નેશનલ એવોર્ડ જીત્યા બાદ ભાવુક થઈ યામી ગૌતમ : કહ્યું- 'મેં ક્યારેય હાર માની નથી'; વર્ષોનું સપનું આખરે થયું સાકાર

Yami Gautam: 72મા નેશનલ ફિલ્મ એવોર્ડ્સમાં 'આર્ટિકલ 370' માટે બેસ્ટ એક્ટ્રેસનો રાષ્ટ્રીય પુરસ્કાર જીત્યા બાદ અભિનેત્રી યામી ગૌતમ ભાવુક બની ગઈ છે. આ મોટી સિદ્ધિ બાદ તેમણે સોશિયલ મીડિયા પર એક લાંબી પોસ્ટ શેર કરીને વર્ષોના સંઘર્ષ, પોતાના સપના અને આ ફિલ્મ સાથે જોડાયેલી લાગણીઓ વ્યક્ત કરી છે. યામીએ કહ્યું કે આ એવોર્ડ માત્ર સન્માન નથી, પરંતુ વર્ષોથી જોયેલા સપનાનું સાકાર સ્વરૂપ છે.

'મેં ક્યારેય હાર માની નથી'

યામી ગૌતમે પોતાની પોસ્ટમાં લખ્યું કે જીવનમાં દરેક વ્યક્તિ માટે એક એવી ક્ષણ આવે છે, જે તેને યાદ અપાવે છે કે તમામ મુશ્કેલીઓ છતાં તેણે હાર કેમ ન માની.

તેમણે લખ્યું, "મારા માટે આ જ ક્ષણ છે. 'આર્ટિકલ 370' માટે મળેલો નેશનલ એવોર્ડ હું આખી જિંદગી યાદ રાખીશ. છેલ્લા 14 વર્ષમાં મેં માત્ર મારા કામ પ્રત્યે ઈમાનદાર રહેવાનો પ્રયાસ કર્યો છે. મેં હંમેશા મારા અભિનયને જ મારી ઓળખ બનવા દીધી છે. આ સન્માન મારી મહેનત, આશા, હિંમત અને સિનેમા પ્રત્યેના અતૂટ પ્રેમનું પરિણામ છે."

વર્ષોનું સપનું આખરે પૂરું થયું

યામીએ જણાવ્યું કે નેશનલ ફિલ્મ એવોર્ડ જીતવાનું સપનું તેમણે ઘણા વર્ષોથી જોયું હતું અને હવે તે સાકાર થયું છે.

તેમણે લખ્યું કે, "'આર્ટિકલ 370' મારા માટે ક્યારેય સામાન્ય ફિલ્મ નહોતી. આ એવી કહાની હતી જેમાં મને દિલથી વિશ્વાસ હતો. આ અમારી હોમ પ્રોડક્શન ફિલ્મ હતી, તેથી આ સન્માન મારા માટે વધુ ભાવનાત્મક અને વ્યક્તિગત બની ગયું છે."

યામીના જણાવ્યા મુજબ ફિલ્મના સેટ પર થયેલી દરેક ચર્ચા અને દરેક દૃશ્ય પાછળ માત્ર એક જ ઉદ્દેશ હતો—દર્શકો સુધી સત્ય અને અર્થપૂર્ણ કહાનીને સંપૂર્ણ ઈમાનદારી સાથે પહોંચાડવાનો.

જ્યુરી, ટીમ અને પરિવારનો માન્યો આભાર

પોસ્ટમાં યામીએ નેશનલ ફિલ્મ એવોર્ડની જ્યુરી, ફિલ્મના ડિરેક્ટર, સમગ્ર કલાકાર મંડળ, ટેક્નિકલ ટીમ અને દર્શકોનો દિલથી આભાર માન્યો.

તેમણે લખ્યું કે, "આ સન્માન માટે જ્યુરીનો આભાર. 'આર્ટિકલ 370'ને પ્રેમ અને વિશ્વાસ આપનાર દરેક દર્શકનો પણ હું દિલથી આભાર માનું છું. તમે સાબિત કર્યું કે અર્થપૂર્ણ કહાનીઓ હંમેશા લોકોના દિલ સુધી પોતાનો રસ્તો બનાવી લે છે."

યામીએ પોતાના પરિવાર, ટીમ અને શુભેચ્છકોનો પણ આભાર વ્યક્ત કરતાં કહ્યું કે જ્યારે તેમને લાગતું હતું કે મંઝિલ હજુ ઘણી દૂર છે, ત્યારે આ તમામ લોકોએ તેમના પર વિશ્વાસ રાખીને આગળ વધવાની હિંમત આપી.

'આ અંત નથી, નવી જવાબદારીની શરૂઆત છે'

પોસ્ટના અંતમાં યામીએ લખ્યું કે આ એવોર્ડ કોઈ સપનાનો અંત નથી, પરંતુ નવી જવાબદારીની શરૂઆત છે.

તેમણે કહ્યું, "હવે વધુ જોખમ લેવા, નવી અને અર્થપૂર્ણ કહાનીઓ કહેવાની અને સતત આગળ વધવાની જવાબદારી વધી ગઈ છે. સપના ચોક્કસ સાકાર થાય છે, પરંતુ ત્યારે જ જ્યારે તમારો જુસ્સો અને વિશ્વાસ ક્યારેય હાર ન માને. આ એવોર્ડ દરેક એવા વ્યક્તિ માટે છે જે હજુ પણ પોતાના ખાસ ક્ષણની રાહ જોઈ રહ્યો છે."

આ પણ વાંચો: 72મા નેશનલ ફિલ્મ એવોર્ડ્સમાં ગુજરાતી સિનેમાનો ડંકો! : અભિષેક જૈનની 'મારણ' બની બેસ્ટ ગુજરાતી ફિલ્મ, 'આર્ટિકલ 370'ને મળ્યો સ્વર્ણ કમલ, જાણો કોને મળ્યો કયો એવોર્ડ

'આર્ટિકલ 370'નો રહ્યો દબદબો

72મા નેશનલ ફિલ્મ એવોર્ડ્સમાં 'આર્ટિકલ 370'એ શાનદાર પ્રદર્શન કર્યું. ફિલ્મને બેસ્ટ ફીચર ફિલ્મ (સ્વર્ણ કમલ)નો પ્રતિષ્ઠિત પુરસ્કાર મળ્યો, જ્યારે યામી ગૌતમને આ ફિલ્મમાં તેમના અભિનય માટે બેસ્ટ એક્ટ્રેસનો નેશનલ એવોર્ડ એનાયત કરવામાં આવ્યો. આ સન્માન સાથે યામી ગૌતમના કરિયરમાં વધુ એક ઐતિહાસિક સિદ્ધિ ઉમેરાઈ છે અને તેમના અભિનયને રાષ્ટ્રીય સ્તરે નવી ઓળખ મળી છે.