Rashmika-Vijay Reception: સાઉથ સુપરસ્ટાર વિજય દેવરકોંડા અને રશ્મિકા મંદાનાના લગ્નની ચર્ચાઓ વચ્ચે હવે તેમના ભવ્ય રિસેપ્શનની તૈયારીઓ તેજ થઈ ગઈ છે. ૨૬ ફેબ્રુઆરીના રોજ ઉદયપુરમાં અત્યંત ખાનગી રીતે લગ્ન કર્યા બાદ, આ નવદંપતી હવે ૪ માર્ચે હૈદરાબાદમાં એક શાનદાર વેડિંગ રિસેપ્શન યોજવા જઈ રહ્યું છે. રવિવારે જારી કરાયેલા સત્તાવાર નિવેદન અનુસાર, આ સેલિબ્રેશન મનોરંજન જગતના સિતારાઓથી ઝગમગી ઉઠશે. જોકે, હાઈ-પ્રોફાઈલ મહેમાનોની સુરક્ષાને ધ્યાનમાં રાખીને કપલે એક મોટો નિર્ણય લીધો છે. રિસેપ્શન વેન્યુ પર માત્ર તે જ લોકોને પ્રવેશ મળશે જેમની પાસે સત્તાવાર આમંત્રણ પત્ર હશે. સુરક્ષાના કારણોસર મહેમાનોની યાદી પણ મર્યાદિત રાખવામાં આવી છે, જેથી આ ખાસ સાંજને કોઈપણ ખલેલ વગર યાદગાર બનાવી શકાય.
વિજય અને રશ્મિકાના આ રિસેપ્શનમાં માત્ર તેલુગુ ફિલ્મ ઇન્ડસ્ટ્રી જ નહીં, પરંતુ હિન્દી, તમિલ, મલયાલમ અને કન્નડ સિનેમાના દિગ્ગજ કલાકારો પણ હાજરી આપશે. આ ઉપરાંત રાજકીય અને વહીવટી ક્ષેત્રના મહાનુભાવો પણ નવદંપતીને આશીર્વાદ આપવા પહોંચશે.
કડક સુરક્ષા અને 'નો ઇન્વિટેશન-નો એન્ટ્રી'
રિસેપ્શનમાં આવનારી હાઈ-પ્રોફાઈલ હસ્તીઓને જોતા સ્થાનિક પોલીસ અને સુરક્ષા એજન્સીઓ સાથે મળીને ખાસ વ્યવસ્થા કરવામાં આવી છે. કપલે સ્પષ્ટ કર્યું છે કે ભીડને નિયંત્રિત કરવા માટે પ્રવેશ દ્વાર પર કડક ચેકિંગ કરવામાં આવશે. વેલિડ ઓફિશિયલ ઇન્વિટેશન કાર્ડ વિના કોઈને પણ વેન્યુની અંદર પ્રવેશવા દેવામાં આવશે નહીં.
ચાહકોને કરી ખાસ અપીલ
પોતાના ફેન્સનો આભાર માનતા વિજય અને રશ્મિકાએ કહ્યું કે, "તમારા અતૂટ પ્રેમ અને સપોર્ટ માટે અમે દિલથી આભારી છીએ. તમારી સુરક્ષા અને ખુશી અમારા માટે સર્વોપરી છે. અમે ઈચ્છીએ છીએ કે આ સેલિબ્રેશન શાંતિપૂર્ણ અને સુરક્ષિત રીતે સંપન્ન થાય, જેમાં તમે અમને સહકાર આપશો તેવી આશા છે."
બે અલગ પરંપરાઓથી થયા લગ્ન
ઉલ્લેખનીય છે કે, ૨૬ ફેબ્રુઆરીએ રાજસ્થાનના ઉદયપુરમાં સ્થિત 'ITC મમેન્ટોસ રિસોર્ટ'માં આ જોડીએ સાત ફેરા લીધા હતા. લગ્ન બે વિધિથી સંપન્ન થયા હતા. સવારે તેલુગુ રીતિ-રિવાજો મુજબ વિધિઓ થઈ હતી, જ્યારે સાંજે રશ્મિકાની 'કોડવા' પરંપરા મુજબ લગ્ન થયા હતા. લગ્ન દરમિયાન રશ્મિકા લાલ સાડી અને વિજય આઇવરી ધોતી-લાલ અંગવસ્ત્રમમાં અત્યંત મનમોહક લાગી રહ્યા હતા.
