યુનાઈટેડ કિંગડમની કોવેન્ટ્રી સિટીમાં આવેલા Amazonના ફુલફિલમેન્ટ સેન્ટરમાં Tuberculosis (ટીબી) એટલે કે ક્ષયના અનેક કેસોની પુષ્ટિ થતા ભારે ખળભળાટ મચી ગયો છે. આ બેક્ટેરિયલ ઇન્ફેક્શનને ઘણીવાર 'Victorian Disease' (વિક્ટોરિયન બીમારી) તરીકે ઓળખવામાં આવે છે. આ સમાચાર સામે આવ્યા બાદ કર્મચારીઓની આરોગ્ય સુરક્ષાને લઈને ગંભીર ચિંતા વ્યક્ત કરવામાં આવી રહી છે. BBCના અહેવાલ મુજબ GMB Union દ્વારા આ વેરહાઉસમાં ટીબીના કેસોની પુષ્ટિ કરવામાં આવી છે. ઉલ્લેખનીય છે કે આ સાઈટ પર આશરે 3000 જેટલા કર્મચારીઓ કાર્યરત છે અને યુનિયને સંક્રમણ અટકાવવા માટે તાત્કાલિક અસરથી કામગીરી બંધ કરવાની માંગ ઉઠાવી છે.
શું છે Amazonનો પક્ષ?
Amazon કંપનીએ સ્વીકાર્યું છે કે સપ્ટેમ્બર મહિનામાં ટીબીના 10 કેસો સામે આવ્યા હતા જેની ઓળખ વર્ષ 2025માં કરવામાં આવી હતી. કંપનીના પ્રવક્તાએ જણાવ્યું હતું કે ત્યારથી અત્યાર સુધી કોઈ નવો કેસ નોંધાયો નથી. કંપની હાલ NHS અને UK Health Security Agency (UKHSA)ના માર્ગદર્શન હેઠળ સ્ક્રીનિંગ પ્રોગ્રામ ચલાવી રહી છે. Amazonનું કહેવું છે કે તેઓ સ્વાસ્થ્ય એજન્સીઓના નિર્દેશોનું કડક પાલન કરી રહ્યા છે અને આ કેસો બિનચેપી છે. સાઈટ હાલમાં સામાન્ય રીતે ચલાવવામાં આવી રહી છે અને તમામ અસરગ્રસ્ત કર્મચારીઓને સ્થિતિથી વાકેફ કરવામાં આવ્યા છે.
વેરહાઉસ બંધ કરવા સાંસદ અને યુનિયનની ઉગ્ર માગ
UKHSA વેસ્ટ મિડલેન્ડ્સના ડોક્ટર રોજર ગજરાજ મુજબ સંક્રમિત કર્મચારીઓના સંપર્કમાં આવેલા લોકોની તપાસ કરવામાં આવી રહી છે. તેમણે ઉમેર્યું કે એન્ટિબાયોટિક્સ દ્વારા ટીબીનો સંપૂર્ણ ઇલાજ શક્ય છે. જોકે GMB Unionએ માંગ કરી છે કે જ્યાં સુધી સ્થિતિ નિયંત્રણમાં ન આવે ત્યાં સુધી વેરહાઉસ બંધ કરી તમામ 3000 કર્મચારીઓને ફૂલ સેલરી સાથે ઘરે મોકલવા જોઈએ. કોવેન્ટ્રી સાઉથના સાંસદ ઝારા સુલ્તાનાએ પણ કંપનીની ટીકા કરતા કહ્યું કે અનેક કેસો હોવા છતાં સાઈટ બંધ ન કરવી તે ગંભીર ભૂલ છે. તેમણે આરોપ લગાવ્યો કે કંપની કર્મચારીઓની સુરક્ષા કરતા કામને વધુ મહત્વ આપી રહી છે.
બ્રિટનમાં ટીબીના કેસોમાં મોટો ઉછાળો
NHSની માર્ગદર્શિકા મુજબ ટીબીના મુખ્ય લક્ષણોમાં સતત ખાંસી, થાક, તીવ્ર તાવ, ભૂખ ન લાગવી અને વજન ઘટવાનો સમાવેશ થાય છે. આશ્ચર્યજનક રીતે UKHSAના આંકડા દર્શાવે છે કે 2024 દરમિયાન બ્રિટનમાં ટીબીના કેસોમાં 136%નો ધરખમ વધારો જોવા મળ્યો હતો જેમાં આશરે 5500 લોકો અસરગ્રસ્ત થયા હતા. હાલમાં એમેઝોન સાઈટ પર સ્વાસ્થ્ય એજન્સીઓ સાથે મળીને વ્યાપક તપાસ હાથ ધરવામાં આવી રહી છે જેથી સંક્રમણના ફેલાવાને અટકાવી શકાય.
