કલ્પના કરો કે તમે એક આલીશાન કેફેમાં બેઠા છો, ટેબલ પર મીણબત્તી સળગી રહી છે, ફેવરિટ ડ્રિંક ગ્લાસમાં ભરેલી છે પરંતુ, તમારી સામે કોઈ જીવંત માણસ નહીં, પણ સ્માર્ટફોનની સ્ક્રીન પર એક ડિજિટલ અવતાર છે! આ કોઈ લખાયેલી સ્ટોરી નહીં પરંતુ વાસ્તવિકતા છે. ન્યૂયોર્કમાં તાજેતરમાં જ વિશ્વનું પ્રથમ 'AI Dating Cafe' શરૂ કરવામાં આવ્યું છે, જ્યાં લોકો તેમના આર્ટિફિશિયલ ઇન્ટેલિજન્સ (AI) પાર્ટનર સાથે ઓફિશિયલ ડેટ પર જઈ રહ્યા છે. આજના ડિજિટલ યુગમાં જ્યારે લોકો ડેટિંગ એપ્સથી કંટાળી ગયા છે અથવા રિજેક્શનના ડરથી કોઈની સાથે વાત કરતા અચકાય છે, ત્યારે આ કેફે એક નવો અનુભવ આપી રહ્યો છે. AI રિલેશનશિપ એપ 'EVA AI' દ્વારા શરૂ કરાયેલા આ કેફેમાં પ્રેમ અને ટેકનોલોજીની એક એવી દુનિયા જોવા મળી રહી છે, જે કદાચ આવનારા ભવિષ્યની ડેટિંગ લાઈફની ઝલક છે.
કેવી હોય છે AI કેફેમાં ડેટિંગની મજા?
ન્યૂયોર્કના આ ખાસ EVA Cafe માં વાતાવરણ એકદમ રોમેન્ટિક રાખવામાં આવે છે. ટેબલ પર સામેની વ્યક્તિની જગ્યાએ એક મોબાઈલ સ્ટેન્ડ હોય છે. મુસાફરો તેમના ફોનમાં રહેલા AI પાર્ટનર સાથે લાઈવ વિડિયો કે, વોઈસ ચેટ દ્વારા વાતો કરે છે. લોકો હેડફોન લગાવીને કલાકો સુધી તેમના ડિજિટલ સાથી સાથે ફ્લર્ટ કરે છે, મનની વાતો શેર કરે છે અને ડ્રિંક્સની મજા માણે છે. અહીં સૌથી મોટો ફાયદો એ છે કે, સામેથી રિજેક્શન મળવાનો કે કોઈ જજમેન્ટ કરવાનો ડર હોતો નથી.
વધી રહ્યો છે AI પાર્ટનરનો ક્રેઝ: આંકડા ચોંકાવનારા છે
સમય બદલાઈ રહ્યો છે અને લોકો હવે મશીનો સાથે ભાવનાત્મક રીતે જોડાઈ રહ્યા છે. એક રિપોર્ટ અનુસાર, અમેરિકામાં 28% વયસ્કોએ સ્વીકાર્યું છે કે તેઓ AI સાથે રોમેન્ટિક કનેક્શન અનુભવે છે. 42% કિશોરો એકલતા દૂર કરવા માટે AI નો સહારો લે છે. 30 વર્ષથી ઓછી ઉંમરના દર ત્રણમાંથી એક પુરુષ અને દર ચારમાંથી એક મહિલા AI પાર્ટનર સાથે વાતચીત કરી રહ્યા છે.
એક યુઝરનો અનુભવ: "મારો નિયમ, મારી વાતો"
ન્યૂયોર્કની 34 વર્ષીય રિચટર આ કેફેની મુલાકાતી બની હતી. તે તેના 26 વર્ષીય AI પાર્ટનર 'Simone' સાથે ડેટ પર આવી હતી. તેણે જણાવ્યું હતું કે, AI સાથે વાત કરવાનો સૌથી મોટો ફાયદો એ છે કે તે પોતાની મરજી મુજબ અને સામાજિક દબાણ વગર વાત કરી શકે છે. જોકે, તેણે એ પણ સ્વીકાર્યું કે, આની આદત પડી શકે છે, તેથી તે દિવસમાં માત્ર 3 કલાક જ AI સાથે વિતાવે છે.
શું AI માનવીય સંબંધોનો વિકલ્પ બની શકે?
EVA AI ના પાર્ટનરશિપ હેડ જુલિયા મોમ્બ્લાટ જણાવે છે કે, તેમનો ઉદ્દેશ્ય માનવીય સંબંધોને ખતમ કરવાનો નથી, પરંતુ જે લોકો સોશિયલ એન્ઝાયટી (સામાજિક ગભરાટ) અનુભવે છે અથવા એકલતામાં જીવે છે તેમને એક સુરક્ષિત વાતાવરણ આપવાનો છે. આ કેફે દ્વારા તેઓ AI ને ડરામણી ટેકનોલોજીને બદલે એક મદદગાર સાથી તરીકે રજૂ કરવા માંગે છે.
AI ડેટિંગના ફાયદા અને નુકસાન
સંભવિત ફાયદા:
રિજેક્શનનો ડર નહીં: તમે ગમે તે વાત કરી શકો છો, સામો પાર્ટનર ક્યારેય નારાજ નહીં થાય.
કોન્ફિડન્સ બિલ્ડિંગ: જે લોકો વાત કરતા ડરે છે તેમના માટે આ એક સારી પ્રેક્ટિસ છે.
એકલતામાં સહારો: ખાસ કરીને જેમના કોઈ મિત્રો નથી તેમના માટે બેસ્ટ ઓપ્શન.
સંભવિત ચિંતાઓ:
વાસ્તવિકતાથી દૂરી: માણસો સાથેના ખરા સંબંધો નબળા પડી શકે છે.
વ્યસન: ડિજિટલ દુનિયામાં ખોવાઈ જવાનો અને તેની લત લાગવાનો ખતરો.
ભાવનાત્મક નિર્ભરતા: સાચા માનવીય ઇમોશન્સને સમજવાની શક્તિ ઓછી થઈ શકે છે.
ડેટિંગનું ભવિષ્ય કેવું હશે?
AI ડેટિંગ કેફેની શરૂઆત માત્ર એક ટ્રેલર છે. જો આ ટ્રેન્ડ વધશે તો આવનારા સમયમાં દરેક શહેરમાં આવા કેફે જોવા મળી શકે છે. પ્રશ્ન એ થાય છે કે, શું ભવિષ્યમાં રોમાન્સનો અર્થ માત્ર સ્ક્રીન સામે બેસીને વાતો કરવી જ રહી જશે? કે પછી AI માત્ર આપણને સાચા સંબંધો માટે તૈયાર કરવાનું એક માધ્યમ બનશે? સમય જ કહેશે, પણ હાલ તો ન્યૂયોર્કનું આ કેફે સમગ્ર વિશ્વમાં ચર્ચાનો વિષય બન્યું છે.
