દિલ્હીની કાયદો અને વ્યવસ્થાને લઈને ગૃહ મંત્રાલયમાં એક મહત્વની બેઠક યોજાઈ હતી, બેઠકમાં ગૃહમંત્રી અમિત શાહ, દિલ્હી સરકારના ઉચ્ચ અધિકારીઓ અને પોલીસે રાજધાનીની સુરક્ષાને વધુ મજબૂત કરવા ચર્ચા કરી હતી.
દિલ્હીમાં ભાજપની સરકાર બન્યા બાદ કાયદો અને વ્યવસ્થાની પરિસ્થિતી મજબૂત કરવા માટે દરેક સ્તરે કાર્યવાહી શરૂ થઈ ગઈ છે. કેન્દ્રીય ગૃહ પ્રધાન અમિત શાહે શુક્રવારે દિલ્હીમાં કાયદો અને વ્યવસ્થાના મુદ્દે બેઠક બોલાવી હતી. આ બેઠક કેટલી મહત્વની હતી, તે એ વાતથી સાબિત થાય છે કે શીલા દીક્ષિતની સરકાર પછી આ પહેલીવાર જોવા મળી રહ્યું છે, જ્યારે કેન્દ્રીય ગૃહમંત્રીએ દિલ્હીના મુખ્યમંત્રી સહિત ગૃહ મંત્રાલયના અનેક ઉચ્ચ અધિકારીઓ સાથે રાષ્ટ્રીય રાજધાનીની કાયદો અને વ્યવસ્થાની સ્થિતિ અંગે ચર્ચા કરી છે.
બાંગ્લાદેશી-રોહિંગ્યા ઘૂસણખોરો પર એકશન
બેઠક બાદ કેન્દ્રીય ગૃહ પ્રધાન અમિત શાહે શુક્રવારે દિલ્હી પોલીસને બાંગ્લાદેશી અને રોહિંગ્યા ઘૂસણખોરોને ભારતમાં ઘૂસણખોરી કરવામાં મદદ કરતા નેટવર્ક સામે કડક કાર્યવાહી કરવાનો નિર્દેશ આપ્યો હતો. ગૃહમંત્રી અમિત શાહે કહ્યું કે દિલ્હીના પોલીસ સ્ટેશનો અને સબ-ડિવિઝન જે સતત ખરાબ પ્રદર્શન કરી રહ્યા છે તેમની સામે કડક કાર્યવાહી થવી જોઈએ. રાષ્ટ્રીય સુરક્ષા માટે ખતરો ઉભો કરનારા ઘૂસણખોરો સામે કડક કાર્યવાહી થવી જોઈએ. તેમને ઓળખીને દેશનિકાલ કરવો જોઈએ.
ડ્રગ્સ સામે પણ ઝુંબેશ
અમિત શાહે ડ્રગ્સ વિરુદ્ધ અભિયાન શરૂ કરવાની પણ વાત કરી અને દિલ્હી પોલીસને આ કામમાં લાગેલા લોકોની ઓળખ કરીને કાર્યવાહી કરવાનો આદેશ આપ્યો. અમિત શાહે દિલ્હીના ગેંગસ્ટરોની યાદી બનાવવા અને તેમની સામે કાર્યવાહી કરવાની પણ વાત કરી હતી. શાહે કહ્યું કે શહેરમાં આંતર-રાજ્ય ગેંગને ખતમ કરવાની દિલ્હી પોલીસની પ્રાથમિકતા હોવી જોઈએ. તેમણે કહ્યું કે ડ્રગના કેસોમાં "ઉપરથી નીચે અને નીચેથી ઉપર સુધી" પગલાં લેવા જોઈએ અને આવા ડ્રગ નેટવર્કને ખતમ કરવું જોઈએ.
આ બેઠકમાં દિલ્હીના મુખ્યમંત્રી રેખા ગુપ્તા, દિલ્હીના ગૃહમંત્રી આશિષ સૂદ, દિલ્હી પોલીસ કમિશનર સંજય અરોરા અને અન્ય વરિષ્ઠ અધિકારીઓ પણ હાજર હતા. આ બેઠકનો મુખ્ય ઉદ્દેશ્ય દિલ્હી સરકાર અને દિલ્હી પોલીસ વચ્ચે સમન્વય સ્થાપિત કરવાનો છે, જેથી કાયદો અને વ્યવસ્થા અંગે નિર્ણય લેવામાં કોઈ મુશ્કેલી ન આવે. અગાઉ, દિલ્હી વિધાનસભાની ચૂંટણી પહેલા, 22 નવેમ્બરના રોજ, કેન્દ્રીય ગૃહ પ્રધાન અમિત શાહે તેમના મંત્રાલયના ઉચ્ચ અધિકારીઓને બોલાવ્યા હતા અને દિલ્હીમાં કાયદો અને વ્યવસ્થાની સ્થિતિની સમીક્ષા કરી હતી. આ સાથે તેમણે મંત્રાલયના ઉચ્ચ અધિકારીઓને સૂચના આપી હતી કે દિલ્હીમાં અપરાધને લઈને ઝીરો ટોલરન્સની નીતિ પર કામ કરવું પડશે. દિલ્હીમાં કાયદો અને વ્યવસ્થામાં કોઈપણ પ્રકારની બેદરકારી સ્વીકારવામાં આવશે નહીં. દરેક વ્યક્તિએ દિલ્હીમાં સલામતી અનુભવવી જોઈએ. આ દરેક પોલીસકર્મીની વ્યક્તિગત જવાબદારી હોવી જોઈએ.
