‘કાંટા લગા’ ફેમ શેફાલી જરીવાલાનું હાર્ટએટેકથી મૃત્યુ : શેફાલીના પતિ શેફાલીને હોસ્પિટલ લાવ્યાં, પરંતુ સારવાર મળે તે પહેલાં જ મોત!

બોલિવૂડ અને ટેલિવિઝન જગતની જાણીતી અભિનેત્રી શેફાલી જરીવાલા, જે 'કાંટા લગા' ગીત અને 'બિગ બોસ 13'ની સ્પર્ધક તરીકે લોકપ્રિય હતી, તેનું 42 વર્ષની વયે શુક્રવારે રાત્રે અચાનક નિધન થયું છે. આ ઘટનાએ એન્ટરટેઇનમેન્ટ ઇન્ડસ્ટ્રી અને તેમના ચાહકોમાં શોકની લાગણી ફેલાવી છે. શેફાલીના નિધનના સમાચાર બાદ મુંબઈના અંધેરી વિસ્તારમાં આવેલા તેમના નિવાસસ્થાને પોલીસ અને ફોરેન્સિક ટીમ પહોંચી હતી, જેઓએ તેમના મૃત્યુના સંજોગોની તપાસ શરૂ કરી છે.

શુક્રવારે રાત્રે અચાનક બગડી તબિયત
શેફાલી જરીવાલાને શુક્રવારે રાત્રે તેમના પતિ, અભિનેતા પરાગ ત્યાગી અને અન્ય ત્રણ લોકો દ્વારા મુંબઈની બેલેવ્યૂ મલ્ટિસ્પેશિયાલિટી હોસ્પિટલમાં લઈ જવામાં આવ્યા હતા, પરંતુ હોસ્પિટલના રિસેપ્શનિસ્ટના જણાવ્યા અનુસાર, તેમને હોસ્પિટલ પહોંચે તે પહેલાં જ તેમનું મૃત્યુ થઈ ચૂક્યું હતું. પ્રાથમિક અહેવાલોમાં જણાવવામાં આવ્યું છે કે શેફાલીનું મૃત્યુ હૃદયરોગના હુમલાને કારણે થયું હોવાનું માનવામાં આવે છે, જોકે આ અંગે હજુ સુધી કોઈ સત્તાવાર નિવેદન જારી કરવામાં આવ્યું નથી. તેમનું શરીર પોસ્ટમોર્ટમ માટે કૂપર હોસ્પિટલમાં મોકલવામાં આવ્યું છે, જેનો અહેવાલ મૃત્યુનું ચોક્કસ કારણ સ્પષ્ટ કરશે.

ફોરેન્સિક અને પોલીસ તપાસ
શેફાલીના અચાનક નિધનથી ઉદ્ભવેલી શંકાઓને ધ્યાનમાં રાખીને, મુંબઈ પોલીસે તેમના નિવાસસ્થાને તપાસ શરૂ કરી છે. શનિવારે સવારે એક ફોરેન્સિક ટીમ શેફાલીના ઘરે પહોંચી હતી અને તેમના મૃત્યુ પહેલાના સંજોગોની ઊંડાણપૂર્વક તપાસ કરી રહી છે. સોશિયલ મીડિયા પર એક વીડિયો વાયરલ થયો છે, જેમાં ફોરેન્સિક ટીમને શેફાલીના ઘરની બહાર જોવામાં આવી હતી. પોલીસે જણાવ્યું કે, "અમને રાત્રે 1 વાગ્યે આ અંગેની માહિતી મળી હતી. શેફાલીનું શરીર અંધેરી વિસ્તારમાં તેમના નિવાસસ્થાને મળી આવ્યું હતું. મૃત્યુનું કારણ હજુ સુધી સ્પષ્ટ નથી."

શેફાલીની કારકિર્દી: 'કાંટા લગા'થી બિગ બોસ સુધી
શેફાલી જરીવાલા 2002માં 'કાંટા લગા' રીમિક્સ મ્યુઝિક વીડિયો દ્વારા રાતોરાત ખ્યાતિ પામી હતી. આ ગીતે તેમને 'કાંટા લગા ગર્લ' તરીકે ઓળખ અપાવી, જે 1972ના ધર્મેન્દ્ર અને આશા પરેખની ફિલ્મ 'સમાધિ'ના ગીતનું રીમિક્સ હતું. આ ગીતની લોકપ્રિયતાએ તેમને ઘરે-ઘરે ઓળખાતું નામ બનાવ્યું. તેમણે સલમાન ખાન અને અક્ષય કુમાર અભિનીત 2004ની ફિલ્મ 'મુઝસે શાદી કરોગી'માં પણ એક નાની ભૂમિકા ભજવી હતી.
શેફાલીએ બાદમાં ટેલિવિઝનની દુનિયામાં પ્રવેશ કર્યો અને 'નાચ બલિયે'ની સિઝન 5 અને 7માં તેમના પતિ પરાગ ત્યાગી સાથે ભાગ લીધો હતો. 2019માં, તેમણે 'બિગ બોસ 13'માં ભાગ લઈને ફરી એકવાર ચર્ચામાં આવ્યા, જ્યાં તેમના પૂર્વ બોયફ્રેન્ડ અને દિવંગત અભિનેતા સિદ્ધાર્થ શુક્લા સાથેના તેમના સંબંધે લોકોનું ધ્યાન ખેંચાયું હતું. શેફાલીએ તેના મનમોહક સ્વભાવથી દર્શકોના દિલ જીત્યા હતા.

