Air Raid Warning System: દેશની સુરક્ષા વ્યવસ્થાને વધુ અભેદ્ય અને સજ્જ બનાવવા માટે કેન્દ્ર સરકાર એક અત્યંત મહત્વપૂર્ણ પ્રોજેક્ટ પર કામ કરી રહી છે. હવે દેશના સંવેદનશીલ જિલ્લાઓમાં 'એર રેડ વોર્નિંગ સિસ્ટમ' (ARWS) લગાવવામાં આવશે, જે દુશ્મનો દ્વારા કરવામાં આવતા મિસાઈલ, ડ્રોન કે ફાઈટર જેટના હુમલાની ચેતવણી અગાઉથી જ આપી દેશે. ખાસ કરીને સરહદી વિસ્તારોમાં વધતા જતા ડ્રોન અને હવાઈ હુમલાના જોખમોને જોતા આ સિસ્ટમ નાગરિકો માટે સુરક્ષા કવચ સાબિત થશે.
આ પ્રોજેક્ટનું નેતૃત્વ કેન્દ્રીય ગૃહ મંત્રાલય હેઠળ કાર્યરત 'ડાયરેક્ટોરેટ જનરલ- ફાયર સર્વિસ, સિવિલ ડિફેન્સ અને હોમ ગાર્ડ્સ' દ્વારા કરવામાં આવી રહ્યું છે. આ સિસ્ટમના સંચાલન માટે એરફોર્સના અનુભવી નિવૃત્ત અધિકારીઓની નિમણૂક કરવામાં આવી રહી છે, જેઓ રડાર સિસ્ટમ અને એર-રેડ વોર્નિંગ પ્રક્રિયામાં નિપુણ છે. આ પગલાનો મુખ્ય ઉદ્દેશ્ય હવાઈ હુમલાની સ્થિતિમાં જમીની સ્તર પર એક સ્ટાન્ડર્ડ વોર્નિંગ સિસ્ટમ ઊભી કરવાનો છે.
આ પણ વાંચો: NEET વિવાદ વચ્ચે અભિજીત દિપકેની ભારત વાપસી ચર્ચામાં: 6 જૂને દિલ્હીમાં વિરોધ પ્રદર્શનનું એલાન
244 જિલ્લાઓ કવર કરશે આ સિક્યુરિટી નેટવર્ક
આ પ્રોજેક્ટ પૂર્ણ થયા બાદ દેશના કુલ 244 સંવેદનશીલ જિલ્લાઓ આ અત્યાધુનિક વોર્નિંગ નેટવર્ક સાથે જોડાઈ જશે. આ જિલ્લાઓમાંથી મોટાભાગના જિલ્લાઓ સરહદી વિસ્તારોમાં આવેલા છે, જે કોઈપણ પ્રકારના હવાઈ હુમલાની સ્થિતિમાં સૌથી પહેલા દુશ્મનોના નિશાના પર આવી શકે છે. આ સિસ્ટમ તમામ પ્રકારના ડ્રોન, મિસાઈલો અને લડાકુ વિમાનોની ગતિવિધિને ટ્રેક કરીને નાગરિકોને એલર્ટ કરશે, જેથી સમયસર સુરક્ષિત સ્થળે ખસી શકાય.
'ઓપરેશન સિંદૂર' બાદ લેવાયો મોટો નિર્ણય
છેલ્લા કેટલાક સમયમાં ખાસ કરીને પશ્ચિમી સરહદ પર પાકિસ્તાન દ્વારા કરવામાં આવેલા ડ્રોન ઘૂસણખોરીના પ્રયાસો બાદ આ સિસ્ટમની જરૂરિયાત વધુ તીવ્ર બની હતી. અહેવાલો અનુસાર, અગાઉની ઘણી જૂની એર વોર્નિંગ સિસ્ટમ્સ યોગ્ય રીતે કામ ન કરતી હોવાનું ધ્યાને આવ્યું હતું, જેને કારણે ઘણી જગ્યાએ સાયરન વગાડીને કામ ચલાવવું પડ્યું હતું. આ અનુભવો બાદ સરકારે આધુનિક સિસ્ટમ સ્થાપિત કરવાનો નિર્ણય લીધો છે.
