Akhilesh Yadav film reaction share: સમાજવાદી પાર્ટીના રાષ્ટ્રીય અધ્યક્ષ અખિલેશ યાદવે ફરહાન અખ્તર અભિનીત યુદ્ધ મહાકાવ્ય ‘120 Bahadur’ જોયા બાદ પોતાની હૃદયસ્પર્શી પ્રતિક્રિયા શેર કરી છે. તેમણે ફિલ્મના નિર્માણ, દિગ્દર્શન અને 1962ના રેઝાંગ લા યુદ્ધના બહાદુર સૈનિકોની વીરગાથાને વારંવાર વખાણી અને તેને ‘દરેકના જોવા જેવી ફિલ્મ’ ગણાવી.
ભારતીય સેના વિશ્વની સૌથી બહાદુર સેનાઓમાંની એક
અખિલેશ યાદવે મીડિયા સાથે વાતચીતમાં કહ્યું, “આ ફિલ્મ આપણી નવી પેઢીને અને ખાસ કરીને આપણા સૈનિકોને સશસ્ત્ર દળોના ગૌરવપૂર્ણ ઇતિહાસની યાદ અપાવે છે, જેના પર આપણને ખૂબ ગર્વ છે. ભારતીય સેના વિશ્વની સૌથી બહાદુર સેનાઓમાંની એક છે… રેઝાંગ લાનું યુદ્ધ અને કેપ્ટન રામચંદ્ર યાદવ સહિત તમામ 120 બહાદુરોની હિંમત અમૂલ્ય છે. દરેક વ્યક્તિએ આ ફિલ્મ જોવી જોઈએ.”સાથે જ અખિલેશે પોતાના અધિકૃત X (ટ્વિટર) હૅન્ડલ પર થિયેટરના ફોટા શેર કરતાં લખ્યું: “દેશભક્તિ ફક્ત એક સૂત્ર નથી; તે દેશ માટે પોતાના જીવનનું બલિદાન આપવાનો દ્રઢ સંકલ્પ છે.
એક સારા સંદેશ સાથેની સારી ફિલ્મ!
ફિલ્મ ‘120 Bahadur’ 1962ના ભારત-ચીન યુદ્ધમાં રેઝાંગ લા ખાતે લડેલી ઐતિહાસિક લડાઈની વાસ્તવિક ઘટના પર આધારિત છે, જેમાં મેજર શૈતાન સિંહ (ફરહાન અખ્તર)ની આગેવાનીમાં 13 કુમાઉં રેજિમેન્ટના માત્ર 120 જવાનોએ હજારો ચીની સૈનિકો સામે અંતિમ શ્વાસ સુધી લડત આપી હતી. ફિલ્મનું નિર્દેશન રજનીશ ‘રેજી’ ઘોષે કર્યું છે અને તેનું નિર્માણ એક્સેલ એન્ટરટેઈનમેન્ટ તથા ટ્રિગર હેપ્પી સ્ટુડિયોએ કર્યું છે. બોક્સ ઓફિસ પર સાધારણ પ્રદર્શન છતાં ફિલ્મને વિવેચકો અને દર્શકો તરફથી ભારે પ્રશંસા મળી રહી છે. અખિલેશ યાદવની આ પ્રતિક્રિયાએ ફિલ્મની ચર્ચાને વધુ વેગ આપ્યો છે.
