Commonwealth Games 2026: સ્કોટલેન્ડના ગ્લાસગોમાં ચાલી રહેલી કોમનવેલ્થ ગેમ્સ 2026માં ભારતીય ખેલાડીઓનું શાનદાર પ્રદર્શન યથાવત્ છે. ભારતને સ્પર્ધાના શરૂઆતના દિવસોમાં જ વધુ એક મોટી સફળતા મળી છે. મહિલા 53 કિલોગ્રામ વેઈટલિફ્ટિંગ સ્પર્ધામાં જ્ઞાનેશ્વરી યાદવે કુલ 199 કિલોગ્રામ વજન ઉઠાવી સિલ્વર મેડલ પોતાના નામે કર્યો છે. આ સાથે ભારતના ખાતામાં કુલ પાંચમો મેડલ ઉમેરાયો છે, જ્યારે વેઈટલિફ્ટિંગમાં આ ચોથો મેડલ છે. જ્ઞાનેશ્વરીએ સ્નેચ અને ક્લીન એન્ડ જર્ક બંને વિભાગમાં ઉત્કૃષ્ટ પ્રદર્શન કરીને વિશ્વસ્તરની ખેલાડીઓ સામે જબરદસ્ત પડકાર ઊભો કર્યો હતો. જોકે અંતે નાઈજીરિયાની ઓનોમે ઓમોલોલા ડિડીહે ગેમ્સ અને કોમનવેલ્થ રેકોર્ડ સાથે ગોલ્ડ મેડલ જીતવામાં સફળ રહી.
સ્નેચમાં ગેમ્સ રેકોર્ડ, કુલ 199 કિલોગ્રામ સાથે સિલ્વર
જ્ઞાનેશ્વરી યાદવે મહિલા 53 કિલોગ્રામ વર્ગમાં સ્નેચ વિભાગમાં 88 કિલોગ્રામ વજન સફળતાપૂર્વક ઉઠાવ્યું, જે કોમનવેલ્થ ગેમ્સનો નવો રેકોર્ડ બન્યો. ત્યારબાદ ક્લીન એન્ડ જર્કમાં તેણે પ્રથમ પ્રયાસમાં 103 કિલોગ્રામ, બીજા પ્રયાસમાં 107 કિલોગ્રામ અને અંતિમ પ્રયાસમાં 111 કિલોગ્રામ વજન સફળતાપૂર્વક ઉઠાવ્યું. આ રીતે કુલ 199 કિલોગ્રામ (88+111) સાથે તેણે સિલ્વર મેડલ સુનિશ્ચિત કર્યો. બીજી તરફ નાઈજીરિયાની ઓનોમે ઓમોલોલા ડિડીહેએ 93 કિલોગ્રામ સ્નેચ અને 113 કિલોગ્રામ ક્લીન એન્ડ જર્ક સહિત કુલ 206 કિલોગ્રામ વજન ઉઠાવી ગેમ્સ તથા કોમનવેલ્થનો નવો રેકોર્ડ બનાવતાં ગોલ્ડ મેડલ જીત્યો.
ભારતના ખાતામાં પાંચમો મેડલ
જ્ઞાનેશ્વરીના સિલ્વર સાથે ભારતે કોમનવેલ્થ ગેમ્સ 2026માં અત્યાર સુધી પાંચ મેડલ જીત્યા છે. આમાંથી ચાર મેડલ વેઈટલિફ્ટિંગમાં આવ્યા છે, જે ભારતીય વેઈટલિફ્ટરોના મજબૂત પ્રદર્શનની સાબિતી આપે છે. ભારત હવે મેડલ ટેલીમાં આઠમા ક્રમે પહોંચી ગયું છે. ઓસ્ટ્રેલિયા 17 ગોલ્ડ સહિત કુલ 39 મેડલ સાથે ટોચના સ્થાને છે.
આ પણ વાંચો: ગુજરાતે તોડ્યો 12 વર્ષ જૂનો રેકોર્ડ : એશિયન ગેમ્સમાં 9 ખેલાડીઓ કરશે ભારતનું પ્રતિનિધિત્વ
મીરાબાઈ ચાનુએ અપાવ્યો હતો પ્રથમ ગોલ્ડ
ભારત માટે કોમનવેલ્થ ગેમ્સની શરૂઆત જ ગોલ્ડન રહી હતી. સ્ટાર વેઈટલિફ્ટર મીરાબાઈ ચાનુએ મહિલા 48 કિલોગ્રામ વર્ગમાં કુલ 190 કિલોગ્રામ (85+105) વજન ઉઠાવી ભારતને પ્રથમ ગોલ્ડ મેડલ અપાવ્યો હતો.
આ ઉપરાંત ઋષિકાંત સિંહે 60 કિલોગ્રામ વર્ગમાં સિલ્વર જીત્યો હતો, જ્યારે રાજા મુથુપાંડીએ 65 કિલોગ્રામ વર્ગમાં પણ સિલ્વર મેડલ મેળવ્યો હતો. પેરા પાવરલિફ્ટિંગમાં ઝંડુ કુમારે બ્રોન્ઝ મેડલ જીતી ભારતના મેડલ ખાતામાં વધારો કર્યો હતો.
