નવા ટ્રેડ વોરના એંધાણ : એક સપ્તાહમાં ટ્રમ્પ કરી શકે છે મોટી જાહેરાત

અમેરિકાના રાષ્ટ્રપતિ ડોનાલ્ડ ટ્રમ્પ હવે ટેરિફ પર પોતાની યોજનાને આગળ વધારી રહ્યાં છે. ટ્રમ્પે ઘણા દેશો પર ટેરિફ લાદવાની યોજના જાહેર કરી છે.

ડોનાલ્ડ ટ્રમ્પે તેમની ચૂંટણી ઢંઢેરામાં ટેરિફનું વચન આપ્યું હતું અને સત્તા સંભાળ્યા પછી તરત જ તેમણે કેનેડા, મેક્સિકો અને ચીન પર ટેરિફની જાહેરાત કરી હતી. જો કે, તેમણે કેનેડા અને મેક્સિકો પર 25 ટકા વધારાની ટેરિફ પરનો નિર્ણય હાલમાં એક મહિના માટે મુલતવી રાખ્યો છે. પરંતુ ટ્રમ્પના કેટલાક અન્ય દેશો પર ટેરિફના નિર્ણય પછી, એક નવું વેપાર યુદ્ધ જોઈ શકાય છે.

ટ્રમ્પ અન્ય દેશો સાથે વેપાર કરવા માગે છે
મીડિયા રિપોર્ટ્સ અનુસાર ડોનાલ્ડ ટ્રમ્પ ઈચ્છે છે કે અમેરિકાનો વેપાર વિશ્વના અન્ય દેશો સાથે સમાન રહે. ટ્રમ્પે કહ્યું, "હું આવતા અઠવાડિયે તેની જાહેરાત કરીશ જેથી અન્ય દેશો અમારી સાથે સમાન વ્યવહાર કરી શકે. અમને વધારે નથી જોઈતું પણ ઓછું પણ નથી જોઈતું. હકિકતમાં ટ્રમ્પે જવાબી વેપારની વાત કરી છે. આનો અર્થ એ છે કે જો કોઈ દેશ અમેરિકન ચીજવસ્તુઓ પર વધુ ટેરિફ લાદશે, તો USA પણ તે દેશના માલ પર એટલો જ ટેરિફ લાદશે. ટ્રમ્પ વહીવટીતંત્ર ઓટો ટેરિફ પર પણ વિચાર કરી રહ્યું છે.

નિષ્ણાતોને છે નકારાત્મક અસરનો ભય

ડોનાલ્ડ ટ્રમ્પે ગુરુવારે (6 ફેબ્રુઆરી) વ્હાઇટ હાઉસમાં બજેટની ચર્ચા દરમિયાન રિપબ્લિકન સાંસદોને તેમની યોજનાઓની જાણ પણ કરી છે. ટ્રમ્પ વહીવટીતંત્રનું માનવું છે કે આયાતી ચીજવસ્તુઓ પર વધુ ટેરિફ લાદવાથી 2017ના કરવેરાના ઘટાડાને આગળ વધારવા માટે નાણાં મળશે. વર્તમાન ટેરિફ યુ. એસ. ને તેની વાર્ષિક આવકના માત્ર 2% આપે છે. તે જ સમયે, ટ્રમ્પ વહિવટી તંત્ર માને છે કે ટેરિફ વધારવાથી કેટલાક ખર્ચની ભરપાઈ થઈ શકે છે.
ટેરિફમાં વધારો અન્ય દેશોને બદલો લેવા અને યુ. એસ. નિકાસને અસર કરવા માટે પ્રેરિત કરી શકે છે. તેની વૈશ્વિક અર્થવ્યવસ્થા પર પણ નકારાત્મક અસર પડી શકે છે.