Sharmila Dhankar: જીવનમાં અનેક મુશ્કેલીઓનો સામનો કર્યા બાદ પણ જો કોઈ વ્યક્તિ પોતાના સપના છોડતી નથી, તો સફળતા એક દિવસ ચોક્કસ તેના પગ ચૂમે છે. હરિયાણાની શર્મિલા ધનખડની કહાની પણ કંઈક આવી જ છે. બાળપણમાં પોલિયો, લગ્ન બાદ દહેજ માટે અત્યાચાર, ઘરેલુ હિંસા, બે દીકરીઓની જવાબદારી અને પરિવાર ચલાવવા આયાનું કામ... આ તમામ સંઘર્ષો વચ્ચે તેમણે હિંમત હારી નહીં. આજે એ જ શર્મિલા કોમનવેલ્થ ગેમ્સ 2026માં પેરા એથ્લેટિક્સમાં ગોલ્ડ મેડલ જીતનાર ભારતની પ્રથમ મહિલા બનીને દેશનું ગૌરવ વધાર્યું છે.
કોમનવેલ્થ ગેમ્સમાં રચ્યો ઇતિહાસ
શર્મિલા ધનખડે કોમનવેલ્થ ગેમ્સ 2026માં મહિલાઓની F57 શોટ પુટ સ્પર્ધામાં 9.81 મીટરનો થ્રો કરીને ગોલ્ડ મેડલ જીત્યો. આ જીત સાથે તેઓ કોમનવેલ્થ ગેમ્સના પેરા એથ્લેટિક્સમાં ગોલ્ડ જીતનાર પ્રથમ ભારતીય મહિલા એથ્લીટ બની ગઈ. તેમની જીતે ભારતની લગભગ બે દાયકાની રાહનો પણ અંત લાવ્યો. કેનડા, ઇંગ્લેન્ડ, વેલ્સ, ઘાના અને ઓસ્ટ્રેલિયા જેવી મજબૂત સ્પર્ધકો સામે શર્મિલાએ શાનદાર પ્રદર્શન કરીને દેશને ગૌરવ અપાવ્યું.
કોણ છે શર્મિલા ધનખડ?
શર્મિલા ધનખડનો જન્મ 15 ઓગસ્ટ, 1986ના રોજ હરિયાણાના રેવાડી જિલ્લામાં થયો હતો. માત્ર બે વર્ષની ઉંમરે તેમને ભારે તાવ બાદ પોલિયો થયો, જેના કારણે તેમનો ડાબો પગ કાયમ માટે પ્રભાવિત થયો.
તેમનો ઉછેર અત્યંત સામાન્ય અને આર્થિક રીતે નબળા પરિવારમાં થયો હતો. તેમની માતા દ્રષ્ટિહીન હતી જ્યારે પિતા ખેડૂત હતા. મુશ્કેલ પરિસ્થિતિ હોવા છતાં પરિવારે તેમને હિંમત આપવાનું ક્યારેય છોડ્યું નહીં.
દહેજ માટે સહન કર્યા અત્યાચાર
માત્ર 18 વર્ષની ઉંમરે શર્મિલાના પ્રથમ લગ્ન થયા. લગ્ન પછી તેમને દહેજ માટે સતત માનસિક અને શારીરિક હેરાનગતિનો સામનો કરવો પડ્યો. વર્ષો સુધી ઘરેલુ હિંસા સહન કર્યા બાદ જ્યારે તેઓ 26 વર્ષની હતી ત્યારે તેમના પ્રથમ પતિએ તેમને ઘરેથી કાઢી મૂક્યા. તે સમયે તેમની બે દીકરીઓ હતી. શર્મિલા પોતાની બંને દીકરીઓ સાથે પિતાના ઘરે પરત ફરી અને ત્યાંથી જીવનનો નવો સંઘર્ષ શરૂ કર્યો.
