IND vs SA: ધર્મશાલાના હિમાચલ પ્રદેશ ક્રિકેટ એસોસિએશન સ્ટેડિયમમાં રમાયેલી પાંચ મેચની T20I સિરીઝની ત્રીજી મેચમાં ટીમ ઇન્ડિયાએ દક્ષિણ આફ્રિકાને 7 વિકેટથી પરાજિત કરીને સિરીઝમાં 2-1ની સરસાઈ હાંસલ કરી લીધી. કેપ્ટન સૂર્યકુમાર યાદવે ટોસ જીતીને પ્રથમ બોલિંગ પસંદ કરી હતી અને ભારતીય બોલરોએ શાનદાર પ્રદર્શન કરીને દક્ષિણ આફ્રિકાને 20 ઓવરમાં 117 રનમાં ઓલઆઉટ કરી દીધું.
પાવરપ્લેમાં જ ત્રણ વિકેટ ગુમાવી
દક્ષિણ આફ્રિકા તરફથી કેપ્ટન એડન માર્કરામે એકલા હાથે લડત આપી અને 46 બોલમાં 6 ચોગ્ગા અને 2 છગ્ગાની મદદથી 61 રનની અડધી સદી ફટકારી. તેમના સિવાય ડોનોવન ફરેરાએ 20 રન બનાવ્યા, જ્યારે બાકીના ખેલાડીઓ દોહરા આંકડા સુધી પણ પહોંચી શક્યા નહીં. ટીમની શરૂઆત ખરાબ રહી અને પાવરપ્લેમાં જ ત્રણ વિકેટ ગુમાવી દીધી. ભારત તરફથી અર્શદીપ સિંહ, હર્ષિત રાણા, વરુણ ચક્રવર્તી અને કુલદીપ યાદવે 2-2 વિકેટ લીધી, જ્યારે હાર્દિક પંડ્યા અને શિવમ દુબેએ 1-1 વિકેટ મેળવી. દક્ષિણ આફ્રિકાના કેપ્ટન એડન માર્કરામે 61 રનની લડત આપતી ઇનિંગ્સ રમી
અભિષેકે 35 રન ફટકારીને ચેઝને ઝડપી બનાવી
118 રનના સાધારણ લક્ષ્યાંકનો પીછો કરતા ભારતને અભિષેક શર્મા અને શુભમન ગિલે ઝડપી શરૂઆત અપાવી. અભિષેકે માત્ર 18 બોલમાં 3 ચોગ્ગા અને 3 છગ્ગાની મદદથી 35 રન ફટકારીને ચેઝને ઝડપી બનાવી દીધી. પ્રથમ વિકેટ માટે 60 રનની ભાગીદારી થઈ. અભિષેક આઉટ થયા પછી શુભમન ગિલ (28), તિલક વર્મા (અણનમ 25), સૂર્યકુમાર યાદવ (12) અને શિવમ દુબે (અણનમ 10)એ ટીમને 15.5 ઓવરમાં જ વિજય અપાવ્યો. દક્ષિણ આફ્રિકા તરફથી લુંગી એન્ગીડી, માર્કો જાનસેન અને કોર્બિન બોશે 1-1 વિકેટ લીધી.
આ જીત સાથે ભારતે સિરીઝમાં મજબૂત સ્થિતિ મેળવી લીધી છે અને આગામી મેચોમાં વધુ આત્મવિશ્વાસ સાથે ઉતરશે.
