Ahmedabad Police: અમદાવાદ શહેર પોલીસ વિભાગમાં એક ગંભીર અને ચોંકાવનારો મામલો સામે આવ્યો છે, જેને કારણે સમગ્ર પોલીસ તંત્રમાં હલચલ મચી ગઈ છે. કૃષ્ણનગર પોલીસ સ્ટેશનમાં ફરજ બજાવતા PSI ડી.આર. પુવારની તાત્કાલિક બદલી કરવામાં આવી છે. તેમના પર કુખ્યાત આરોપી ધમા બારડ સાથે સાંઠગાંઠ હોવાના ગંભીર આરોપો લાગતા ઉચ્ચ પોલીસ અધિકારીઓએ ઝડપથી કાર્યવાહી હાથ ધરી છે. આ મામલો ત્યારે પ્રકાશમાં આવ્યો જ્યારે આરોપી ધમા બારડના મોબાઇલ ફોનમાંથી કેટલીક વોટ્સએપ ચેટ સામે આવી હોવાનું કહેવાય છે. આ ચેટમાં PSI અને આરોપી વચ્ચે થયેલી વાતચીતે અનેક સવાલો ઉભા કર્યા છે. ખાસ કરીને “તને કોઈ કંઈ નહીં કરે” જેવા મેસેજ સામે આવતા પોલીસ વિભાગની કાર્યશૈલી અને કેટલાક અધિકારીઓની ભૂમિકા અંગે ચર્ચાઓ તેજ બની ગઈ છે.
ધમા બારડ સાથેની ચેટથી ખુલ્યો મામલો
પ્રાપ્ત માહિતી મુજબ, કુખ્યાત આરોપી ધમા બારડના ફોનની તપાસ દરમિયાન વોટ્સએપ મેસેજીસ સામે આવ્યા હતા. આ મેસેજમાં કૃષ્ણનગર પોલીસ સ્ટેશનના PSI ડી.આર. પુવાર દ્વારા આરોપી સાથે સીધી વાતચીત કરવામાં આવી હોવાનું સામે આવ્યું છે. સૂત્રોના જણાવ્યા અનુસાર PSI દ્વારા આરોપીને પોલીસ સ્ટેશનમાં હાજર થવા માટે મેસેજ મોકલવામાં આવ્યો હતો. આ દરમિયાન આરોપીને વિશ્વાસ આપતા શબ્દોમાં લખવામાં આવ્યું હતું કે, “તને કોઈ કંઈ નહીં કરે”, જેના કારણે પોલીસ અધિકારી અને આરોપી વચ્ચે નજીકના સંબંધો હોવાની ચર્ચાએ જોર પકડ્યું છે.
ઉચ્ચ અધિકારીઓએ કરી તાત્કાલિક કાર્યવાહી
મામલાની ગંભીરતા ધ્યાનમાં રાખીને પોલીસ વિભાગના ઉચ્ચ અધિકારીઓએ તાત્કાલિક ધોરણે PSI ડી.આર. પુવારની બદલી કરવાનો નિર્ણય લીધો છે. આરોપી સાથે સાંઠગાંઠના પુરાવા સામે આવ્યા બાદ આ કાર્યવાહી કરવામાં આવી હોવાનું માનવામાં આવી રહ્યું છે. પોલીસ વિભાગ માટે આ ઘટના પ્રતિષ્ઠાને નુકસાન પહોંચાડે તેવી માનવામાં આવી રહી છે, કારણ કે કાયદો અને વ્યવસ્થાની જવાબદારી સંભાળતા અધિકારી પર જ આરોપીઓ સાથે સાંઠગાંઠના આરોપો લાગ્યા છે.
આ પણ વાંચો: અમદાવાદમાં તંત્રનો સપાટો: વટવા અને લંભામાં ગેરકાયદે બાંધકામો પર ફરી વળ્યું બુલડોઝર
પોલીસ વિભાગમાં મચી ભારે ચકચાર
આ સમગ્ર ઘટનાએ અમદાવાદ પોલીસ તંત્રમાં ભારે ચકચાર મચાવી છે. પોલીસ સ્ટેશન સ્તરે ફરજ બજાવતા અધિકારીઓની કામગીરી અને તેમની પારદર્શિતા અંગે હવે સવાલો ઊભા થઈ રહ્યા છે. જાહેરમાં પણ આ ઘટનાને લઈને ભારે ચર્ચા ચાલી રહી છે. લોકોમાં સવાલ ઉઠી રહ્યો છે કે જો પોલીસ અધિકારીઓ જ આરોપીઓને રક્ષણ આપતા હોય તો સામાન્ય નાગરિકોની સુરક્ષા કેવી રીતે સુનિશ્ચિત થશે?
