Ahmedabad AMTS Bus Accident: અમદાવાદમાં જાહેર પરિવહન વ્યવસ્થાની સુરક્ષા સામે ગંભીર સવાલો ઊભા કરતી ઘટના સામે આવી છે. AMTSના એક બસ ડ્રાઈવર પર ફરજ દરમિયાન દારૂના નશામાં બસ ચલાવવાનો આરોપ લાગ્યો છે. પ્રાથમિક માહિતી મુજબ ડ્રાઈવરે રૂટ પૂર્ણ કર્યા બાદ બસને ડેપો લઈ જવાના બદલે રસ્તો ભૂલી એલિસબ્રિજ બ્રિજ નીચે આવેલા રિવરફ્રન્ટ તરફ લઈ ગયો હતો. બસ પરનો કાબૂ ગુમાવતાં તે ડિવાઈડર સાથે અથડાઈ હતી, જેના કારણે વિસ્તારમાં દોડધામ મચી ગઈ હતી. સદનસીબે ઘટના સમયે બસમાં એકપણ મુસાફર હાજર ન હતો, જેના કારણે મોટી જાનહાનિ ટળી હતી. જોકે જાહેર પરિવહનની બસના ડ્રાઈવર પર નશાની હાલતમાં વાહન ચલાવવાનો આરોપ સામે આવતા મુસાફરોની સુરક્ષા અને AMTSની દેખરેખ અંગે અનેક પ્રશ્નો ઊભા થયા છે. પોલીસે ડ્રાઈવર સામે ફરિયાદ નોંધી વધુ તપાસ શરૂ કરી છે, જ્યારે મેડિકલ તપાસના અહેવાલ બાદ આગળની કાયદાકીય કાર્યવાહી કરવામાં આવશે.
રૂટ પૂર્ણ કર્યા બાદ ડેપો જતી બસ બની અકસ્માતનો ભોગ
માહિતી અનુસાર, AMTSની આ બસ નરોડા રૂટ પર ફરજ બજાવી રહી હતી. રૂટ પૂર્ણ થયા બાદ બસને સારંગપુર ડેપો લઈ જવામાં આવી હતી, પરંતુ ત્યાં જગ્યા ઉપલબ્ધ ન હોવાથી ડ્રાઈવર બસને જમાલપુર ડેપો તરફ લઈ જઈ રહ્યો હતો. પ્રાથમિક તપાસમાં સામે આવ્યું છે કે, ડેપો તરફ જતાં પહેલાં ડ્રાઈવરે કથિત રીતે દારૂનું સેવન કર્યું હતું. ત્યારબાદ બસ પરનો કાબૂ ગુમાવતા તે એલિસબ્રિજ બ્રિજ નીચે આવેલા રિવરફ્રન્ટના આંતરિક માર્ગ પર પહોંચી ગઈ હતી અને ત્યાં બસ ઉભી રહી ગઈ હતી.
એલિસબ્રિજ નજીક પોલીસે ઝડપી પાડ્યો ડ્રાઈવર
ઘટનાની જાણ થતાં જ પોલીસ તાત્કાલિક સ્થળ પર પહોંચી હતી. પોલીસે ડ્રાઈવરની પૂછપરછ કરતાં તે અસ્વસ્થ હાલતમાં હોવાનું જણાયું હતું. પ્રાથમિક તપાસમાં તેના પર દારૂના નશામાં હોવાની શંકા વ્યક્ત કરવામાં આવી છે. પોલીસે ડ્રાઈવર સામે ગુનો નોંધ્યો છે અને તેને મેડિકલ તપાસ માટે મોકલ્યો છે. મેડિકલ રિપોર્ટના આધારે દારૂના સેવનની પુષ્ટિ થશે તો સંબંધિત કાયદાકીય કલમો હેઠળ કાર્યવાહી કરવામાં આવશે.
મુસાફરો ન હોવાથી મોટી દુર્ઘટના ટળી
ઘટના સમયે બસમાં એકપણ મુસાફર ન હોવાથી મોટી જાનહાનિ ટળી હતી. જો બસમાં મુસાફરો હોત અથવા રસ્તા પર વધુ વાહનો અને લોકો હાજર હોત તો અકસ્માત વધુ ગંભીર બની શક્યો હોત. આ ઘટનાએ જાહેર પરિવહનના ડ્રાઈવરોની નિયમિત મેડિકલ તપાસ, બ્રેથ એનાલાઈઝર ટેસ્ટ અને ફરજ દરમિયાન કડક દેખરેખની જરૂરિયાત ફરી એકવાર ઉજાગર કરી છે.
આ પણ વાંચો: 1,00,00,000ના ચરસ કેસમાં મોટો ચુકાદો! : આરોપીને 20 વર્ષની સખ્ત કેદ, રૂ. 2,00,000નો દંડ
AMTS ચેરમેનનું નિવેદન, ખાનગી એજન્સી પર દંડ
ઘટના અંગે AMTSના ચેરમેન પરાગ નાયકે જણાવ્યું કે ડ્રાઈવર સામે તાત્કાલિક કાર્યવાહી કરવામાં આવી છે. સાથે જ બસ સંચાલન કરતી ખાનગી એજન્સી પર ₹1 લાખનો દંડ ફટકારવાની સૂચના આપવામાં આવી છે. તેમણે જણાવ્યું કે, ભવિષ્યમાં આવી ઘટના ફરી ન બને તે માટે ડ્રાઈવરોની તપાસ અને દેખરેખની પ્રક્રિયાને વધુ કડક બનાવવામાં આવશે. સમગ્ર ઘટનાની આંતરિક તપાસ પણ હાથ ધરવામાં આવી છે.
તપાસ બાદ સ્પષ્ટ થશે સમગ્ર હકીકત
હાલ પોલીસ અને AMTS તંત્ર બંને આ સમગ્ર મામલે અલગ-અલગ તપાસ કરી રહ્યા છે. મેડિકલ રિપોર્ટ, CCTV ફૂટેજ અને અન્ય પુરાવાના આધારે ઘટનાક્રમની સંપૂર્ણ હકીકત સામે આવશે. જો ડ્રાઈવર દારૂના નશામાં વાહન ચલાવતો હોવાનું સાબિત થશે તો તેની સામે કાયદેસરની તેમજ વિભાગીય કાર્યવાહી કરવામાં આવશે.
