Goa Night Club Fire: ગત રવિવારે ગોવાના પ્રખ્યાત Birch by Romeo Lane નાઇટક્લબમાં લાગેલી ભીષણ આગમાં 25 લોકો જીવતા બળી ગયા હતા. આ કેસમાં, ક્લબના માલિકો, લુથરા બ્રધર્સ સૌરભ લુથરા અને ગૌરવ લુથરાને દિલ્હીની રોહિણી કોર્ટ તરફથી ઝટકો મળ્યો છે. થાઇલેન્ડ ભાગી ગયેલા લુથરા ભાઈઓએ તેમની આગોતરા અરજીમાં પોતાને પીડિત ગણાવ્યા છે. તેમણે દાવો કર્યો હતો કે તેમને કોઈ પણ આધાર વિના આરોપી બનાવવામાં આવી રહ્યા છે. કોર્ટે તેમની આગોતરા અરજી ફગાવી દીધી હતી.
દિલ્હીની એક કોર્ટમાં આગોતરા જામીન અરજીમાં, બંને ભાઈઓએ દાવો કર્યો હતો કે તેઓ પણ આગ દુર્ઘટનાના "પીડિતો" હતા. મીડિયા અહેવાલ મુજબ, અરજીમાં તેમની સામે દાખલ કરાયેલા કેસમાં ધરપકડથી રક્ષણની માંગ કરવામાં આવી હતી.
લુથરા બ્રધર્સને કોર્ટમાંથી આંચકો લાગ્યો
દિલ્હીની રોહિણી કોર્ટે લુથરા બ્રધર્સ દ્વારા દાખલ કરાયેલી આગોતરા જામીન અરજી પર ગોવા સરકાર પાસેથી જવાબ માંગ્યો છે. કોર્ટે લુથરા બ્રધર્સને વચગાળાની રાહત આપવાનો ઇનકાર કર્યો હતો. કોર્ટે ટ્રાન્ઝિટ આગોતરા જામીન અરજી પર તાત્કાલિક નિર્ણય આપવાનો ઇનકાર કર્યો હતો અને આ મામલાની વધુ સુનાવણી માટે તારીખ નક્કી કરી છે.
બંને ભાઈઓ થાઈલેન્ડ ભાગી ગયા
આ કેસમાં ધરપકડના ડરથી, બંને ભાઈઓ થાઈલેન્ડ ભાગી ગયા. દરમિયાન, તેમના વતી દિલ્હીની એક કોર્ટમાં આગોતરા જામીન અરજી દાખલ કરવામાં આવી હતી, જેમાં ભારત પાછા ફરવાની પરમીશન અને આગોતરા જામીન માંગવામાં આવ્યા હતા. અરજીમાં, તેઓએ દાવો કર્યો હતો કે "અકસ્માત સમયે અમે હાજર નહોતા અને જવાબદાર નથી."
અરજી મુજબ, લુથરા બ્રધર્સએ દલીલ કરી હતી કે ઘટના સમયે તેઓ નાઈટક્લબમાં હાજર ન હતા અને તેથી તેમને ફોજદારી રીતે જવાબદાર ઠેરવી શકાય નહીં. તેમના ભાગીદારો અને મેનેજરો ક્લબનું સંચાલન કરે છે.
લુથરા બ્રધર્સનું પ્રતિનિધિત્વ કરતા વકીલ તનવીર અહેમદ મીરે કોર્ટને જણાવ્યું હતું કે લુથરા પરિવારના ત્રણ બિઝનેસ પાર્ટનર છે. તેઓ અનેક એકમો ચલાવે છે અને કોઈપણ પેઢીના રોજિંદા કામકાજનું વ્યક્તિગત રીતે નિરીક્ષણ કરતા નથી. ફ્રેન્ચાઇઝ મેનેજરો રોજિંદા કામકાજ સંભાળે છે. જે નાઈટક્લબમાં આગ લાગી હતી તે પણ આવી જ રીતે કાર્યરત છે.
અરજીમાં દલીલ કરવામાં આવી હતી કે જો કોઈ અન્ય સ્થળે અકસ્માત થાય છે, તો માલિકો પર ગુનાહિત જવાબદારી લાદી શકાતી નથી. જવાબદારી તે લોકોની છે જેઓ કામગીરીના હવાલામાં હતા, એટલે કે, ભાગીદારો અથવા મેનેજરો. નોંધનીય છે કે આ મામલે વધુ તપાસ ચાલુ છે.
