એર ચાઈનાની ફ્લાઈટની કેબિનમાં લાગી આગ : ઉડતી ફ્લાઈટમાં હોબાળો

શનિવારે હાંગઝોઉથી સિઓલ જતી એર ચાઇનાની ફ્લાઇટમાં મુસાફરના કેરી-ઓન સામાનમાં રહેલી લિથિયમ બેટરીમાં આગ લાગતાં વિમાનને શાંઘાઈમાં ઇમરજન્સી લેન્ડિંગ કરાવવી પડી. ઘટનામાં કોઈને ઇજા પહોંચી નથી, પરંતુ કેબિનમાં ધુમાડો છવાઈ જતા મુસાફરોમાં હડકંપ મચી ગયો હતો.

સોશિયલ મીડિયા પર પોસ્ટ કરાયેલા નિવેદનમાં એર ચાઇનાએ જણાવ્યું કે October 18ના રોજ હાંગઝોઉથી ઇંચિયોન જતી ફ્લાઇટ CA139 દરમિયાન ઓવરહેડ ડબ્બામાં મુસાફરના કેરી-ઓન સામાનમાં રહેલી લિથિયમ બેટરી અચાનક આગ પકડતી જોવા મળી.

ક્રૂએ ઝડપથી આગ કાબુમાં લીધી

એરલાઇનના નિવેદન મુજબ ક્રૂએ તાત્કાલિક કાર્યવાહી કરી અને પરિસ્થિતિને કાબુમાં લીધી. કોઈ મુસાફર કે ક્રૂ સભ્યને ઇજા પહોંચી નથી. એર ચાઇનાએ જણાવ્યું કે, “ફ્લાઇટ સલામતી સુનિશ્ચિત કરવા માટે વિમાનને શાંઘાઈ પુડોંગ ઇન્ટરનેશનલ એરપોર્ટ પર અનયોજિત લેન્ડિંગ કરવું પડ્યું.”

એરલાઇનના શેડ્યૂલ મુજબ, ફ્લાઇટ CA139 સવારે 9:47 વાગ્યે હાંગઝોઉથી ઉડાન ભરવાની હતી અને બપોરે 12:20 વાગ્યે ઇંચિયોન ઇન્ટરનેશનલ એરપોર્ટ પર ઉતરવાની હતી.

મુસાફરોમાં ભય અને બૂમાબૂમ

આ ઘટનાનો વીડિયો સોશિયલ મીડિયા પર વાયરલ થયો છે જેમાં મુસાફરો અને ક્રૂ સભ્યો ઓવરહેડ ડબ્બામાં લાગી રહેલી આગ ઓલવવાનો પ્રયાસ કરતા જોવા મળે છે. કેબિનમાં કાળો ધુમાડો ફેલાતાં મુસાફરો કોરિયન ભાષામાં “જલદી કરો!” એવી બૂમો પાડતા સંભળાયા હતા.

એક ફોટામાં ઉપરના સ્ટોરેજ કમ્પાર્ટમેન્ટમાંથી આગની જ્વાળાઓ નીકળતી દેખાઈ હતી. મુસાફરો પોતાના હાથમાં રાખેલી પાણીની બોટલથી આગ બુઝાવવાનો પ્રયાસ કરતા જોવા મળ્યા હતા.

લિથિયમ બેટરી આગની ઘટનાઓમાં વધારો

તાજેતરના વર્ષોમાં લિથિયમ બેટરીથી સંકળાયેલી ઘટનાઓમાં વધારો નોંધાયો છે. એરલાઇન્સે મુસાફરોને સલાહ આપી છે કે તેઓ લિથિયમ બેટરી અથવા પાવરબેન્ક્સને હંમેશા હેન્ડ લગેજમાં રાખે અને ફ્લાઇટ દરમિયાન તેનું યોગ્ય સંચાલન કરે.

એર ચાઇનાએ જણાવ્યું કે ઘટનાની તપાસ શરૂ કરવામાં આવી છે અને મુસાફરોને વિલંબ બાદ અન્ય ફ્લાઇટ દ્વારા તેમના ગંતવ્ય સુધી મોકલવામાં આવ્યા છે.