અમદાવાદ મહાનગરપાલિકામાં સુપરવાઈઝરની ભરતીમાં મોટું કૌભાંડ : હાઈકોર્ટે આપ્યા તપાસના આદેશ

Ahmedabad: અમદાવાદ મ્યુનિસિપલ કોર્પોરેશનમાં ટેકનિકલ સુપરવાઈઝરની ભરતીમાં કૌભાંડ સામે આવ્યું છે. મહાનગરપાલિકાની મધ્યસ્થ કચેરીના હેડ ક્લાર્કે તેમના કોમ્પ્યુટરમાં 3 ઉમેદવારોના માર્કસ 18 થી 20 નંબર વધારીને 85 થી 90 કરી દીધા હતા. જો કે, આ પોસ્ટ માટે 93 ઉમેદવારોને પસંદ કરવામાં આવ્યા હતા. કૌભાંડ આચરનાર હેડ ક્લાર્ક પુલકિત સથવારાને સસ્પેન્ડ કરવામાં આવ્યા છે અને તેની સામે પોલીસ ફરિયાદ દાખલ કરવામાં આવી હતી. જ્યાર હેડ ક્લાર્કની પોલીસે ધરપકડ કરીને રિકન્સ્ટ્રક્શન પણ કર્યું હતું.

અમદાવાદ મ્યુનિસિપલ કોર્પોરેશનમાં ટેકનિકલ સુપરવાઈઝર માટેની પરીક્ષા 18મી ઓગસ્ટે યોજાઈ હતી. પરીક્ષામાં આવેલા તમામ ઉમેદવારોની ઉત્તરવહીઓ ચકાસણી માટે યુનિવર્સિટીમાં મોકલવામાં આવી હતી અને ફાઈનલ પરિણામ જાહેર થયા બાદ હેડ ક્લાર્ક પુલકિત સથવારાની કામગીરી કોમ્પ્યુટરમાં ડેટા બનાવીને પરિણામ પત્રક તૈયાર કરવાનું હતું. સાથે જ તેમણે ત્રણ ઉમેદવારોના માર્કસમાં 4 થી 5 ગણો વધારો કરીને તે શીટ યુનિવર્સિટીને મોકલી તેના પર યુનિવર્સિટીના સાચા સિક્કાઓ પણ લગાવી દીધા હતા. તેમણે ત્રણેય ઉમેદવારોના માર્કસ જેટલા કટ ઓફ માર્કસ નક્કી કર્યા હતા તેટલા જ વધાર્યા હતા.

આ રીતે મામલોનો થયો ખુલાસો
જો કે, આ કૌભાંડ ત્યારે પ્રકાશમાં આવ્યું જ્યારે પરીક્ષામાં બેઠેલા ઉમેદવારના પરિચિત તમન્ના કુમારીએ પ્રોવિઝનલ આન્સર કી પછી પરિણામ તપાસવાનું કહ્યું. તે જ ઉમેદવારને ચેકિંગ દરમિયાન તેના માર્કસમાં કેટલીક વિસંગતતા જોવા મળી ત્યારે તેમણે મ્યુનિસિપલ કમિશનરને તેની પાસેની ઉત્તરવહી સાથે પત્ર લખ્યો હતો. આ સાથે માર્કસમાં છેડછાડને લઈ ગુજરાત હાઈકોર્ટમાં અરજી કરવામાં આવી હતી. જે બાદ તપાસના આદેશ આપવામાં આવ્યા અને કૌભાંડ બહાર આવ્યું હતું.

2 વર્ષમાં થયેલી ભરતીઓની તપાસના આદેશ
જો કે, પોલીસ હવે તપાસનો ધમધમાટ શરૂ કર્યો છે અને પરીક્ષામાં હાજર તમામ 3000 ઉમેદવારોની સાથે 3 ઉમેદવારોની પણ તપાસ કરશે. જેમના માર્ક્સ વધ્યા હતા. બીજી તરફ મહાનગરપાલિકા દ્વારા છેલ્લા બે વર્ષ દરમિયાન લેવામાં આવેલ ભરતી પરીક્ષાના પરિણામોની પણ આવી જ તપાસના આદેશ આપવામાં આવ્યા છે, આ સાથે અધિકારીઓને સંડોવાયેલી એજન્સી પાસે વાસ્તવિક ઉત્તરવહીઓ ઉપલબ્ધ કરાવવાના આદેશો આપવામાં આવ્યા છે.