રાષ્ટ્રપતિ દ્રૌપદી મુર્મૂએ પોતે કર્યા મિસ્ટર પરફેક્શનિસ્ટના વખાણ : આમિર ખાનની આ ફિલ્મને મળ્યું રાષ્ટ્રપતિ ભવનમાં સન્માન

બોલિવૂડના મિસ્ટર પરફેક્શનિસ્ટ આમિર ખાન તેમની નવી ફિલ્મ ‘સિતારે જમીન પર’ને લઈને ફરી એકવાર ચર્ચામાં છે. તાજેતરમાં, તેમણે દિલ્હીના રાષ્ટ્રપતિ ભવન ખાતે ભારતના રાષ્ટ્રપતિ દ્રૌપદી મુર્મૂ સાથે મુલાકાત કરી હતી. આ મુલાકાતનો હેતુ તેમની ફિલ્મ ‘સિતારે જમીન પર’નું ખાસ સ્ક્રીનિંગનું આયોજન હતું, જે 20 જૂન, 2025ના રોજ રિલીઝ થઈ હતી. આ ફિલ્મે રિલીઝ થતાંની સાથે જ દર્શકો અને વિવેચકો તરફથી સકારાત્મક પ્રતિસાદ મેળવ્યો છે.

આ ખાસ સ્ક્રીનિંગ રાષ્ટ્રપતિ ભવનના સાંસ્કૃતિક કેન્દ્રમાં યોજાયું હતું, જ્યાં રાષ્ટ્રપતિ દ્રૌપદી મુર્મુએ ફિલ્મ જોઈ અને તેના સંદેશની પ્રશંસા કરી. ‘સિતારે જમીન પર’ એક એવી ફિલ્મ છે જેમાં ન્યૂરોડાયવર્જન્ટ વ્યક્તિઓની વાસ્તવિક ભૂમિકાઓ દર્શાવવામાં આવી છે અને તે વિવિધતા, સમાનતા અને સમાવેશનો સંદેશ આપે છે. રાષ્ટ્રપતિના અધિકૃત એક્સ હેન્ડલ પર શેર કરાયેલા પોસ્ટમાં આ ફિલ્મની આ થીમની ખૂબ પ્રશંસા કરવામાં આવી હતી.


આમિર ખાન આ સ્ક્રીનિંગ દરમિયાન ફિલ્મની સમગ્ર ટીમ સાથે હાજર રહ્યા હતા, જેમાં ફિલ્મના ડિરેક્ટર આર.એસ. પ્રસન્ના અને અભિનેત્રી જેનેલિયા ડિસોઝા પણ સામેલ હતા. ફિલ્મમાં દસ ન્યૂરોડાયવર્જન્ટ કલાકારો - આરોશ દત્તા, ગોપી કૃષ્ણ વર્મા, સંવિત દેસાઈ, વેદાંત શર્મા, આયુષ ભંસાલી, આશીષ પેન્ડસે, ઋષિ શાહની, ઋષભ જૈન, નમન મિશ્રા અને સિમરન મંગેશકરે પણ પોતાની અભિનય ક્ષમતાથી દર્શકોનું દિલ જીત્યું છે.

આ ફિલ્મ આમિર ખાન પ્રોડક્શન્સ હેઠળ બની છે અને તે 2007ની સુપરહિટ ફિલ્મ ‘તારે જમીન પર’ની આધ્યાત્મિક સિક્વલ માનવામાં આવે છે. બોક્સ ઓફિસ પર પણ ફિલ્મે સારો દેખાવ કર્યો છે અને ચાર દિવસમાં લગભગ 70 કરોડ રૂપિયાની કમાણી કરી લીધી છે. આમિર ખાનની આ ફિલ્મ ફરી એકવાર તેમની સામાજિક સંદેશ આપતી સિનેમાની ઓળખને નવું રૂપ આપે છે.


‘સિતારે જમીન પર’ની આ સફળતા અને રાષ્ટ્રપતિ ભવનમાં થયેલું ખાસ સ્ક્રીનિંગ આમિર ખાનની સિનેમામાં સતત નવીનતા અને સામાજિક મુદ્દાઓને ઉજાગર કરવાની પ્રતિબદ્ધતાને દર્શાવે છે. ફિલ્મની આ સફળતા અને રાષ્ટ્રપતિની પ્રશંસા એ બતાવે છે કે આમિરનું સિનેમા માત્ર મનોરંજન જ નહીં, પરંતુ સમાજને નવી દિશા આપવાનું માધ્યમ પણ છે.