T20 World Cup 2026: 8 માર્ચે અમદાવાદના નરેન્દ્ર મોદી સ્ટેડિયમમાં રમાયેલી T20 વર્લ્ડ કપ 2026ની ફાઈનલમાં ભારતે ન્યૂઝીલેન્ડને 96 રનથી હરાવીને ઈતિહાસ રચ્યો. આ જીત સાથે ભારત સતત બે વખત T20 વર્લ્ડ કપ જીતનાર અને ઘરઆંગણે આ ટ્રોફી જીતનાર પ્રથમ ટીમ બની ગયું. જો કે આ સફળતા પાછળ ટીમ મેનેજમેન્ટનો એક મહત્વનો નિર્ણય ટર્નિંગ પોઈન્ટ સાબિત થયો.
ટુર્નામેન્ટની શરૂઆતમાં ભારતીય ટીમ અનેક પડકારોનો સામનો કરી રહી હતી. કેટલાક ખેલાડીઓ ઈજામાંથી પાછા ફર્યા હતા તો કેટલાક ફોર્મમાં નહોતા. ટીમ ગ્રુપ સ્ટેજમાં મેચો જીતતી હતી, પરંતુ પ્રદર્શન સંપૂર્ણ રીતે વિશ્વાસજનક નહતું. ઘણી મેચોમાં ભારત વ્યક્તિગત ખેલાડીઓના પ્રદર્શનના આધારે જીતતું હતું.
ટીમના ટોપ ઓર્ડરમાં અનેક લેફ્ટ હેન્ડ બેટ્સમેન હોવાના કારણે વિરોધી ટીમોએ ભારત સામે ખાસ રણનીતિ બનાવવાનું શરૂ કર્યું. પરિણામે ભારતીય ટીમને મજબૂત શરૂઆત મળતી નહતી. સુપર 8માં સાઉથ આફ્રિકા સામે મળેલી હાર બાદ ટીમ માટે ટુર્નામેન્ટમાંથી બહાર થવાનો ખતરો પણ ઊભો થયો.
ગૌતમ ગંભીર અને સૂર્યકુમાર યાદવનો માસ્ટરસ્ટ્રોકઃ
આ જ સમયે હેડ કોચ ગૌતમ ગંભીર અને કેપ્ટન સૂર્યકુમાર યાદવે ટીમ કોમ્બિનેશનમાં મોટો ફેરફાર કરવાનો નિર્ણય લીધો. રિંકુ સિંહની જગ્યાએ સંજુ સેમસનને પ્લેઈંગ ઈલેવનમાં સામેલ કરવામાં આવ્યો. શરૂઆતમાં આ નિર્ણય જોખમી લાગતો હતો, કારણ કે વર્લ્ડ કપ પહેલા સેમસનનું ફોર્મ ખાસ નહતું.
સંજુ સેમસન બન્યો ભારતની T20 વર્લ્ડ કપ જીતનો હીરોઃ
ટીમ મેનેજમેન્ટનો આ નિર્ણય સંપૂર્ણ રીતે સફળ સાબિત થયો. તક મળતા જ સંજુ સેમસને ધમાકેદાર બેટિંગ શરૂ કરી. ઝિમ્બાબ્વે સામે ઝડપી 24 રન કર્યા બાદ તેણે સુપર 8માં વેસ્ટ ઈન્ડિઝ સામે 196 રનના ટાર્ગેટનો પીછો કરતા અણનમ 97 રનની મેચ વિનીંગ ઇનિંગ રમી. ત્યારબાદ સેમીફાઈનલમાં ઈંગ્લેન્ડ સામે પણ સંજુ સેમસને 89 રન બનાવીને ભારતને ફાઈનલમાં પહોંચાડવામાં મહત્વની ભૂમિકા ભજવી. ફાઈનલમાં ન્યૂઝીલેન્ડ સામે પણ સેમસને 89 રનની શાનદાર ઇનિંગ રમી અને ટીમ માટે જીતનો મજબૂત પાયો નાખ્યો.
પ્લેયર ઓફ ધ ટુર્નામેન્ટઃ
સંજુ સેમસને માત્ર પાંચ મેચોમાં 321 રન બનાવીને ટુર્નામેન્ટમાં ભારત માટે સૌથી વધુ રન બનાવ્યા. તેના આ અદભૂત પ્રદર્શન બદલ તેને પ્લેયર ઓફ ધ ટુર્નામેન્ટનો એવોર્ડ પણ આપવામાં આવ્યો. આ રીતે ગૌતમ ગંભીર અને સૂર્યકુમાર યાદવનો એક વ્યૂહાત્મક નિર્ણય આખા ટુર્નામેન્ટમાં ભારત માટે ગેમચેન્જર સાબિત થયો અને ટીમ ઈન્ડિયાને વર્લ્ડ ચેમ્પિયન બનાવી દીધું.
