Whichever team wins the final will make history: ભારતીય ટીમ રવિવારે (2 નવેમ્બર) ICC મહિલા ક્રિકેટ વર્લ્ડ કપ 2025ના ફાઇનલમાં સાઉથ આફ્રિકા સામે રમશે. આ મેચ નવી મુંબઈમાં ડૉ. ડીવાય પાટિલ સ્પોર્ટ્સ એકેડેમી ખાતે રમાશે. સાઉથ આફ્રિકાએ પ્રથમ સેમિફાઇનલમાં ઇંગ્લેન્ડને 125 રનથી હરાવીને ફાઇનલમાં પ્રવેશ કર્યો હતો, અને હરમનપ્રીત કૌરના નેતૃત્વ હેઠળની ભારતીય ટીમે બીજા સેમિફાઇનલમાં ઓસ્ટ્રેલિયાને 5 વિકેટથી હરાવીને ફાઇનલમાં પ્રવેશ કર્યો. હજુ સુધી ભારતીય મહિલા ટીમ અને સાઉથ આફ્રિકન મહિલા મહિલા વર્લ્ડ કપ જીતી શકી નથી. જે પણ ટીમ ફાઇનલ જીતશે તે ટીમ ઇતિહાસ રચશે. ફાઇનલ ભારતીય સમય મુજબ બપોરે 3:00 વાગ્યે શરૂ થશે.
વરસાદની શક્યતા 63%
ભારત અને સાઉથ આફ્રિકા વચ્ચેની ફાઇનલ મેચ દરમિયાન વરસાદનો ભય વધુ મંડરાઈ રહ્યો છે. મીડિયા રિપોર્ટ મુજબ, 2 નવેમ્બરે નવી મુંબઈમાં વરસાદની શક્યતા 63% ની છે. રવિવારે સવારે નવી મુંબઈ વાદળછાયું રહેશે. ત્યારપછી, બપોરે વાદળો અને સૂર્યપ્રકાશ વચ્ચે રમતિયાળ રમત જોવા મળી શકે છે, જેમાં વરસાદની શક્યતા છે.
શું ફાઇનલ માટે કોઈ રિઝર્વ ડે છે?
હવે, ફેન્સ વિચારી રહ્યા છે કે, જો રવિવારે મેચ વરસાદથી રદ થાય તો શું થશે? જો ફાઇનલ 2 નવેમ્બરના રોજ સમાપ્ત ન થાય, તો ચિંતા કરવાની કોઈ જરૂર નથી. ICC (આંતરરાષ્ટ્રીય ક્રિકેટ કાઉન્સિલ) એ ફાઇનલ મેચ માટે રિઝર્વ ડે નક્કી કર્યો છે. જો રવિવારે વરસાદ કે, કોઈ અન્ય કારણોસર 20 ઓવરની રમત શક્ય ન બને, તો મેચ રિઝર્વ ડે (3 નવેમ્બર) માં ખસેડવામાં આવશે.
જો રિઝર્વ ડેના દિવસે પણ વરસાદ પડે તો શું?
જોકે, સોમવાર, ૩ નવેમ્બરના રોજ નવી મુંબઈમાં વરસાદની શક્યતા 55% છે. સોમવારે નવી મુંબઈમાં મોટાભાગે વાદળછાયું વાતાવરણ રહેશે, ક્યારેક ક્યારેક વરસાદ પડવાની શક્યતા છે. રિઝર્વ ડે પર મેચ જ્યાંથી અટકી હતી ત્યાંથી ફરી શરૂ થશે. ફાઇનલમાં ટોસ થયા પછી, મેચને લાઇવ ગણવામાં આવશે. જો રિઝર્વ ડે પર વરસાદના કારણે રમતમાં ખલેલ પડે અને ઓછામાં ઓછી 20 ઓવર પૂર્ણ ન થઈ શકે, તો ભારત અને સાઉથ આફ્રિકાને સંયુક્ત વિજેતા જાહેર કરવામાં આવશે. જેમ 2002માં ભારત અને શ્રીલંકાને ICC મેન્સ ચેમ્પિયન્સ ટ્રોફીના સંયુક્ત વિજેતા જાહેર કરવામાં આવ્યા હતા.
ભારતની સંપૂર્ણ ટીમઃ
શેફાલી વર્મા, સ્મૃતિ મંધાના, અમનજોત કૌર, હરમનપ્રીત કૌર (કેપ્ટન), જેમિમાહ રોડ્રિગ્સ, દીપ્તિ શર્મા, રિચા ઘોષ (વિકેટકીપર), રાધા યાદવ, ક્રાંતિ ગૌડ, શ્રી ચરાણી, રેણુકા સિંહ ઠાકુર, સ્નેહ રાણા, અરુંધતી રેડ્ડી, હરલીન દેઓલ, ઉમા છેત્રી (વિકેટકીપર).
સાઉથ આફ્રિકાની ટીમ:
લૌરા વોલ્વાર્ડ (કેપ્ટન), તઝમીન બ્રિટસ, સુને લુસ, એનીરી ડેર્કસન, એન્નેકે બોશ, મેરિઝાન કેપ, સિનાલો જાફતા (વિકેટકીપર), ક્લો ટ્રાયન, નાદીન ડી ક્લાર્ક, આયબોંગા ખાકા, નોનકુલુલેકો મ્લાબા, તુમી સેખુખુને, નોન્ડુમિસુ શાંગાસે, કારબો મેસો, મસાબતા ક્લાસ.
