ગ્રીસના લેસબોસ ટાપુ નજીક મોટો અકસ્માત : પ્રવાસીઓથી ભરેલી બોટ પલટી, 7ના મોત 23 લોકોનો આબાદ બચાવ

ગ્રીસના લેસ્બોસ ટાપુ પાસે સ્થળાંતર કરનારાઓથી ભરેલી બોટ પલટી જવાની માહિતી સામે આવી છે. જણાવવામાં આવી રહ્યું છે કે આ બોટ તુર્કિયેથી માઈગ્રન્ટ્સને નજીકના ગ્રીક ટાપુ પર લઈ જઈ રહી હતી. આ દરમિયાન અકસ્માત સર્જાયો હતો. હોડી પલટી જવાથી ઓછામાં ઓછા સાત લોકોના મોત થયા હતા, જેમાં બે બાળકોનો પણ સમાવેશ થાય છે. ગ્રીક કોસ્ટ ગાર્ડે ગુરુવારે આ માહિતી આપી હતી.

ઘટનાની માહિતી મળતાની સાથે જ લેસ્બોસ ટાપુના ઉત્તરી તટ પર તાત્કાલિક અસરથી શોધ અને બચાવ કામગીરી શરૂ કરવામાં આવી હતી. આ દરમિયાન મૃતકોના મૃતદેહ મળી આવ્યા હતા. કોસ્ટ ગાર્ડે જણાવ્યું કે 23 લોકોને બચાવી લેવાયા છે. તેમાં કહેવામાં આવ્યું છે કે બોટ પર સવાર લોકોની કુલ સંખ્યા અને તેમની રાષ્ટ્રીયતા વિશે તાત્કાલિક કોઈ માહિતી ઉપલબ્ધ નથી. કોસ્ટ ગાર્ડે કહ્યું કે શોધ અને બચાવ કામગીરી ચાલી રહી છે. જોકે, તેઓએ એ નથી જણાવ્યું કે બોટમાં કેટલા લોકો હતા.