બોલિવુડના યુવા એક્ટર વરુણ ધવન આજે એકવાર ફરી હેડલાઈન્સમાં છે, પરંતુ આ વખતે તેમની ફિલ્મ ‘બોર્ડર 2’ને લઈને સોશિયલ મીડિયા પર ચાલી રહેલા ટ્રોલિંગ અને મીમ્સને કારણે. ફિલ્મના ટીઝર અને ગીત ‘ઘર કબ આઓગે’ રિલીઝ થતાં જ વરુણની એક્ટિંગ, સ્માઈલ અને રિએક્શનને લઈને ઘણા મીમ્સ અને ટ્રોલ્સ વાયરલ થયા હતા. પરંતુ વરુણ ધવને આ બધાને લઈને બિલકુલ ફિકર કરતા નથી. તેઓ માને છે કે તેમનું કામ અને ફિલ્મ જ બોલશે. મંગળવારે ‘બોર્ડર 2’ના ઇવેન્ટ ‘બ્રેવ્સ ઓફ ધ સોઇલ ટ્રિબ્યુટ ટ્રેલર લોન્ચ’ દરમિયાન વરુણે ટ્રોલ્સને સીધો જવાબ આપ્યો છે.
ટ્રોલ્સને લઈને વરુણનો બોલ્ડ જવાબ: “મારું કામ જ બોલશે”
ઇવેન્ટમાં જ્યારે વરુણને ટીઝર રિલીઝ થયા પછી થયેલા ટ્રોલિંગ અને હવે તે ધીમે ધીમે ઓછું થઈ રહ્યું છે તે અંગે પૂછવામાં આવ્યું, ત્યારે તેમણે કહ્યું, “હું માનું છું કે ઘોંઘાટ બંધ કરીને પોતાના કામને બોલવા દેવું જોઈએ. આ બધું ચાલતું રહે છે, આનાથી કોઈ ફરક પડતો નથી. હું આના માટે કામ કરતો નથી. હું જે વસ્તુ માટે કામ કરું છું, તેની ખબર શુક્રવારે પડશે.” વરુણે આગળ કહ્યું, “મને ફિલ્મ પર ભરોસો છે. એક સારી ફિલ્મ બનાવવી ખૂબ જ જરૂરી છે. નંબર વગેરેથી મને કોઈ લેવાદેવા નથી. મને લાગે છે કે અમે એક સારી ફિલ્મ બનાવી છે. જ્યારે લોકો થિયેટરમાં જાય છે, ત્યારે બધું ભૂલીને માત્ર મનોરંજન કરવા માંગે છે. હું એ વિચારધારામાંથી આવું છું, જ્યાં માણસનું કામ બોલે છે.”
સુનીલ શેટ્ટીએ વરુણને આપ્યો પૂરો સપોર્ટ
‘બોર્ડર’ ફિલ્મના આઈકોનિક એક્ટર સુનીલ શેટ્ટીએ વરુણને સપોર્ટ કર્યો હતો. તેમણે કહ્યું હતું કે અત્યાર સુધી કોઈએ આખી ફિલ્મ જોઈ નથી, ફક્ત કેટલીક ઝલક જોઈ છે. વરુણ ફિલ્મમાં ખૂબ સારું કામ કરશે અને તે એક એવા ઓફિસરનો રોલ કરી રહ્યો છે, જેણે દેશ માટે પોતાનો જીવ આપ્યો છે.
ફિલ્મ માટે વરુણની અદ્ભુત તૈયારી
વરુણે ઇવેન્ટમાં ફિલ્મના શૂટિંગના અનુભવો શેર કર્યા. તેમણે જણાવ્યું કે આ પ્રોજેક્ટ માત્ર એક ફિલ્મ નથી, પરંતુ એક પ્રતિબદ્ધતા છે જેમાં જબરદસ્ત ફિટનેસ અને મેન્ટલ સ્ટ્રેન્થની જરૂર પડી. શૂટિંગ ખૂબ જ મુશ્કેલ રહ્યું છે, કેટલીક વખત કઠોર હવામાન અને મુશ્કેલ વિસ્તારોમાં કામ કરવું પડ્યું. કલાકારોને સૈનિકોની જેમ વર્તન કરવું પડ્યું અને સામાન્ય જિમ વર્કઆઉટથી આગળની તાલીમ લેવી પડી. વરુણે કહ્યું કે આ મુશ્કેલ પરિસ્થિતિઓએ તેમના અભિનયને વધુ વાસ્તવિક અને ઊંડો બનાવ્યો છે.
અહાન શેટ્ટીએ ઇન્સ્ટાગ્રામ ટ્રેન્ડને લઈને કરી મજેદાર પ્રતિક્રિયા
ઇવેન્ટમાં અહાન શેટ્ટીને ઇન્સ્ટાગ્રામ પર ચાલી રહેલા ટ્રેન્ડ વિશે પૂછવામાં આવ્યું, જેમાં કહેવાય છે કે જો અહાન અને સુનીલ શેટ્ટી પોતાની પોસ્ટ પર કમેન્ટ કરશે તો લોકો ‘બોર્ડર 2’ જોવા જશે. અહાને હસતાં હસતાં કહ્યું કે આ જનતાનો પ્રેમ અને સપોર્ટ છે. આ ટ્રેન્ડ ખૂબ ક્રેઝી થઈ રહ્યો છે અને અમે બધા તેને એન્જોય કરી રહ્યા છીએ. તેમણે કહ્યું કે આ એક રીત છે જેનાથી અમે ચાહકોને કંઈક પાછું આપી શકીએ છીએ. પપ્પા પોતાના દીકરાને સપોર્ટ કરવા માટે કમેન્ટ કરી રહ્યા છે અને તેમનો ખૂબ આભાર છે.
કારગિલ વીર નાયક દીપચંદે ફિલ્મના કર્યા વખાણ
ઇવેન્ટમાં કારગિલ યુદ્ધના વીર સૈનિક નાયક દીપચંદે ફિલ્મની પ્રશંસા કરી. તેમણે કહ્યું કે કલાકારો પોતાના પાત્રોમાં સંપૂર્ણપણે ડૂબેલા જોવા મળે છે. ટ્રેલર જોઈને તેમને કારગિલ યુદ્ધના દિવસોની યાદો તાજી થઈ ગઈ. તેમણે કહ્યું કે, આ ફિલ્મ ચોક્કસ જોવી જોઈએ, કારણ કે તે દેશના વીર જવાનોના બલિદાનને સાચી રીતે દર્શાવે છે.
