ભારતે સંરક્ષણ ક્ષેત્રે એક મોટી સિદ્ધિ હાંસલ કરતા MIRV ટેકનોલોજીથી સજ્જ અગ્નિ-5 મિસાઈલનું સફળ પરીક્ષણ પૂર્ણ કર્યું છે. ઓડિશાના દરિયાકાંઠે કરવામાં આવેલું આ પરીક્ષણ ભારતની સૈન્ય તાકાતને નવા સ્તરે લઈ ગયું છે. ભારતની આ સૌથી અત્યાધુનિક બેલેસ્ટિક મિસાઈલ દુશ્મન દેશોના અનેક મહત્વના શહેરો સુધી પહોંચવાની ક્ષમતા ધરાવે છે.
અગ્નિ-5ની પ્રહાર ક્ષમતા
સત્તાવાર માહિતી મુજબ અગ્નિ-5 મિસાઈલની મારક ક્ષમતા 5000 કિલોમીટરથી વધુ છે. જોકે, સંરક્ષણ નિષ્ણાતોનું માનવું છે કે તેની વાસ્તવિક ઓપરેશનલ રેન્જ આનાથી પણ વધારે હોઈ શકે છે. આ મિસાઈલ આખા પાકિસ્તાન અને ચીનના મોટાભાગના વિસ્તારોને આવરી લે છે. ચીનના બીજિંગ, શાંઘાઈ, ગુઆંગઝૌ, શેનઝેન, ચેંગદુ અને હોંગકોંગ જેવા મુખ્ય શહેરો હવે ભારતની સીધી પહોંચમાં છે. તેવી જ રીતે, પાકિસ્તાનના ઈસ્લામાબાદ, રાવલપિંડી, લાહોર અને કરાચી જેવા શહેરો પણ આ મિસાઈલના નિશાન હેઠળ આવી શકે છે.
MIRV ટેકનોલોજીની વિશેષતા
અગ્નિ-5ની સૌથી મોટી તાકાત તેની MIRV (Multiple Independently Targetable Re-entry Vehicle) ક્ષમતા છે. આ ટેકનોલોજીના કારણે એક જ મિસાઈલ એકસાથે અનેક પરમાણુ વોરહેડ લઈ જઈ શકે છે. આ વોરહેડ્સ હવામાં અલગ થઈને જુદા જુદા લક્ષ્યો પર ચોકસાઈપૂર્વક હુમલો કરવામાં સક્ષમ છે. આ વિશેષતાને લીધે દુશ્મન દેશની મિસાઈલ ડિફેન્સ સિસ્ટમ માટે અગ્નિ-5ને રોકવી અત્યંત પડકારજનક બની જાય છે.
અવાજની ગતિ કરતા 24 ગણી ઝડપ
આ મિસાઈલની ઝડપ પણ તેને ઘાતક બનાવે છે. અહેવાલો અનુસાર, તે Mach 24ની સ્પીડથી ઉડી શકે છે, જે અવાજની ગતિ કરતા આશરે 24 ગણી વધારે છે. આટલી પ્રચંડ ગતિને કારણે દુશ્મનને વળતો હુમલો કરવાનો સમય મળતો નથી. વધુમાં, તેને કેનિસ્ટર આધારિત લોન્ચ સિસ્ટમથી સજ્જ કરવામાં આવી છે, જેનાથી તેને રોડ કે રેલવે જેવા મોબાઈલ પ્લેટફોર્મ દ્વારા ગમે ત્યાં લઈ જઈ શકાય છે અને લોન્ચ કરી શકાય છે.
બંકર બસ્ટિંગ ક્ષમતા
અગ્નિ-5 મિસાઈલમાં જમીનની અંદર રહેલા લક્ષ્યોને નષ્ટ કરવાની એટલે કે બંકર બસ્ટિંગની અદભૂત ક્ષમતા રહેલી છે. આ મિસાઈલ જમીનની ઊંડાઈમાં બનેલા મજબૂત કમાન્ડ સેન્ટર્સ અને વ્યૂહાત્મક સૈન્ય મથકોને ભેદી શકે છે. ભારતની આ લાંબી દૂરીની અને અત્યાધુનિક મિસાઈલનો મુખ્ય ઉદ્દેશ્ય પરમાણુ શસ્ત્રો ધરાવતા વિરોધી દેશો સામે મજબૂત સુરક્ષા કવચ પૂરું પાડવાનો અને સંભવિત ખતરાઓને રોકવાનો છે.
