સમગ્ર ઉત્તર ભારતથી લઈને પૂર્વી ભારત સુધી કુદરતી આફત જેવી સ્થિતિ સર્જાઈ રહી છે. હવામાન વિભાગે તાજેતરમાં ચિંતાજનક એલર્ટ જાહેર કરતા જણાવ્યું છે કે આવતીકાલે એટલે કે 21 માર્ચના રોજ દિલ્હી, ઉત્તર પ્રદેશ અને હરિયાણા સહિત દેશના 17 રાજ્યોમાં વરસાદ અને જોરદાર વાવાઝોડું ત્રાટકી શકે છે. આ બદલાતા હવામાનને કારણે લોકોને અત્યંત સાવધ રહેવાની અપીલ કરવામાં આવી છે. અંદાજે 10થી વધુ રાજ્યોમાં કરા પડવાની પણ શક્યતા છે, જેનાથી ખેતીના પાકને મોટું નુકસાન થઈ શકે છે.
હવામાન વિભાગના રિપોર્ટ અનુસાર, આ વરસાદને કારણે ઉત્તર ભારતના અનેક વિસ્તારોમાં તાપમાનનો પારો ગગડીને 25 ડિગ્રી સેલ્સિયસની આસપાસ પહોંચી જશે. ખાસ કરીને 23 જિલ્લાઓ એવા છે જ્યાં વરસાદ અને તોફાનની અસર સૌથી વધુ જોવા મળશે. પૂર્વી ભારતમાં ખેડૂતોને વીજળી પડવાની ઘટનાઓથી સાવચેત રહેવા જણાવાયું છે. પશ્ચિમ અને પૂર્વી ઉત્તર પ્રદેશમાં 30 થી 40 કિલોમીટર પ્રતિ કલાકની ઝડપે પવન ફૂંકાવાની સાથે હળવોથી મધ્યમ વરસાદ પડી શકે છે.
દિલ્હી અને એનસીઆરની સ્થિતિ:
રાજધાની દિલ્હીમાં પણ આવતીકાલે હવામાનમાં મોટો પલટો આવશે. સવારના સમયે 40 થી 50 કિલોમીટરની ઝડપે ફૂંકાતા પવન સાથે વરસાદની શક્યતા છે. આનંદ વિહાર, લક્ષ્મી નગર અને આઈટીઓ જેવા વિસ્તારોમાં ભારે વરસાદની ચેતવણી આપવામાં આવી છે. દિલ્હીમાં મહત્તમ તાપમાન 26 ડિગ્રી અને લઘુત્તમ તાપમાન 15 ડિગ્રી સેલ્સિયસ રહેવાનો અંદાજ છે.
રાજ્યવાર હવામાનની વિગત:
ઉત્તર પ્રદેશ: મેરઠ, ગૌતમબુદ્ધ નગર અને ગોરખપુર સહિતના જિલ્લાઓમાં ભારે વરસાદ અને 60 કિલોમીટરની ઝડપે આંધિ આવી શકે છે.
બિહાર: પટના, પૂર્ણિયા અને કિશનગંજ જેવા જિલ્લાઓમાં મુસળધાર વરસાદ અને વાવાઝોડાનું એલર્ટ છે. પટનામાં તાપમાન 23 ડિગ્રી સુધી નીચું જઈ શકે છે.
હરિયાણા અને પંજાબ: ગુરુગ્રામ, રોહતક, અમૃતસર અને લુધિયાણામાં વરસાદ કહેર વર્તાવી શકે છે. ચંદીગઢમાં લઘુત્તમ તાપમાન 13 ડિગ્રી રહેવાની શક્યતા છે.
રાજસ્થાન અને પહાડી રાજ્યો: જયપુર સહિતના વિસ્તારોમાં ભારે વરસાદની આગાહી છે. જ્યારે હિમાચલના મનાલીમાં તાપમાન માઈનસ 8 ડિગ્રી સુધી પહોંચી શકે છે.
ગુજરાત: ગુજરાતમાં પણ આગામી 21 માર્ચ 2026 સુધી કમોસમી વરસાદ (માવઠું) અને તેજ પવનનું સંકટ તોળાઈ રહ્યું છે. રાજ્યના કૃષિ વિભાગે આ અંગે ખેડૂતો માટે વિશેષ માર્ગદર્શિકા પણ જાહેર કરી છે.
દક્ષિણ ભારતમાં પણ આંધ્ર પ્રદેશ, તેલંગાણા અને કર્ણાટકમાં વીજળીના કડાકા-ભડાકા સાથે વરસાદી માહોલ રહેશે. જ્યારે મહારાષ્ટ્રના મરાઠવાડામાં પણ આગામી કેટલાક દિવસો સુધી વાદળછાયું વાતાવરણ અને હળવા વરસાદની શક્યતા છે.
