Cars with ADAS feature : ભારતીય ઓટોમોબાઈલ માર્કેટમાં છેલ્લા કેટલાક વર્ષોમાં સુરક્ષાના માપદંડો ઝડપથી બદલાયા છે. હવે ગ્રાહકો માત્ર માઈલેજ નહીં, પરંતુ એડવાન્સ સેફ્ટી ફીચર્સ પર પણ ભાર મૂકે છે. 'ADAS' (Advanced Driver Assistance System) એવું જ એક પ્રીમિયમ ફીચર છે જે અકસ્માત રોકવામાં મદદરૂપ થાય છે. અગાઉ આ ફીચર માત્ર લક્ઝરી કારમાં જ મળતું હતું, પરંતુ હવે સામાન્ય લોકોના બજેટમાં પણ આવી ગઈ છે. જો તમે તમારી અને તમારા પરિવારની સુરક્ષા માટે નવી કાર શોધી રહ્યા છો, તો આ લિસ્ટ તમને ખૂબ ઉપયોગી થશે.
1. મહિન્દ્રા XUV 3XO : લેવલ 2 ADAS નો પાવર
મહિન્દ્રાની આ કાર અત્યારે કોમ્પેક્ટ SUV સેગમેન્ટમાં ધૂમ મચાવી રહી છે. તેની સૌથી મોટી ખાસિયત એ છે કે, તે તેના સેગમેન્ટમાં 'લેવલ 2 ADAS' આપનારી પ્રારંભિક કારોમાંની એક છે. આ ટેકનોલોજી કેમેરા અને રડાર બંને પર આધારિત છે, જે તેને વધુ સચોટ બનાવે છે.
ખાસિયતો : તેમાં ઓટોમેટિક ઇમરજન્સી બ્રેકિંગ, લેન કીપ આસિસ્ટ અને એડપ્ટિવ ક્રુઝ કંટ્રોલ જેવા પ્રીમિયમ ફીચર્સ મળે છે.
કિંમત અને વેરિઅન્ટ : આ ફીચર AX5 L અને AX7 L ટ્રીમ્સમાં ઉપલબ્ધ છે, જેની એક્સ-શોરૂમ કિંમત ₹11.91 લાખથી શરૂ થાય છે.
2. હોન્ડા સિટી : સેડાન લવર્સ માટે બેસ્ટ
હોન્ડા સિટી ભારતની સૌથી ભરોસાપાત્ર સેડાન કાર છે. હોન્ડાએ 'Honda Sensing' ના નામે પોતાની ADAS ટેકનોલોજી રજૂ કરી છે. આ કારની વિશેષતા એ છે કે, હોન્ડાએ તેના લગભગ તમામ વેરિઅન્ટમાં આ સેફટીને પ્રાથમિકતા આપી છે.
ખાસિયતો : હોન્ડા સિટીમાં લેન ડિપાર્ચર વોર્નિંગ, હાઇ-બીમ આસિસ્ટ અને કોલિઝન મિટિગેશન બ્રેકિંગ સિસ્ટમ મળે છે. તે 1.5 લિટર પેટ્રોલ એન્જિન સાથે આવે છે જે ડ્રાઇવિંગને સ્મૂધ બનાવે છે.
કિંમત અને વેરિઅન્ટ : બેઝ મોડલ SV ને છોડીને V, VX અને ZX તમામ મોડલ્સમાં ADAS ઉપલબ્ધ છે.
3. ટાટા નેક્સન : સુરક્ષા અને મજબૂતીનું કોમ્બિનેશન
ટાટા મોટર્સ હંમેશા સુરક્ષિત કાર બનાવવા માટે જાણીતી છે. નેક્સનમાં હવે લેવલ 2 ADAS ફીચર ઉમેરવામાં આવ્યું છે, જે તેને હરીફો કરતાં આગળ રાખે છે. જોકે, ટાટાએ આ ફીચરને માત્ર તેના ટોપ-એન્ડ પ્રીમિયમ મોડલ્સ પૂરતું મર્યાદિત રાખ્યું છે.
ખાસિયતો : નેક્સનનું ADAS ફિચર બ્લાઇન્ડ સ્પોટ મોનિટરિંગ અને ફ્રન્ટ કોલિઝન વોર્નિંગ જેવા આધુનિક ફીચર્સ આપે છે. નોંધવા જેવી વાત એ છે કે, આ ફીચર માત્ર પેટ્રોલ એન્જિન અને DCT ઓટોમેટિક ગિયરબોક્સ સાથે જ ઉપલબ્ધ છે.
કિંમત અને વેરિઅન્ટ : આ ફીચર Fearless+ PS અને Red Dark એડિશનમાં મળે છે, જેની કિંમત ₹13.45 લાખથી શરૂ થાય છે.
4. કિયા સોનેટ : હાઇ-ટેક ફીચર્સ
કિયા સોનેટ તેના સ્પોર્ટી લુક અને અદ્યતન ટેકનોલોજી માટે યુવાનોમાં પ્રિય છે. સોનેટમાં 'લેવલ 1 ADAS' આપવામાં આવ્યું છે, જે ભારતીય ટ્રાફિકની સ્થિતિને ધ્યાનમાં રાખીને ડિઝાઇન કરવામાં આવ્યું છે.
ખાસિયતો : તેમાં ફ્રન્ટ કોલિઝન વોર્નિંગ, ડ્રાઇવર અટેન્શન વોર્નિંગ અને લેન ફોલો આસિસ્ટ જેવા 10 થી વધુ પ્રીમિયમ ફીચર્સ મળે છે. તેમાં પેટ્રોલ અને ડીઝલ બંને એન્જિનના ઓપ્શન છે.
કિંમત અને વેરિઅન્ટ : આ ફીચર માત્ર GTX+ અને X-Line વેરિઅન્ટમાં જ ઉપલબ્ધ છે, જેની કિંમત ₹13.56 લાખથી શરૂ થાય છે.
5. હ્યુન્ડાઈ વેન્યુ : મધ્યમ બજેટ માટે ઉત્તમ
હ્યુન્ડાઈ વેન્યુ એ દેશની સૌથી સસ્તી કારોમાંની એક છે, જે ADAS ઓફર કરે છે. હ્યુન્ડાઈએ તેની 'SmartSense' ટેકનોલોજી દ્વારા ડ્રાઇવિંગને વધુ સુરક્ષિત બનાવ્યું છે.
ખાસિયતો : વેન્યુમાં લેન કીપિંગ આસિસ્ટ, લીડિંગ વ્હીકલ ડિપાર્ચર એલર્ટ અને હાઇ-બીમ આસિસ્ટ જેવા ફીચર્સ છે. આ કાર શહેરના ગીચ રસ્તાઓ પર ચલાવવા માટે ખૂબ જ અનુકૂળ છે.
કિંમત : વેન્યુના હાઇ-એન્ડ વેરિઅન્ટ્સમાં આ ફીચર જોવા મળે છે, જે સ્પર્ધાત્મક ભાવે ઉપલબ્ધ છે.