પરિવાર ચલાવવા કર્યું આયાનું કામ
તલાક બાદ પરિવાર પર ભાર ન બને તે માટે શર્મિલાએ અનેક નાના-મોટા કામ કર્યા. તેમણે હોસ્પિટલ અને અન્ય સ્થળોએ આયા તરીકે પણ કામ કર્યું, જેથી બંને દીકરીઓનું પાલન-પોષણ કરી શકે.
આ સમયગાળો તેમના જીવનનો સૌથી કઠિન હતો, પરંતુ તેમણે હિંમત ગુમાવી નહીં.
બીજી લગ્નજીવનથી બદલાયું નસીબ
28 વર્ષની ઉંમરે શર્મિલાએ અજીત સિંહ સાથે બીજા લગ્ન કર્યા. અજીત સિંહે તેમની પ્રતિભાને ઓળખી અને પેરા એથ્લેટિક્સમાં કારકિર્દી બનાવવા પ્રોત્સાહિત કર્યા.
ત્યારબાદ તેઓ રાવ તુલારામ સ્ટેડિયમમાં તાલીમ લેવા પહોંચ્યા, જ્યાં તેમના સંબંધીએ અને પેરા એથ્લીટ ટેકચંદે કોચ તરીકે માર્ગદર્શન આપ્યું.
શરૂઆતમાં તેઓ શોટ પુટમાં માત્ર 5 મીટર સુધી જ થ્રો કરી શકતા હતા, પરંતુ સતત મહેનતથી ઝડપથી પોતાનું પ્રદર્શન સુધાર્યું.
મહેનતે અપાવી મોટી સફળતા
માત્ર એક વર્ષની અંદર શર્મિલાએ રાષ્ટ્રીય ચેમ્પિયનશિપમાં ગોલ્ડ મેડલ જીત્યો અને 7.40 મીટરનો નવો રાષ્ટ્રીય રેકોર્ડ બનાવ્યો.
ત્યારબાદ તેમની કારકિર્દી સતત આગળ વધી.
કોમનવેલ્થ ગેમ્સ 2022 (બર્મિંગહામ): F57 શોટ પુટમાં ચોથું સ્થાન, 8.43 મીટરનો થ્રો અને સુધારેલો નેશનલ રેકોર્ડ.
2025 ઇન્ડિયન ઓપન પેરા એથ્લેટિક્સ ચેમ્પિયનશિપ (બેંગલુરુ): 9.77 મીટર સાથે ગોલ્ડ મેડલ.
2026 ફઝ્ઝા ઇન્ટરનેશનલ પેરા એથ્લેટિક્સ ચેમ્પિયનશિપ (દુબઈ): F57 શોટ પુટમાં ગોલ્ડ અને ડિસ્કસ થ્રોમાં બ્રોન્ઝ મેડલ.
કોમનવેલ્થ ગેમ્સ 2026: 9.81 મીટરના થ્રો સાથે ઐતિહાસિક ગોલ્ડ.
પરિવાર બન્યો સૌથી મોટો સહારો
શર્મિલાના જીવનમાં તેમના બીજા પતિ અજીત સિંહ અને બંને દીકરીઓ સૌથી મોટા પ્રેરણાસ્ત્રોત રહ્યા છે. તેમની મહેનત અને સંઘર્ષથી પ્રેરાઈ બંને દીકરીઓએ પણ રમતગમતમાં રસ લીધો છે.
કેમ ખાસ છે શર્મિલાની સફળતા?
શર્મિલા ધનખડની સફર માત્ર રમતગમતની જીત નથી, પરંતુ મુશ્કેલ પરિસ્થિતિ સામે લડવાની પ્રેરણાદાયી કહાની છે. પોલિયોથી શરૂ થયેલી મુશ્કેલીઓ, દહેજના અત્યાચાર, ઘરેલુ હિંસા અને ગરીબી વચ્ચે પણ તેમણે હિંમત હારી નહીં. આજે તેમની સફળતા લાખો મહિલાઓ અને દિવ્યાંગ ખેલાડીઓ માટે પ્રેરણાનું પ્રતિક બની છે.