સંઘર્ષમાંથી ઊભી થયેલી ચેમ્પિયન
જ્ઞાનેશ્વરી યાદવની સફળતા પાછળ સંઘર્ષ અને મહેનતની પ્રેરણાદાયી કહાની છુપાયેલી છે. છત્તીસગઢના રાજનાંદગાંવની રહેવાસી જ્ઞાનેશ્વરીએ બાળપણથી જ વેઈટલિફ્ટિંગમાં રસ દાખવ્યો હતો. તેમના પિતા પોતે બોડીબિલ્ડર હતા, પરંતુ આર્થિક મુશ્કેલીઓને કારણે તેમને પોતાની રમત અધૂરી છોડીને ઇલેક્ટ્રિશિયન તરીકે કામ કરવું પડ્યું હતું. પિતાના માર્ગદર્શન હેઠળ જ્ઞાનેશ્વરીએ સતત મહેનત કરી અને જુનિયર સ્તરે અનેક રાષ્ટ્રીય તથા આંતરરાષ્ટ્રીય સ્પર્ધાઓમાં સફળતા મેળવી. તાજેતરમાં યોજાયેલી 2026 એશિયન વેઈટલિફ્ટિંગ ચેમ્પિયનશિપમાં પણ તેમણે સ્નેચમાં સિલ્વર અને કુલ પ્રદર્શનમાં બ્રોન્ઝ મેડલ જીતી પોતાની ક્ષમતાનો પરિચય આપ્યો હતો. હવે કોમનવેલ્થ ગેમ્સમાં મળેલો સિલ્વર તેમના કારકિર્દીનો વધુ એક મહત્વપૂર્ણ મુકામ માનવામાં આવી રહ્યો છે.
બોક્સિંગમાં પણ ભારતની આશા જીવંત
કોમનવેલ્થ ગેમ્સમાં ભારતીય બોક્સરોએ પણ શાનદાર શરૂઆત કરી છે. પુરુષોની 60 કિલોગ્રામ કેટેગરીમાં સચિન સિવાચે ઇંગ્લેન્ડના વિલિયમ હેવિટને 4-1થી હરાવી ક્વાર્ટર ફાઇનલમાં પ્રવેશ કર્યો છે. હવે તેમનો આગામી મુકાબલો બોત્સ્વાનાના ટ્રેઝર મોરેમી સામે થશે. 80 કિલોગ્રામ વર્ગમાં અંકુશે એન્ટિગુઆ અને બાર્બુડાના જલાન જાનને 5-0થી હરાવી અંતિમ-8માં સ્થાન મેળવી લીધું છે. ભારતીય બોક્સિંગ ટીમ પાસેથી હવે વધુ મેડલની આશા વ્યક્ત કરવામાં આવી રહી છે.
એથ્લેટિક્સ અને સ્વિમિંગમાં પણ સારું પ્રદર્શન
એથ્લેટિક્સમાં મુરલી શ્રીશંકરે પ્રથમ જ પ્રયાસમાં 8.01 મીટરની લાંબી છલાંગ લગાવી લોંગ જમ્પની ફાઇનલમાં સ્થાન મેળવ્યું છે. લોકેશ સત્યનાથને પણ 7.77 મીટર સાથે ફાઇનલમાં પ્રવેશ કર્યો છે. સ્વિમિંગમાં સાજન પ્રકાશે પુરુષોની 200 મીટર બટરફ્લાય સ્પર્ધાની ફાઇનલમાં સ્થાન મેળવ્યું છે. તેજસ શિર્સે પણ 110 મીટર હર્ડલ્સની ફાઇનલમાં પહોંચીને ભારતની મેડલ આશા જીવંત રાખી છે.
કેટલાક ખેલાડીઓ મેડલથી ચૂક્યા
આર્ટિસ્ટિક જિમ્નાસ્ટિક્સમાં પ્રતિષ્ઠા સામંતા મહિલા વૉલ્ટ ફાઇનલમાં 12.883 પોઈન્ટ સાથે સાતમા સ્થાને રહી હતી અને મેડલ જીતવામાં સફળ રહી નહોતી. જ્યારે ભારતના સૌથી ઝડપી દોડવીર ગણાતા ગુરિન્દરવીર સિંહ 100 મીટર હીટ્સમાં સારો સમય નોંધાવ્યા છતાં સેમિફાઇનલમાં સ્થાન મેળવી શક્યા નહોતા.
આ પણ વાંચો: જામનગરની ગુજરાત આયુર્વેદ યુનિવર્સિટીમાં પેપરલીકની આશંકા? : BAMS પરીક્ષા પહેલાં વોટ્સએપ પર વાયરલ મુદ્દાઓથી વિવાદ, તપાસ સમિતિ રચાઈ
આગામી દિવસોમાં વધુ મેડલની આશા
ભારત માટે આગામી દિવસો પણ અત્યંત મહત્વપૂર્ણ રહેશે. હાઈ જમ્પમાં તેજસ્વિન શંકર, સર્વેશ કુશારે અને જે. આદર્શ રામ મેડલ માટે પડકાર રજૂ કરશે. વેઈટલિફ્ટિંગમાં મહિલા 58 કિલોગ્રામ વર્ગમાં બિંદ્યારાની દેવી અને પુરુષોની 79 કિલોગ્રામ કેટેગરીમાં વી. અજયા બાબુ પણ ભારત માટે મેડલ જીતવાના દાવેદાર માનવામાં આવી રહ્યા છે. ભારતીય ખેલાડીઓના અત્યાર સુધીના પ્રદર્શનને જોતા રમતપ્રેમીઓમાં આશા વ્યક્ત કરવામાં આવી રહી છે કે કોમનવેલ્થ ગેમ્સ 2026માં ભારતનું મેડલ ટેલી આગામી દિવસોમાં વધુ મજબૂત બનશે અને અનેક ખેલાડીઓ દેશ માટે ગૌરવ વધારશે.
