આસામમાં વાયુસેનાનું સુખોઈ ફાઈટર જેટ ગુમ : ટેકઓફ બાદ રડાર પરથી ગાયબ, વાયુસેનામાં હાઈ એલર્ટ; સર્ચ ઓપરેશન તેજ

Sukhoi Su-30MKI Missing: પૂર્વોત્તર રાજ્ય આસામમાંથી વાયુસેનાના વિમાનને લઈને ચિંતાજનક સમાચાર સામે આવ્યા છે. ભારતીય વાયુસેનાનું એક સુખોઈ Su-30MKI ફાઈટર જેટ ગુરુવારે સાંજે નિયમિત તાલીમ ઉડાન દરમિયાન રડાર પરથી ઓઝલ થઈ ગયું છે. આ ઘટના કાર્બી આંગલોંગ જિલ્લામાં બની હોવાનું મનાય છે. અધિકારીઓના જણાવ્યા અનુસાર, વિમાનનો સંપર્ક તૂટ્યાના તુરંત બાદ તેની સ્થિતિ જાણવા અને પાયલટોની ભાળ મેળવવા માટે સર્ચ એન્ડ રેસ્ક્યુ ઓપરેશન શરૂ કરી દેવામાં આવ્યું છે.

ઘટનાની ગંભીરતાને જોતા વાયુસેનાએ તાત્કાલિક એલર્ટ જાહેર કર્યું છે. સ્થાનિક સૂત્રો અને પ્રત્યક્ષદર્શીઓના જણાવ્યા અનુસાર, વિસ્તારમાં જોરદાર ધડાકો સંભળાયો હતો, જેના કારણે વિમાન ક્રેશ થયું હોવાની આશંકા પ્રબળ બની છે. જોકે, હજુ સુધી વાયુસેના તરફથી સત્તાવાર રીતે ક્રેશની પુષ્ટિ કરવામાં આવી નથી. હાલમાં એરફોર્સની સ્પેશિયલ ટીમ આસામ રવાના થઈ ચૂકી છે અને જંગલ વિસ્તારમાં તપાસ હાથ ધરવામાં આવી રહી છે.

સાંજે 7 વાગ્યે રડાર પરથી સંપર્ક તૂટ્યો

પ્રાપ્ત માહિતી અનુસાર, 4.5 જનરેશનનું આ મલ્ટીરોલ એરક્રાફ્ટ જ્યારે આસામના કાર્બી આંગલોંગ જિલ્લા પરથી પસાર થઈ રહ્યું હતું, ત્યારે સાંજે આશરે 7 વાગ્યાની આસપાસ તેનો રડાર સંપર્ક કપાઈ ગયો હતો. આ વિમાન એક રૂટિન મિશન પર હતું. ગ્રાઉન્ડ કંટ્રોલર સાથેના સંપર્ક બાદ અચાનક તે ગાયબ થઈ જતાં વાયુસેનાના સ્ટેશન પર હલચલ મચી ગઈ હતી. પર્વતીય અને ગાઢ જંગલો ધરાવતા આ વિસ્તારમાં વિમાનની શોધખોળ કરવી પડકારજનક બની રહી છે.

સ્થાનિકોનો દાવો: આકાશમાં જોરદાર ધડાકો સંભળાયો

આસામના સ્થાનિક રહેવાસીઓએ દાવો કર્યો છે કે તેમણે સાંજના સમયે આકાશમાં એક પ્રચંડ અવાજ સાંભળ્યો હતો. આ અવાજ વિમાનના એન્જિનમાં ખામી અથવા ક્રેશ થવાને કારણે હોઈ શકે છે. આ અહેવાલો બાદ પોલીસ અને સ્થાનિક પ્રશાસન પણ વાયુસેનાની મદદમાં જોડાયા છે. હાલમાં સર્ચ ઓપરેશનમાં હેલિકોપ્ટર અને ડ્રોનની મદદ લેવાની પણ તૈયારીઓ ચાલી રહી છે જેથી પાયલટોની ચોક્કસ લોકેશન જાણી શકાય.

IAF નું સૌથી ઘાતક હથિયાર છે સુખોઈ Su-30MKI

સુખોઈ Su-30MKI ને ભારતીય વાયુસેનાની કરોડરજ્જુ માનવામાં આવે છે. આ વિમાનની વિશેષતાઓ તેને અન્ય ફાઈટર જેટ્સથી અલગ પાડે છે:

• ટ્વીન-એન્જિન શક્તિ: તે બે એન્જિન ધરાવતું મલ્ટીરોલ ફાઇટર જેટ છે.

• બહુવિધ ભૂમિકા: આ જેટ હવાઈ સંરક્ષણ, લાંબા અંતરની સ્ટ્રાઈક અને દુશ્મન પર દેખરેખ રાખવા માટે સક્ષમ છે.

• અદ્યતન ટેકનોલોજી: 4.5 જનરેશનનું આ વિમાન અત્યાધુનિક રડાર અને મિસાઈલ સિસ્ટમથી સજ્જ છે.

તપાસના આદેશ, પાયલટોની સુરક્ષા પ્રથમ પ્રાથમિકતા

વાયુસેનાના ઉચ્ચ અધિકારીઓએ જણાવ્યું છે કે, અત્યારે અમારું પૂરું ધ્યાન વિમાન અને તેમાં સવાર પાયલટોને સલામત રીતે શોધવા પર છે. આ ઘટના પાછળ ટેકનિકલ ખામી હતી કે ખરાબ હવામાન, તે તપાસ બાદ જ જાણી શકાશે. વાયુસેના દ્વારા આ મામલે 'કોર્ટ ઓફ ઈન્ક્વાયરી' ના આદેશ આપવામાં આવી શકે છે.