇન્ડિયા થકી આગળ વધી છે. જેના દ્વારા અનેક ખેલાડીઓ તેમના શરીર અને મનને મજબૂત કરી રહ્યા છે. જીતવાનું ઝનૂન અને હારમાં નિરાશ નહિ થવાના સંસ્કાર પણ ખેલકૂદથી મળી રહ્યા છે. શાહે ઉમેર્યું હતું કે, અમદાવાદમાં અનેક રમત સંકુલ સહિત આંતરરાષ્ટ્રીય કક્ષાની વ્યસ્થા થઈ છે જેના પગલે ખેલાડીઑ પાંચ કિલોમીટરની અંદર આ સુવિધાનો લાભ લઈ પોતાની પ્રતિભાને ઉજાગર કરી રહ્યા છે, તેમણે જગ્યાના સદઉપયોગ માટે અમદાવાદ શહેરને અભિનંદન આપતા જણાવ્યું હતું કે, શહેરમાં ઓવરબ્રિજની નીચે નાના ખેલ સંકુલો, પુસ્તકાલય, ઓપન જિમ,યોગ સંકુલો બનાવી અનેક શહેરોને અમદાવાદ પ્રેરણા આપી રહ્યું છે. કેન્દ્રીય ગૃહમંત્રી અમિત શાહે જણાવ્યું હતું કે, વિશ્વનુ સૌથી મોટા ક્રિકેટ સ્ટેડિયમની બાજુમાં સરદાર પટેલ સ્પોર્ટ્સ એન્કલેવ બનવા સાથે સ્પોર્ટ્સ ક્ષેત્રે અનેક સુવિધાઓ થકી કોમનવેલ્થ 2030ની યજમાની અમદાવાદને મળી છે, સાથે આગામી 2029 માં દુનિયાભરના પોલીસ અને ફાયર બ્રિગેડ જવાનોની રમત અને 13 જેટલી આંતરરાષ્ટ્રીય સ્પર્ધાઓ સાથે 2036 ઓલમ્પિક માટે અમદાવાદે તૈયારી કરી છે. આ સાથે સમગ્ર વિશ્વના નકશામાં અમદાવાદ ખેલક્ષેત્રે અગ્રિમ સ્થાન પર અંકિત થઈ રહ્યું છે
