Trump Tariffs: યુએસ રાષ્ટ્રપતિ ડોનાલ્ડ ટ્રમ્પે ગુરુવારે (જાન્યુઆરી 29, 2026) એક એક્ઝિક્યુટિવ ઓર્ડર પર હસ્તાક્ષર કર્યા છે, જે ક્યુબાને તેલ વેચતા અથવા પુરવઠો આપતા કોઈપણ દેશની આયાત વસ્તુઓ પર ટેરિફ લાદવાની પ્રક્રિયા શરૂ કરે છે. આ આદેશ વેનેઝુએલા પછી ક્યુબા પર ટ્રમ્પની કડક કાર્યવાહીનો ભાગ છે, જેનો મુખ્ય લક્ષ્ય મેક્સિકો છે – જે ક્યુબાને તેલની મુખ્ય જીવનરેખા બની રહ્યું છે. ટ્રમ્પે આ પગલું ક્યુબાની કમ્યુનિસ્ટ સરકારને અલગ પાડવા અને તેને "પતનની આરે" લાવવા માટે લીધું છે.
Truth Social પર પોસ્ટ
તેમણે જાન્યુઆરી 11, 2026ના રોજ Truth Social પર પોસ્ટ કર્યું હતું: "THERE WILL BE NO MORE OIL OR MONEY GOING TO CUBA – ZERO! I strongly suggest they make a deal, BEFORE IT IS TOO LATE." વેનેઝુએલાના ભૂતપૂર્વ રાષ્ટ્રપતિ નિકોલસ માદુરોને અમેરિકી લશ્કરી કાર્યવાહીથી સત્તા પરથી હટાવ્યા પછી વેનેઝુએલાનું તેલ ક્યુબા પહોંચતું બંધ થઈ ગયું છે.
મેક્સિકો પર દબાણ અને તેલ પુરવઠો ઘટાડો
આ ઓર્ડરનો સીધો અસર મેક્સિકો પર પડે છે, જે ક્યુબાને તેલનો મુખ્ય સપ્લાયર બન્યું છે. મેક્સિકોની સરકારી તેલ કંપની PEMEXએ જાન્યુઆરીથી સપ્ટેમ્બર 30, 2025 સુધી દરરોજ આશરે 20,000 બેરલ તેલ ક્યુબા મોકલ્યું હતું. તાજેતરના અહેવાલો અનુસાર, ટ્રમ્પના દબાણને કારણે મેક્સિકોએ જાન્યુઆરી 2026માં કેટલીક શિપમેન્ટ્સ અસ્થાયી રીતે રોકી દીધી છે.
મેક્સિકન રાષ્ટ્રપતિ ક્લૉડિયા શેઇનબાઉમે કહ્યું કે આ "સ્વતંત્ર નિર્ણય" છે અને અમેરિકાના દબાણને કારણે નથી, પરંતુ તેમણે "હ્યુમેનિટેરિયન એઇડ" ચાલુ રાખવાની વાત કરી છે.આનાથી ક્યુબાના ઉર્જા સંકટમાં વધુ વધારો થઈ શકે છે. ક્યુબા પહેલેથી જ અમેરિકાના કડક આર્થિક પ્રતિબંધોને કારણે રશિયા, મેક્સિકો અને અન્ય સાથી દેશો પર નિર્ભર છે. તેલ પુરવઠો ઘટવાથી વીજળી કાપ, ઇંધણની અછત અને આર્થિક મુશ્કેલીઓ વધુ તીવ્ર બની શકે છે.
શું મેક્સિકો-ક્યુબા સંબંધોમાં તિરાડ પડશે?
ટ્રમ્પની ધમકીઓને કારણે મેક્સિકો અને ક્યુબા વચ્ચે તણાવ વધી શકે છે. મેક્સિકો યુએસ સાથે વેપાર સમજૂતી (USMCA) અને અન્ય મુદ્દાઓ પર વાટાઘાટો કરી રહ્યું છે, જેમાં ડ્રગ કાર્ટેલ્સ અને ઇમિગ્રેશન જેવા વિષયો છે. આ દબાણને કારણે મેક્સિકો ક્યુબાને તેલ પુરવઠો ઘટાડી શકે છે, જેનાથી બંને દેશો વચ્ચેના સંબંધો પર અસર પડી શકે છે.આ પગલું ક્યુબાની અર્થવ્યવસ્થાને વધુ નબળી બનાવી શકે છે અને ટ્રમ્પની વિદેશ નીતિમાં ક્યુબા વિરોધી અભિગમને વધુ મજબૂત બનાવે છે.
