Tips for buying a new car : કાર ખરીદવી એ કોઈપણ પરિવાર માટે એક મોટું સ્વપ્ન હોય છે, પરંતુ શું તમે જાણો છો કે, કાર ખરીદવાનો તમારો આ નિર્ણય તમારા ખિસ્સા પરનો બોજ ઘણો ઓછો કરી શકે છે? હા, જો તમે તમારી નવી કાર તમારી પત્નીના નામે રજીસ્ટર કરાવો છો, તો તમે આ ચાર પદ્ધતિઓ દ્વારા ઘણું બચાવી શકો છો. આ પદ્ધતિ માત્ર ખર્ચ ઘટાડે છે એટલું જ નહીં પરંતુ મહિલાઓને આર્થિક રીતે મજબૂત બનાવવામાં પણ મદદ કરે છે.
રોડ ટેક્સમાં મોટી રાહત
પત્નીના નામે કાર ખરીદવાનો સૌથી પહેલો અને મોટો ફાયદો રોડ ટેક્સમાં મળતી છૂટ છે. ભારતના ઘણા રાજ્યોમાં જો કાર મહિલાના નામે રજીસ્ટર કરવામાં આવે, તો રોડ ટેક્સમાં 2% થી 10% સુધીની રાહત મળે છે. આ છૂટ અલગ-અલગ રાજ્યોની નીતિ પર આધાર રાખે છે. આનાથી કારની કુલ કિંમતમાં સીધો હજારો રૂપિયાનો ફાયદો થઈ શકે છે.
ઓછા વ્યાજ દરે કાર લોન
જો તમે કાર ખરીદવા માટે લોન લેવા ઈચ્છો છો, તો પત્નીના નામે લોન લેવી ફાયદાકારક સાબિત થઈ શકે છે. મોટાભાગની બેંકો અને ફાઇનાન્સ કંપનીઓ મહિલા ગ્રાહકોને પ્રોત્સાહન આપવા માટે વ્યાજ દરમાં 0.25% થી 0.50% સુધીની છૂટ આપે છે. જો લોનની રકમ મોટી હોય, તો લાંબા ગાળે વ્યાજ પેટે ચૂકવવામાં આવતી રકમમાં મોટી બચત થાય છે.
ઇનકમ ટેક્સમાં ડબલ બેનિફિટ
કર બચતની દ્રષ્ટિએ પણ આ નિર્ણય સ્માર્ટ છે. જો તમારી પત્ની વર્કિંગ છે અને તેમના નામે કાર લોન લેવામાં આવે, તો લોનના મુદ્દલ (Principal) અને વ્યાજ (Interest) બંને પર ટેક્સ બેનિફિટ મળે છે. આનાથી તમારા પરિવારનો કુલ ટેક્સ ઘટે છે અને વાર્ષિક બચતમાં વધારો થાય છે.
વીમા પ્રીમિયમમાં પણ બચત
વીમા કંપનીઓના આંકડા મુજબ, મહિલાઓ પુરુષોની સરખામણીએ વધુ સુરક્ષિત રીતે વાહન ચલાવે છે અને તેમના અકસ્માતોની સંભાવના ઓછી રહે છે. આ કારણસર ઘણી વીમા કંપનીઓ મહિલાઓના નામે લેવામાં આવતી પોલિસી પર 5% થી 10% સુધીનું ડિસ્કાઉન્ટ આપે છે. આમ, દર વર્ષે રિન્યુ કરાવવામાં આવતા ઇન્શ્યોરન્સમાં પણ તમને રાહત મળે છે.
