તહવ્વુર રાણાની 4 કલાક પૂછપરછ : મુંબઈ આતંકી હુમલાનો માસ્ટરમાઈન્ડે ન આપ્યા સરખાં જવાબ, બનાવ્યા આવા બહાના

26/11ના મુંબઈ આતંકી હુમલાનો માસ્ટરમાઇન્ડ તહવ્વુર રાણા હાલમાં NIAની કસ્ટડીમાં છે. સૂત્રોના જણાવ્યા અનુસાર શુક્રવારે (11 એપ્રિલ 2025) ના રોજ તેની 4 કલાક પૂછપરછ કરવામાં આવી હતી પરંતુ તેણે તપાસમાં સહકાર આપ્યો ન હતો. તહવ્વુરની પૂછપરછ સવારે 11.15 વાગ્યે શરૂ થઈ હતી. લગભગ 11.10 વાગ્યે તેને તેના સેલમાંથી બહાર કાઢીને પૂછપરછ રૂમમાં લઈ જવામાં આવ્યો હતો.

આરોપી બીમારીનું બહાનું બનાવતો રહ્યો
અગાઉ સવારે 10.30 થી 11 વાગ્યાની વચ્ચે NIA અધિકારીઓની બેઠક યોજાઈ હતી જેમાં તહવ્વુર રાણાની પૂછપરછ માટે એક માળખું તૈયાર કરવામાં આવ્યું હતું. સૂત્રોના જણાવ્યા અનુસાર તહવ્વુર પૂછપરછ દરમિયાન પોતાની બીમારીનું કારણ આપીને તપાસ ટાળવાનો પ્રયાસ કરી રહ્યો છે. અમેરિકાથી પ્રત્યાર્પણ બાદ કોર્ટે રાણાને 18 દિવસની NIA કસ્ટડીમાં મોકલી દીધો હતો. આ પછી તેને શુક્રવારે સવારે NIA હેડક્વાર્ટર લાવવામાં આવ્યો હતો.

અન્ય શહેરોમાં પણ હુમલાની યોજના બનાવી રહ્યો હતો
NIA ભારતમાં આતંકવાદી નેટવર્ક અને 26/11 હુમલાના ષડયંત્ર સાથે જોડાયેલા તમામ પાસાઓ પર તહવ્વુર રાણા પાસેથી માહિતી મેળવવા માંગે છે. તહવ્વુર રાણા પર ડેવિડ કોલમેન હેડલી લશ્કર-એ-તૈયબા (LeT) હરકત-ઉલ-જેહાદી ઇસ્લામી (HUJI) અને અન્ય પાકિસ્તાની આતંકવાદીઓ સાથે મળીને 2008ના મુંબઈ આતંકવાદી હુમલાનું કાવતરું ઘડવાનો આરોપ છે.

તપાસ એજન્સીને શંકા છે કે તહવ્વુર રાણાએ ભારતના અનેક શહેરોને નિશાન બનાવવા માટે 26/11ના મુંબઈ હુમલા જેવું આતંકવાદી કાવતરું ઘડ્યું હતું. તેના આદેશમાં કોર્ટે એનઆઈએને દર 24 કલાકે તહવ્વુર રાણાની તબીબી તપાસ કરવા અને દર બીજા દિવસે તેના વકીલને મળવા દેવાનો નિર્દેશ પણ આપ્યો હતો.

દિલ્હી કોચી અમદાવાદ સહિતના આ શહેરોની મુલાકાત લેવામાં આવી હતી
NIA મુજબ તહવ્વુર રાણાએ તેની પત્ની સામરાજ રાણા અખ્તર સાથે 13 નવેમ્બરથી 21 નવેમ્બર 2008 દરમિયાન ઉત્તર પ્રદેશના હાપુડ અને આગ્રા દિલ્હી કોચી અમદાવાદ અને મુંબઈની મુલાકાત લીધી હતી. તેમની આ મુલાકાત દેશભરમાં અન્ય સ્થળોને નિશાન બનાવવાના મોટા ષડયંત્રનો ભાગ હોઈ શકે છે.