પશ્ચિમ એશિયા (મિડલ ઈસ્ટ) માં અત્યારે સ્થિતિ અત્યંત સ્ફોટક બની ગઈ છે. અમેરિકાના રાષ્ટ્રપતિ ડોનાલ્ડ ટ્રમ્પે ઈરાન સામે લાલ આંખ કરતા સૈન્ય કાર્યવાહીના સ્પષ્ટ સંકેતો આપ્યા છે, જેના કારણે વિશ્વભરમાં ચિંતાનું મોજું ફરી વળ્યું છે. ‘ધ વોલ સ્ટ્રીટ જર્નલ’ના અહેવાલ મુજબ, ટ્રમ્પ વહીવટીતંત્ર ઈરાન વિરુદ્ધ ‘નિર્ણાયક’ સૈન્ય વિકલ્પ પર વિચાર કરી રહ્યું છે, જેમાં ઈરાની શાસનને સત્તા પરથી હટાવવાની યોજનાનો પણ સમાવેશ થાય છે. આ તણાવ વચ્ચે અમેરિકાનું મહાકાય યુદ્ધ જહાજ USS અબ્રાહમ લિંકન અરબ સાગરમાં ઈરાનની સ્ટ્રાઈક રેન્જમાં પહોંચી ગયું છે. બીજી તરફ, ઈરાને પણ વળતો પ્રહાર કરતા કહ્યું છે કે તેમની આંગળી ટ્રિગર પર છે અને અમેરિકી સૈન્ય અડ્ડાઓ તેમના નિશાના પર છે.
USS અબ્રાહમ લિંકન: ઈરાનના દરવાજે અમેરિકાનો ‘મોતનો સોદાગર’
અમેરિકી એરક્રાફ્ટ કેરિયર USS અબ્રાહમ લિંકન મલક્કા સ્ટ્રેટ પાર કરીને હિંદ મહાસાગર મારફતે મિડલ ઈસ્ટના ઝોનમાં દાખલ થઈ ગયું છે. આ જહાજની સાથે ન્યૂક્લિયર સબમરીન અને અનેક ડિસ્ટ્રોયર જહાજોનો કાફલો છે.
હુમલાની ક્ષમતા: આ કેરિયર પર 48 થી 60 F/A-18 ફાઈટર જેટ તૈનાત છે, જે ઈંધણ ભર્યા વિના 2300 કિલોમીટર સુધી સચોટ હુમલો કરી શકે છે.
ગુપ્ત મિશન: અહેવાલો મુજબ, આ જહાજે પોતાની ઓળખ છુપાવવા માટે ઓટોમેટિક આઈડેન્ટિફિકેશન સિસ્ટમ (AIS) બંધ કરી દીધી છે, જે કોઈપણ મોટા સૈન્ય ઓપરેશનનો સંકેત હોઈ શકે છે.
જોર્ડનમાં ફાઈટર જેટ્સ અને પેટ્રિયટ મિસાઈલ તૈનાત
માત્ર દરિયાઈ માર્ગે જ નહીં, પણ આકાશી માર્ગે પણ અમેરિકાએ ઘેરાબંધી મજબૂત કરી છે. યુએસ એરફોર્સે જોર્ડનમાં ઓછામાં ઓછા 12 F-15 ફાઈટર જેટ તૈનાત કર્યા છે. આ સાથે જ જોર્ડનના એરબેઝ પર પેટ્રિયટ-3 મિસાઈલ ડિફેન્સ સિસ્ટમ પણ ઉતારવામાં આવી છે. આ સિસ્ટમનો મુખ્ય હેતુ ઈરાની મિસાઈલોથી ઈઝરાયેલનું રક્ષણ કરવાનો છે. હિંદ મહાસાગરમાં આવેલા અમેરિકી અડ્ડા 'ડિયેગો ગાર્સિયા' પર પણ સતત સૈન્ય કાર્ગો વિમાનોની અવરજવર વધી ગઈ છે.
ઈરાનનો લલકાર: "અમારી આંગળી ટ્રિગર પર છે"
અમેરિકાની આ ગતિવિધિઓ સામે ઈરાને પણ યુદ્ધની તૈયારીઓ તેજ કરી દીધી છે. ઈરાની સુપ્રીમ કાઉન્સિલના જાવેદ અકબરીએ ધમકી આપી છે કે મિડલ ઈસ્ટમાં હાજર તમામ અમેરિકી સૈન્ય ઠેકાણાઓ ઈરાની મિસાઈલોની પહોંચમાં છે. ઈસ્લામિક રિવોલ્યુશનરી ગાર્ડ્સ (IRGC) ના કમાન્ડર મોહમ્મદ પાકપુરે સ્પષ્ટ શબ્દોમાં કહ્યું છે કે, "અમારી સેના પહેલા કરતા વધુ તૈયાર છે અને આંગળી ટ્રિગર પર જ છે, આદેશ મળતાની સાથે જ પલટવાર કરવામાં આવશે."
ઈઝરાયેલની 'સાત ગણી તાકાત' વાળી ચેતવણી
આ વિવાદમાં ઈઝરાયેલ પણ સક્રિય ભૂમિકામાં છે. ઈઝરાયેલના મંત્રી નીર બરકાતે દાવો કર્યો છે કે અગાઉની કાર્યવાહીમાં ઈરાનની સૈન્ય નબળાઈઓ ખુલ્લી પડી ગઈ છે. તેમણે ચેતવણી આપી છે કે જો ઈરાન ઈઝરાયેલ વિરુદ્ધ કોઈ પણ ઉશ્કેરણી કરશે તો તેને "સાત ગણી વધુ તાકાત" થી જવાબ આપવામાં આવશે.
ઈરાન અંદરથી સળગ્યું: 5000 થી વધુના મોત
એકતરફ બાહ્ય યુદ્ધનો ખતરો છે, તો બીજી તરફ ઈરાન આંતરિક વિદ્રોહનો સામનો કરી રહ્યું છે. 28 ડિસેમ્બરથી શરૂ થયેલા મોંઘવારી વિરોધી પ્રદર્શનોમાં અત્યાર સુધીમાં 5000 થી વધુ લોકોના મોત થયા હોવાની પુષ્ટિ થઈ છે. ડોનાલ્ડ ટ્રમ્પે પણ આ પ્રદર્શનકારીઓને સમર્થન આપતા ઈરાનમાં 'સત્તા પરિવર્તન' (Regime Change) ની ખુલ્લેઆમ હિમાયત કરી છે, જેને લઈને આયાતુલ્લા ખામેનીએ ટ્રમ્પ પર હિંસા ભડકાવવાનો આરોપ લગાવ્યો છે.
