જો તમે 7 થી 8 લાખ રૂપિયાના બજેટમાં એક માઇલેજ ફ્રેન્ડલી અને સલામત SUV ખરીદવાની યોજના બનાવી રહ્યા છો, તો ટાટા પંચ અને હ્યુન્ડાઇ એક્સટર તમારા માટે બે શ્રેષ્ઠ વિકલ્પ બની શકે છે. બંને ગાડીઓ ભારતીય બજારમાં લોકપ્રિયતા હાંસલ કરી ચૂકી છે. ચાલો જાણીએ કે કિંમત, માઇલેજ, સલામતી અને ફીચર્સના આધારે કઈ ગાડી શ્રેષ્ઠ છે.
TATA PUNCH:
ટાટા મોટર્સની આ SUVની એક્સ-શોરૂમ કિંમત ₹6 લાખથી શરૂ થાય છે અને ટોચના વેરિઅન્ટ માટે ₹10.32 લાખ સુધી જાય છે. CNG વર્ઝનની કિંમત ₹7.30 લાખથી શરૂ થાય છે. તેમાં 1.2-લિટર, 3-સિલિન્ડર નેચરલી એસ્પિરેટેડ પેટ્રોલ એન્જિન આપવામાં આવ્યું છે, જે 87 bhp પાવર અને 115 Nm ટોર્ક જનરેટ કરે છે. CNG વેરિઅન્ટમાં આ પાવર ઘટીને 72 bhp થાય છે.
ARAI મુજબ પેટ્રોલ વર્ઝન 20.09 કિમી પ્રતિ લીટર અને CNG વર્ઝન 26.99 કિમી પ્રતિ કિલોગ્રામનો માઇલેજ આપે છે. ટાટા પંચને ગ્લોબલ NCAP તરફથી 5-સ્ટાર સેફ્ટી રેટિંગ મળ્યું છે. તેમાં ડ્યુઅલ એરબેગ્સ, ABS, EBD, રીયર પાર્કિંગ સેન્સર અને રીયર વ્યૂ કેમેરા જેવી સુરક્ષા સુવિધાઓ ઉપલબ્ધ છે.
ફીચર્સમાં 10.25-ઇંચ ટચસ્ક્રીન, હરમન ઓડિયો સિસ્ટમ, ક્રુઝ કંટ્રોલ, ઓટોમેટિક ક્લાઇમેટ કંટ્રોલ અને વાયરલેસ ચાર્જિંગ જેવી સુવિધાઓનો સમાવેશ થાય છે.
HYUNDAI EXTER:
હ્યુન્ડાઇની આ SUV પણ ₹6 લાખની શરુઆત કિંમત ધરાવે છે અને ટોચના વેરિઅન્ટ માટે ₹10.51 લાખ સુધી જાય છે. CNG મોડલ ₹7.50 લાખથી શરૂ થાય છે. તેમાં 1.2-લિટર, 4-સિલિન્ડર પેટ્રોલ એન્જિન છે જે 82 bhp પાવર અને 114 Nm ટોર્ક આપે છે, જ્યારે CNG મોડલ 68 bhp પાવર જનરેટ કરે છે.
માઇલેજની દ્રષ્ટિએ, પેટ્રોલ વર્ઝન 19.4 કિમી/લિટર અને CNG વર્ઝન 27.1 કિમી/કિલોગ્રામનો માઇલેજ આપે છે. હ્યુન્ડાઇ એક્સટરમાં 6 એરબેગ્સ, ABS, EBD, ESC, TPMS અને હિલ-હોલ્ડ આસિસ્ટ જેવી અદ્યતન સુરક્ષા સુવિધાઓ છે, જોકે તેનો ગ્લોબલ NCAP ક્રેશ ટેસ્ટ રિપોર્ટ હજુ જાહેર થયો નથી.
ફીચર્સમાં 8-ઇંચ ટચસ્ક્રીન, ડેશકેમ, ડિજિટલ ડ્રાઇવર ડિસ્પ્લે અને વધુ ટેક-ફ્રેન્ડલી ઇન્ટરિયર ઉપલબ્ધ છે.
કઈ ગાડી શ્રેષ્ઠ?
સલામતીની દ્રષ્ટિએ ટાટા પંચને સ્પષ્ટપણે 5-સ્ટાર રેટિંગથી આગળ ગણી શકાય છે, જ્યારે ટેક-સેવી અને વધુ એરબેગ સુરક્ષા પસંદ હોય તો હ્યુન્ડાઇ એક્સટર પણ લોકપ્રિય વિકલ્પ છે. માઇલેજ અને કિંમત બંનેમાં બન્ને SUV લગભગ સમાન છે. બંનેમાં CNG ઓપ્શન ઉપલબ્ધ છે અને અંદાજે 800 કિમી રેન્જ આપે છે.
