કોહલી ભારતની સૌથી વેલ્યુએબલ પર્સનાલિટી : શાહરૂખ ખાન અને પ્રિયંકા ચોપરાને પાછળ છોડી મેળવ્યું નંબર 1 સ્થાન

કોહલી ભારતની સૌથી વેલ્યુએબલ પર્સનાલિટી: બ્રાન્ડ વેલ્યુ ₹3542 કરોડ

ભારતીય ક્રિકેટ ટીમના પૂર્વ કેપ્ટન અને સ્ટાર બેટ્સમેન વિરાટ કોહલી (Virat Kohli) મેદાનની બહાર પણ કિંગ સાબિત થયા છે. દેશની સૌથી વેલ્યુએબલ પર્સનાલિટીઝ (Most Valuable Celebrities) ની યાદીમાં વિરાટ કોહલી પ્રથમ સ્થાને પહોંચી ગયા છે. સત્તાવાર આંકડા અનુસાર, કોહલીની બ્રાન્ડ વેલ્યુ આશરે 3,542 કરોડ રૂપિયા આંકવામાં આવી છે. આ યાદીમાં બોલિવૂડના બાદશાહ શાહરૂખ ખાન બીજા ક્રમે અને ગ્લોબલ આઇકોન પ્રિયંકા ચોપરા જોનાસ ત્રીજા ક્રમે છે.

ફોર્ચ્યુન ઇન્ડિયા અને ઇન્ટરબ્રાન્ડનો પ્રથમ સંયુક્ત અભ્યાસ

પ્રખ્યાત બિઝનેસ મેગેઝિન 'ફોર્ચ્યુન ઇન્ડિયા' (Fortune India) અને વૈશ્વિક બ્રાન્ડ કન્સલ્ટન્સી ફર્મ 'ઇન્ટરબ્રાન્ડ' (Interbrand) દ્વારા સંયુક્ત રીતે દેશની 25 સૌથી મૂલ્યવાન સેલિબ્રિટીઝ પર એક વિશેષ સંશોધન કરવામાં આવ્યું હતું. આ પ્રતિષ્ઠિત લિસ્ટના ટોપ 10 માં ક્રિકેટ જગતના 3 દિગ્ગજો અને સિનેમા જગતના 7 સેલિબ્રિટીઝે પોતાનું સ્થાન મેળવ્યું છે.

ટોપ 10 સેલિબ્રિટીઝ અને તેમની બ્રાન્ડ વેલ્યુ

1. વિરાટ કોહલી – ₹3,542 કરોડ (ક્રિકેટ)

2. શાહરૂખ ખાન – ₹3,017 કરોડ (બોલિવૂડ)

3. પ્રિયંકા ચોપરા જોનાસ – ₹2,507 કરોડ (બોલિવૂડ/હોલિવૂડ)

4. મહેન્દ્ર સિંહ ધોની (ક્રિકેટ)

5. રણવીર સિંહ (બોલિવૂડ)

6. અક્ષય કુમાર (બોલિવૂડ)

7. અમિતાભ બચ્ચન (બોલિવૂડ)

8. સચિન તેંડુલકર (ક્રિકેટ)

9. આલિયા ભટ્ટ (બોલિવૂડ)

10. અલ્લુ અર્જુન (સાઉથ સિનેમા)

મહિલા સેલિબ્રિટીઝમાં પ્રિયંકા ચોપરા ટોપ પર

આ યાદીમાં મહિલા સેલિબ્રિટીઝની વાત કરીએ તો પ્રિયંકા ચોપરા સમગ્ર દેશમાં સૌથી મોખરે છે અને ઓવરઓલ ત્રીજા સ્થાને છે. આ સિવાય ટોપ 25 ના લિસ્ટમાં દીપિકા પાદુકોણ (11મું સ્થાન) અને સાઉથની નેશનલ ક્રશ રશ્મિકા મંદાના (17મું સ્થાન) મેળવવામાં સફળ રહી છે. બોલિવૂડ અભિનેત્રી કૃતિ સેનન, દક્ષિણ ભારતની 'લેડી સુપરસ્ટાર' નયનતારા અને ભારતીય મહિલા ક્રિકેટ ટીમની સ્ટાર ઓપનર સ્મૃતિ મંધાનાએ પણ આ યાદીમાં જગ્યા બનાવી છે. આ ઉપરાંત ગાયક દિલજીત દોસાંઝ, અર્જિત સિંહ, ફિલ્મમેકર કરણ જોહર, પૂર્વ ક્રિકેટર સૌરવ ગાંગુલી અને અભિનેતા વિકી કૌશલ પણ આ લિસ્ટનો ભાગ છે.

બ્રાન્ડ વેલ્યુ કઈ રીતે નક્કી કરવામાં આવે છે?

આ રિપોર્ટમાં સેલિબ્રિટીઝની બ્રાન્ડ વેલ્યુ માત્ર તેમની વાર્ષિક કમાણી, સોશિયલ મીડિયા ફોલોઅર્સ કે ફિલ્મોની બોક્સ ઓફિસ સક્સેસના આધારે નક્કી કરવામાં આવી નથી. આ માટે પર્સનલ બ્રાન્ડને એક આર્થિક સંપત્તિ તરીકે ગણીને 6 મુખ્ય પાસાઓ પર રિસર્ચ કરવામાં આવ્યું હતું:

• વિશિષ્ટતા (Distinctiveness): સેલિબ્રિટી અન્ય લોકોથી કેટલી અલગ ઓળખ ધરાવે છે.

• તાલમેલ (Coherence): બ્રાન્ડ એન્ડોર્સમેન્ટ સાથે તેમનો તાલમેલ કેવો છે.

• જોડાણ અને વિશ્વાસ (Engagement & Trust): ફેન્સ અને ગ્રાહકો સાથે તેમનું જોડાણ અને ભરોસો કેટલો મજબૂત છે.

• આત્મીયતા અને જવાબદારી (Affinity & Responsibility): સમાજ પ્રત્યે તેમની આત્મીયતા અને જવાબદારીની ભાવના કેવી છે.

આ તમામ પરિબળોને સંયુક્ત રીતે માપીને સેલિબ્રિટીની આખરી બ્રાન્ડ વેલ્યુ નક્કી કરવામાં આવી છે, જેમાં વિરાટ કોહલીની ડિજિટલ રીચ અને બ્રાન્ડ લોયલ્ટી સૌથી વધુ નોંધાઈ છે.