રશિયાના રાષ્ટ્રપતિ વ્લાદિમિર પુતિન અત્યારે ભારત પ્રવાસે છે ત્યારે તેમનો વર્ષ 2002 દરમિયાન રેકોર્ડ થયેલો એક જૂનો ઈન્ટરવ્યુ સોશિયલ મીડિયા પર ફરી ચર્ચાનું કેન્દ્ર બન્યો છે. આ બે દાયકા જૂના વીડિયોમાં પુતિને જે વાતો કરી હતી તે વર્તમાન સમયમાં એકદમ સચોટ સાબિત થઈ રહી છે. તે સમયે તેમણે ઈરાકના હથિયારો ઉપરાંત પાકિસ્તાનની શંકાસ્પદ ભૂમિકા અને આતંકવાદી ઓસામા બિન લાદેન અંગે જે મંતવ્યો રજૂ કર્યા હતા તે આજે હકીકત બની ગયા છે.
વર્ષ 2002માં જ્યારે અમેરિકા અને તેના મિત્ર દેશોએ ઈરાક પર હુમલો કર્યો હતો ત્યારે એવો દાવો કરવામાં આવ્યો હતો કે સદ્દામ હુસેન વિનાશક હથિયારો એટલે કે વેપન્સ ઓફ માસ ડિસ્ટ્રક્શન છુપાવી રહ્યા છે. આ ગંભીર મુદ્દા પર એનડીટીવી સાથેની વાતચીતમાં પુતિને ખૂબ જ સમતુલિત જવાબ આપ્યો હતો. તેમણે કહ્યું હતું કે રશિયા પણ એવું માને છે કે ઈરાક પાસે આવા ખતરનાક હથિયારો ન હોવા જોઈએ અને દુનિયાએ તેની ખાતરી કરવી જોઈએ.
જોકે પુતિને તે સમયે જ ચેતવણી આપી હતી કે માત્ર ઈરાક જ ચિંતાનો વિષય નથી પણ દુનિયાએ પાકિસ્તાન તરફ પણ જોવાની જરૂર છે. તેમણે સ્પષ્ટ શબ્દોમાં કહ્યું હતું કે પાકિસ્તાન પાસે રહેલા હથિયારોની સ્થિતિ પર ધ્યાન આપવું અનિવાર્ય છે. પુતિનનું માનવું હતું કે પાકિસ્તાનના હથિયારો કઈ હાલતમાં છે અને ભવિષ્યમાં તેનો શું ઉપયોગ થશે તે જાણવું જરૂરી છે. પુતિનની આ વાતના માત્ર બે વર્ષ બાદ એટલે કે 2004માં પાકિસ્તાનના પરમાણુ કાર્યક્રમના જનક ગણાતા એક્યુ ખાને સ્વીકાર્યું હતું કે તેમણે પરમાણુ ટેકનોલોજી દુનિયામાં ફેલાવી હતી.
આ ઈન્ટરવ્યુમાં જ્યારે પુતિનને પૂછવામાં આવ્યું હતું કે શું ઓસામા બિન લાદેન પાકિસ્તાનમાં છુપાયેલો હોઈ શકે છે ત્યારે તેમણે ખૂબ જ તાર્કિક જવાબ આપ્યો હતો. રશિયન રાષ્ટ્રપતિએ કહ્યું હતું કે પાકિસ્તાન તાલિબાનને સમર્થન આપે છે તે વાત આખી દુનિયા જાણે છે અને ઓસામા બિન લાદેન તાલિબાન સિસ્ટમનો જ એક ભાગ છે. આ વાતના લગભગ નવ વર્ષ બાદ 2011માં અમેરિકન નેવી સીલ્સ કમાન્ડોએ પાકિસ્તાનના એબટાબાદમાં ઘૂસીને ઓસામાને ઠાર માર્યો હતો. આમ પુતિનની શંકા એકદમ સાચી પડી હતી.
પુતિને તે સમયે ભારત અને રશિયાના સંબંધો વિશે વાત કરતા કહ્યું હતું કે અમારી મિત્રતા કોઈ ત્રીજા દેશની વિરુદ્ધમાં નથી પણ ભારત સાથે મજબૂત સંબંધો જાળવી રાખવા માટે છે. આજે 23 વર્ષ બાદ પણ સ્થિતિ એવી જ છે અને પુતિન ફરી એકવાર ભારતના પ્રવાસે આવ્યા છે જ્યાં તેઓ વડાપ્રધાન નરેન્દ્ર મોદી સાથે ડિફેન્સ અને ટ્રેડ જેવા મહત્વના વિષયો પર ચર્ચા કરશે.
