અમદાવાદમાં 149મી ભગવાન જગન્નાથજીની રથયાત્રા 16 જુલાઈ 2026ના રોજ યોજાવાની છે. રથયાત્રાને લઈને અમદાવાદ શહેર પોલીસ કમિશનરે વિશેષ ટ્રાફિક જાહેરનામું બહાર પાડ્યું છે. રથયાત્રાના રૂટ તેમજ તેને જોડતા મુખ્ય માર્ગો પર વાહનવ્યવહાર પર પ્રતિબંધ રહેશે અને અનેક સ્થળોએ ટ્રાફિક ડાયવર્ટ કરવામાં આવશે. જાહેરનામું 15 જુલાઈની રાત્રે 12 વાગ્યાથી રથયાત્રા પૂર્ણ ન થાય ત્યાં સુધી અમલમાં રહેશે.
રથયાત્રાનો રૂટ
રથયાત્રા જામાલપુર સ્થિત શ્રી જગન્નાથ મંદિરથી નીકળીને જામાલપુર ચકલા, રાયખડ, ગાયકવાડ હવેલી, રાયપુર, ખાડિયા ચાર રસ્તા, પાંજરાપોળ, કાળુપુર સર્કલ, કાળુપુર બ્રિજ, સરસપુર, ત્યાંથી પરત પ્રેમ દરવાજા, દિલ્હી ચકલા, શાહપુર, દિલ્હી દરવાજા, દૂધેશ્વર રોડ, ઇન્કમટેક્સ, આશ્રમ રોડ, રાણીપ, ગોમતીપુર સહિતના નિર્ધારિત માર્ગો પરથી ફરી શ્રી જગન્નાથ મંદિર પરત ફરશે.
આ મુખ્ય માર્ગો પર વાહનવ્યવહાર પ્રતિબંધિત
રથયાત્રાના રૂટ પર તેમજ જોડાતા મુખ્ય માર્ગો પર તમામ પ્રકારના વાહનોની અવરજવર બંધ રહેશે. તેમાં ખાસ કરીને નીચેના માર્ગોનો સમાવેશ થાય છે.
ખમાસા ચાર રસ્તાથી જામાલપુર ફૂલ બજાર સુધી
રાયખડ ચાર રસ્તાથી આસ્ટોડિયા દરવાજા સુધી
આસ્ટોડિયા દરવાજાથી કાળુપુર સર્કલ સુધી
સારંગપુર સર્કલથી કાળુપુર બ્રિજ અને સરસપુર સુધી
કાળુપુર સર્કલથી પ્રેમ દરવાજા અને દિલ્હી ચકલા સુધી
દિલ્હી ચકલાથી શાહપુર દરવાજા, રાણીપ, ઇન્કમટેક્સ અને ગોમતીપુર તરફના જોડાતા માર્ગો
વાહનચાલકો માટે વૈકલ્પિક રૂટ
ટ્રાફિક પોલીસ દ્વારા અનેક વૈકલ્પિક માર્ગો નક્કી કરવામાં આવ્યા છે.
રાયખડ ચાર રસ્તાથી વિક્ટોરિયા ગાર્ડન થઈ જામાલપુર બ્રિજ તરફ જઈ શકાશે.
રાયખડથી ગાયકવાડ હવેલી તરફ અવરજવર માટે ડાયવર્ઝન આપવામાં આવશે.
આસ્ટોડિયા ચાર રસ્તાથી ગીતા મંદિર અને એસ.ટી. બસ સ્ટેન્ડ તરફ જઈ શકાશે.
કાળુપુર તરફ જવાના વાહનોને અમરાઈવાડી, અનસૂયા બ્રિજ અને અન્ય વૈકલ્પિક માર્ગો તરફ મોકલવામાં આવશે.
ઇન્કમટેક્સ, રાહત સર્કલ, મિર્ઝાપુર અને દિલ્હી દરવાજા વિસ્તાર માટે પણ અલગ-અલગ ડાયવર્ઝન રૂટ જાહેર કરાયા છે.
શાહપુર અને દૂધેશ્વર તરફ જતાં વાહનોને આશ્રમ રોડ અને રાહત સર્કલ તરફથી મોકલવામાં આવશે.
રેલવે સ્ટેશન જતાં મુસાફરો માટે ખાસ સૂચના
અમદાવાદ પોલીસના જાહેરનામા મુજબ કાળુપુર રેલવે સ્ટેશન જવા માટે સારંગપુર સર્કલ તરફથી કાળુપુર રેલવે સ્ટેશન પહોંચી શકાશે. મુસાફરોને સમયસર નીકળવાની સલાહ આપવામાં આવી છે જેથી ટ્રાફિક પ્રતિબંધોને કારણે મુશ્કેલી ન પડે.
આ વાહનોને રહેશે છૂટ
રથયાત્રા દરમિયાન પોલીસ, એમ્બ્યુલન્સ, ફાયર બ્રિગેડ, સરકારી ફરજ પરના વાહનો તેમજ પોલીસની મંજૂરી ધરાવતા આવશ્યક સેવા વાહનોને પ્રતિબંધમાંથી મુક્તિ આપવામાં આવી છે.
નિયમોના ભંગ બદલ થશે કાર્યવાહી
અમદાવાદ પોલીસ કમિશનરે જણાવ્યું છે કે જાહેરનામાનું ઉલ્લંઘન કરનાર સામે ભારતીય ન્યાય સંહિતા (BNS) 2023ની કલમ 223 તેમજ ગુજરાત પોલીસ અધિનિયમની કલમ 131 હેઠળ કાયદેસરની કાર્યવાહી કરવામાં આવશે.
