US Iran War Update: અમેરિકા-ઇઝરાયેલ અને ઈરાન વચ્ચે યુદ્ધ શરૂ થયાને એક મહિનો વીતી ગયો છે, પરંતુ હજુ સુધી યુદ્ધ અટકવાના કોઈ સંકેત દેખાઈ રહ્યા નથી. આ દરમિયાન ઘણી વખત સીઝફાયર (યુદ્ધવિરામ) અંગેના સમાચાર પણ આવ્યા હતા, પરંતુ અત્યાર સુધી આ અંગે કોઈ નક્કર વાતચીત થઈ નથી. તાજેતરમાં ડોનાલ્ડ ટ્રમ્પે દાવો કર્યો હતો કે સીઝફાયર અંગે ઈરાન સાથે વાતચીત ચાલી રહી છે, સાથે જ તેમણે કહ્યું હતું કે આ દરમિયાન પાંચ દિવસ સુધી ઈરાનના એનર્જી ઇન્ફ્રાસ્ટ્રક્ચર પર કોઈ હુમલો કરવામાં આવશે નહીં. જોકે, તે સમયે ઈરાને આવી કોઈપણ વાતચીતનો ઇનકાર કર્યો હતો.
હવે સોમવારે અમેરિકાના રાષ્ટ્રપતિ ડોનાલ્ડ ટ્રમ્પે ઈરાનને ફરી એકવાર ચેતવણી આપી છે કે હોર્મુઝ સ્ટ્રેટ (Hormuz Strait) ખોલો, નહીં તો તેલના કુવા અને ખાર્ગ આઇલેન્ડને ઉડાવી દઈશું. સાથે જ તેમણે એમ પણ કહ્યું કે ઈરાન સાથે સીઝફાયરને લઈને અર્થપૂર્ણ વાતચીત થઈ છે. ટ્રમ્પે જણાવ્યું કે જો ડીલ નહીં થાય અથવા હોર્મુઝ નહીં ખુલે તો ઈરાનમાં તબાહી મચાવી દઈશું.
ટ્રમ્પે સોશિયલ મીડિયા પર શું લખ્યું?
ટ્રમ્પે સોશિયલ મીડિયા પ્લેટફોર્મ 'ટ્રુથ' પર લખ્યું છે કે ઈરાનના નવા શાસન સાથે લશ્કરી કાર્યવાહી રોકવા માટે અમેરિકાની વાતચીત ચાલી રહી છે. વાતચીતમાં ઘણી પ્રગતિ થઈ છે. પરંતુ જો કોઈ કારણોસર જલ્દી કોઈ ડીલ નહીં થાય (જે કદાચ થઈ જશે), અને જો હોર્મુઝ સ્ટ્રેટ વેપાર માટે તરત જ નહીં ખુલે, તો અમે ઈરાનમાં તેમના તમામ પાવર પ્લાન્ટ્સ, તેલના કુવાઓ અને ખાર્ગ આઇલેન્ડને ઉડાવી દઈશું અને તેને સંપૂર્ણપણે નષ્ટ કરી દઈશું. આ જ અમારો બદલો હશે."
અમેરિકા 10,000 સૈનિકો મોકલવાની તૈયારીમાં
આ દરમિયાન એવા અહેવાલો પણ આવી રહ્યા છે કે અમેરિકા મિડલ ઈસ્ટમાં 10,000 સૈનિકો મોકલવા પર વિચાર કરી રહ્યું છે. જેમાં લગભગ 5,000 યુએસ મરીન અને 82મી એરબોર્ન ડિવિઝનના હજારો પેરાટ્રૂપર્સ સામેલ છે. બીજી તરફ, રવિવારે એક અહેવાલ આવ્યો હતો જે મુજબ, USS ત્રિપોલી પર સવાર થઈને 3,500 યુએસ મરીન અને સૈનિકોની એક ટુકડી મિડલ ઈસ્ટ પહોંચી પણ ગઈ છે. અહેવાલોનું માનીએ તો, અમેરિકા હવે ઈરાનમાં ગ્રાઉન્ડ ઓપરેશન કરવાની તૈયારી કરી રહ્યું છે.
નોંધનીય છે કે, 28 ફેબ્રુઆરીએ અમેરિકા અને ઇઝરાયેલે મળીને ઈરાન પર હુમલા શરૂ કર્યા હતા. આ હુમલાઓમાં ઈરાનના સુપ્રીમ લીડર અયાતુલ્લા અલી ખામેનેઈનું મોત થયું હતું. ત્યારથી ઈરાન પર સતત હુમલા ચાલુ છે. ઈરાનના અનેક નેતાઓ અને અધિકારીઓ આ હુમલામાં માર્યા ગયા છે. ઈરાન પણ વળતો પ્રહાર કરતા ઇઝરાયેલ પર સતત મિસાઇલો દાગી રહ્યું છે અને મિડલ ઈસ્ટના અન્ય દેશોમાં સ્થિત અમેરિકી સૈન્ય મથકોને પણ નિશાન બનાવી રહ્યું છે.
