Halol Vadodara highway accident: વડોદરા જિલ્લાના વાઘોડિયા તાલુકાના જરોદ ગામ નજીક એક હૃદયદ્રાવક માર્ગ અકસ્માત સર્જાયો હતો. હાલોલ–વડોદરા મુખ્ય માર્ગ પર આવેલી રિલીઝ હોટલ પાસે આ ગંભીર અકસ્માત બન્યો હતો. રોડ ક્રોસ કરી રહેલા એક મોટર સાયકલ સવારને પુરપાટ ઝડપે આવતી ઇકો કારએ જોરદાર ટક્કર મારી હતી. આ અકસ્માતમાં મોટર સાયકલ ચાલક નાયક હરસિંગભાઈ તેમજ તેમની સાથે રહેલી 9 વર્ષીય બાળકી નાયકા રક્ષાનું ઘટનાસ્થળે જ કરુણ મોત નીપજ્યું હતું. ઘટનાની જાણ થતાં સમગ્ર વિસ્તારમાં શોકનો માહોલ છવાઈ ગયો હતો.
કેવી રીતે બન્યો અકસ્માત
પ્રાપ્ત માહિતી અનુસાર, નાયક હરસિંગભાઈ તેમની મોટર સાયકલ પર માર્ગ પાર કરી રહ્યા હતા. તે દરમિયાન હાલોલ તરફથી આવતી એક ઇકો કાર અચાનક પુરપાટ ઝડપે આવી અને મોટર સાયકલને અડફેટે લીધી હતી. ટક્કર એટલી ભયાનક હતી કે મોટર સાયકલ રોડ પર ઘણી દૂર ફંગોળાઈ ગઈ હતી. અકસ્માતમાં હરસિંગભાઈને ગંભીર ઈજાઓ પહોંચતાં તેમનું ઘટનાસ્થળે જ મોત થયું હતું, જ્યારે તેમની સાથે રહેલી નાની બાળકીનું પણ જીવલેણ ઈજાઓના કારણે ત્યાં જ મોત થયું હતું.
અકસ્માત બાદ અફરાતફરીનો માહોલ
અકસ્માત બાદ ઘટનાસ્થળે અફરાતફરી મચી ગઈ હતી. માર્ગ પર લોહીના દ્રશ્યો જોઈને રાહદારીઓ અને વાહનચાલકો થંભી ગયા હતા. સ્થાનિક લોકો મોટી સંખ્યામાં ઘટના સ્થળે એકત્ર થયા હતા અને ઘાયલોને મદદ કરવાનો પ્રયાસ કર્યો હતો, પરંતુ બંનેના મોત થતાં કોઈ મદદ શક્ય રહી નહોતી. થોડા સમય માટે માર્ગ પર વાહનોની લાંબી કતારો લાગી ગઈ હતી. ઘટનાની જાણ થતાં જરોદ પોલીસ તાત્કાલિક ઘટના સ્થળે પહોંચી હતી. પોલીસે મૃતદેહોને કબજામાં લઈ પોસ્ટમોર્ટમ માટે મોકલવાની કાર્યવાહી હાથ ધરી હતી.
પરીજનોમાં શોકનું મોજું ફરી વળ્યું
અકસ્માતના પગલે હાલોલ–વડોદરા મુખ્ય માર્ગ પર થોડા સમય માટે ટ્રાફિક જામની સ્થિતિ સર્જાઈ હતી, જેને પોલીસે પોતાની મહેનતથી નિયંત્રણમાં લીધી હતી. આ દુર્ઘટનામાં એક નાની વયની બાળકીના અકાળ અવસાનથી સમગ્ર વિસ્તાર શોકમાં ગરકાવ થઈ ગયો છે. મૃતકોના પરિવારમાં શોકની લાગણી વ્યાપી ગઈ છે અને ગામમાં શાંતિપૂર્ણ માહોલ સાથે શોક વ્યક્ત કરવામાં આવી રહ્યો છે.