શેફાલીનું વ્યક્તિગત જીવન
શેફાલીના લગ્ન 2004માં હરમીત સિંહ (મીટ બ્રધર્સ) સાથે થયા હતા, પરંતુ 2009માં તેમનાં છૂટાછેડા થયા હતો. 2015માં, તેમણે અભિનેતા પરાગ ત્યાગી સાથે લગ્ન કર્યા, જેની સાથે તેમણે 11 વર્ષ સુધી સુખી દાંપત્ય જીવન જીવ્યું. શેફાલીના નિધન બાદ, પરાગને હોસ્પિટલની બહાર ભાવુક હાલતમાં જોવામાં આવ્યા હતા, જ્યારે તેમની માતા શોકથી લગભગ બેહોશ થઈ ગયા હતા.

ઇન્ડસ્ટ્રી અને ચાહકોની શોક લાગણી
શેફાલીના નિધનના સમાચારથી એન્ટરટેઇનમેન્ટ ઇન્ડસ્ટ્રીમાં શોકની લહેર ફરી વળી છે. ઘણા સેલેબ્રિટીઝે તેમના માટે શોક વ્યક્ત કર્યો છે. ગાયક મીકા સિંહે લખ્યું, "હું ખૂબ જ દુખી અને ભારે હૃદય સાથે આ સમાચાર આપું છું... આપણી પ્રિય સ્ટાર અને મારી પ્રિય મિત્ર @shefalijariwala આપણને છોડી ગઈ છે. હજુ પણ વિશ્વાસ નથી થતો. તમે હંમેશા તમારી ગ્રેસ, સ્મિત અને ઉત્સાહ માટે યાદ રહેશો. ઓમ શાંતિ."
અભિનેત્રી દિવ્યાંકા ત્રિપાઠીએ લખ્યું, "હજુ પણ શેફાલીના સમાચાર પર વિશ્વાસ નથી થતો. ખૂબ જલ્દી ચાલી ગઈ. તેમના પતિ અને પરિવાર માટે ખૂબ દુખી છું." કામ્યા પંજાબી, રશ્મિ દેસાઈ, રાજીવ અદાતિયા અને કિશ્વર મર્ચન્ટે પણ શેફાલીના નિધન પર શોક વ્યક્ત કર્યો હતો.

સોશિયલ મીડિયા પર શેફાલીની આખરી પોસ્ટ
શેફાલી સોશિયલ મીડિયા પર ખૂબ જ એક્ટિવ હતી. તેમણે તેમના નિધનના માત્ર ત્રણ દિવસ પહેલાં ઇન્સ્ટાગ્રામ પર એક ગ્લેમરસ ફોટોશૂટની તસવીરો શેર કરી હતી, જેની સાથે તેમણે લખ્યું હતું, "બ્લિંગ ઇટ ઓન બેબી! " આ પોસ્ટ હવે ચાહકો માટે તેમની આખરી યાદગીરી બની ગઈ છે. તેમની આ પોસ્ટ પર ચાહકો શોકસભર સંદેશાઓ લખી રહ્યા છે, જેમાં ઘણાએ લખ્યું, "જીવન ખૂબ જ અણધાર્યું છે."

શેફાલીની માનસિક સ્વાસ્થ્ય અને મહિલા સશક્તિકરણ માટેની હિમાયત
શેફાલી માત્ર એક અભિનેત્રી જ નહોતી, પરંતુ તેમણે માનસિક સ્વાસ્થ્ય જાગૃતિ અને મહિલા સશક્તિકરણ માટે પણ સક્રિયપણે કામ કર્યું હતું. તેમણે એકવાર જણાવ્યું હતું કે, તેમને 15 વર્ષની ઉંમરે એપીલેપ્સી અને ડિપ્રેશનનો સામનો કરવો પડ્યો હતો, જેના કારણે તેમની અભિનય કારકિર્દી પર અસર પડી હતી. તેમની આ લડાઈએ તેમને માનસિક સ્વાસ્થ્યના મુદ્દાઓ પર ખુલ્લેઆમ ચર્ચા કરવા પ્રેરિત કરી હતી.