PM મોદીએ કાલે અસમની બે દિવસીય મુલાકાતની શરૂઆત કરી. તેમની મુલાકાતના પ્રથમ દિવસે ગુવાહાટીમાં એક ભવ્ય રોડશો કર્યો હતો, જેમાં અસમની વિવિધ વંશીય સંસ્કૃતિઓનું પ્રદર્શન કરવામાં આવ્યું હતું. આ રોડશો ગુવાહાટી એરપોર્ટથી અઝારા સુધી લગભગ 4 કિલોમીટર લાંબો હતો અને હજારો લોકોએ તેમને આવકાર્યા હતા.
રોડશો પછી, વડાપ્રધાને સરુસાજાઈ સ્ટેડિયમ (ઇન્દિરા ગાંધી એથ્લેટિક સ્ટેડિયમ)માં 'બગુરુમ્બા દ્વોઉ 2026' નામના પરંપરાગત બોડો સાંસ્કૃતિક કાર્યક્રમમાં ભાગ લીધો હતો. આ કાર્યક્રમમાં 10,000થી વધુ બોડો કલાકારોએ એકસાથે બગુરુમ્બા ડાન્સનું પ્રદર્શન કર્યું હતું, જે અસમની સમૃદ્ધ સાંસ્કૃતિક વારસાનું પ્રતીક છે.
આ ડાન્સ પ્રકૃતિ-પ્રેરિત છે અને બોડો સમુદાયની શાંતિ, આનંદ અને સાંસ્કૃતિક એકતાનું પ્રતીક છે. વડાપ્રધાન મોદીને આ કાર્યક્રમમાં સન્માનિત કરવામાં આવ્યા હતા અને તેમણે પરંપરાગત બોડો વાદ્યયંત્ર 'સેર્જા' વગાડવાનો પ્રયાસ કર્યો હતો.
તેમણે કાર્યક્રમમાં બોલતા કહ્યું કે, "આ ડાન્સ માત્ર ઉજવણી નથી, પરંતુ બોડો સમુદાય પ્રત્યેના આદરનું પ્રતીક છે. અસમની સંસ્કૃતિને વૈશ્વિક માન્યતા અપાવવાનું મારું વચન છે." તેમણે વધુમાં કોંગ્રેસ પર આરોપ લગાવ્યો કે તેઓએ અસમનું અપમાન કર્યું અને ઘુસણખોરોને પ્રવેશ આપ્યો.
