ટ્રમ્પ માટે અગ્નિપરીક્ષા : ઘટતી લોકપ્રીયતા વચ્ચે ન્યૂ યોર્ક અને વર્જિનિયામાં ચૂંટણી

યુએસ રાષ્ટ્રપતિ ડોનાલ્ડ ટ્રમ્પને સત્તા પર પાછા ફર્યા એક વર્ષ પૂરા થવા આવ્યા છે, પરંતુ તેમના માટે આ સપ્તાહનું રાજકીય પરિસ્થિતિ સૌથી મોટી પરીક્ષા સાબિત થવાની છે. કારણ કે ન્યૂ યોર્ક સિટી મેયર ચૂંટણી સાથે સાથે વર્જિનિયા અને ન્યુ જર્સીમાં ગવર્નર અને વિધાનસભા માટેના મતદાન યોજાશે.

આ ત્રણેય ચૂંટણીને રાષ્ટ્રીય રાજકારણની દિશા નક્કી કરનારી માનવામાં આવી રહી છે. વોશિંગ્ટનથી લઈને વર્જિનિયા અને ન્યૂ યોર્ક સુધી તમામની નજર આ પર છે. રિપબ્લિકનોએ તેને “ટ્રમ્પની લોકપ્રિયતાનો પરિમાણ” ગણાવ્યો છે, જ્યારે ડેમોક્રેટ્સ તેને “જનમતનો નાનો સર્વે” કહી રહ્યા છે.

ટ્રમ્પનું મંજૂરી પ્રમાણ ઘટ્યું 18% સુધી

ચૂંટણી પહેલાં જારી તાજા સર્વે મુજબ ટ્રમ્પનું નેટ અપ્રૂવલ રેટિંગ હવે માત્ર 18% રહ્યું છે. તુલનામાં, પૂર્વ રાષ્ટ્રપતિ બરાક ઓબામાના પહેલા વર્ષના અંતે આ આંકડો 3% અને જો બાઇડનના સમયમાં 7% હતો. આ આંકડા દર્શાવે છે કે ટ્રમ્પ સામે લોકોનો વિશ્વાસ હજુ પણ ડગમગી રહ્યો છે.

ન્યૂ યોર્ક મેયર રેસમાં ભારતીય-અમેરિકન ઝોહરાન મમદાનીનો દબદબો

33 વર્ષીય ભારતીય મૂળના રાજકારણી ઝોહરાન મમદાની ન્યૂ યોર્ક મેયર પદ માટેની રેસમાં સૌથી આગળ છે. સર્વે મુજબ તેઓ પોતાના મુખ્ય પ્રતિસ્પર્ધી એન્ડ્રુ કુઓમો કરતા 14 પોઈન્ટથી આગળ છે.
મમદાની હાલમાં ન્યૂ યોર્ક સ્ટેટ એસેમ્બલીના સભ્ય છે અને જાણીતા લેખક મહમૂદ મમદાની તથા ફિલ્મ નિર્માત્રી મીરા નાયરના પુત્ર છે.

તેમણે ચૂંટણી અભિયાન દરમિયાન શહેરમાં વધી રહેલા ખર્ચ, ગરીબ વર્ગ માટેની નીતિઓ અને અમીર વર્ગ પર કર લાદીને સામાજિક સમાનતાનું વચન આપ્યું છે. યુવાનો, આફ્રિકન-અમેરિકન અને લેટિનો મતદારોમાં તેમને મજબૂત ટેકો મળી રહ્યો છે.

ટ્રમ્પનો કુઓમોને અનોખો ટેકો

વિચિત્ર રીતે, રાષ્ટ્રપતિ ટ્રમ્પે પોતાના પક્ષના ઉમેદવારને બદલે એન્ડ્રુ કુઓમોને ટેકો આપ્યો છે. કુઓમો ચાર વર્ષ પહેલાં જાતીય સતામણીના આરોપો વચ્ચે ગવર્નર પદેથી રાજીનામું આપ્યા બાદ હવે સ્વતંત્ર ઉમેદવાર તરીકે મેદાનમાં છે. તેમને રિપબ્લિકન તથા મધ્યપંથી મતદારોનો ટેકો મળી રહ્યો છે.

ટ્રમ્પે કુઓમોને “અનુભવી અને વ્યૂહાત્મક નેતા” ગણાવીને જાહેર સમર્થન આપ્યું છે, કારણ કે તેમનો ઉદ્દેશ મમદાનીના ઉદ્ભવને રોકવાનો છે. જો કે, ન્યૂ યોર્કમાં ડેમોક્રેટિક ગઢ હજુ પણ મજબૂત છે.

રાજકીય રીતે નિર્ણાયક અઠવાડિયું

આ ચૂંટણીનાં પરિણામો માત્ર ન્યૂ યોર્ક અથવા વર્જિનિયા પૂરતા નહીં રહે, પરંતુ તે નક્કી કરશે કે ટ્રમ્પનો બીજો કાર્યકાળ જાહેર અપેક્ષાઓને કેટલો પૂરો ઉતરે છે. રાજકીય વિશ્લેષકો માને છે કે જો રિપબ્લિકનોએ અપેક્ષા મુજબ પ્રદર્શન ન કર્યું, તો 2026ની મધ્યાવધી ચૂંટણીઓમાં તેનું પ્રતિબિંબ ચોક્કસપણે જોવા મળશે.