T20 World Cup : T20 વર્લ્ડ કપ 2026 હવે તેના સૌથી રોમાંચક તબક્કે પહોંચી ગયો છે. ભારત અને શ્રીલંકાના યજમાનપદે રમાઈ રહેલી આ ટુર્નામેન્ટમાં ગ્રુપ સ્ટેજની તમામ મેચો 20 ફેબ્રુઆરીએ પૂર્ણ થયા બાદ, ગઈકાલથી 'સુપર-8' ના મુકાબલા શરૂ થઈ ચૂક્યા છે. લીગ સ્ટેજમાં અનેક ઉલટફેર જોવા મળ્યા, જેમાં ઝિમ્બાબ્વે જેવી ટીમોએ ઓસ્ટ્રેલિયા અને શ્રીલંકાને હરાવીને બધાને ચોંકાવી દીધા છે. હવે લડાઈ સેમીફાઇનલની ટિકિટ માટે છે, જ્યાં વિશ્વની શ્રેષ્ઠ 8 ટીમો સામસામે ટકરાશે.
આજની સ્પેશિયલ મેચો પર એક નજર
આજે 22 ફેબ્રુઆરીના રોજ ક્રિકેટ પ્રેમીઓને બે શાનદાર મુકાબલા જોવા મળશે. બપોરે 3:00 વાગ્યે શ્રીલંકા તેના ઘરઆંગણે ઈંગ્લેન્ડ સામે ટકરાશે, જ્યાં હેરી બ્રૂક અને દાસુન શનાકાની રણનીતિની કસોટી થશે. જોકે, સૌની નજર સાંજે 7:00 વાગ્યે અમદાવાદના નરેન્દ્ર મોદી સ્ટેડિયમમાં રમાનાર ભારત vs સાઉથ આફ્રિકાની મેચ પર છે. બંને ટીમો હજુ સુધી ટુર્નામેન્ટમાં અજેય રહી છે, તેથી આ મેચ ગ્રુપ-1 માં ટોપનું સ્થાન મેળવવા માટે નિર્ણાયક સાબિત થશે.
ભારત માટે ચિંતા અને નવા ચેમ્પિયન્સનો ઉદય
લીગ સ્ટેજમાં ભારતીય ટીમ ગ્રુપ-A માં અજેય રહીને સુપર-8 માં પ્રવેશી છે, પરંતુ ટીમ માટે ઓપનિંગ જોડી ચિંતાનો વિષય છે. ICC ના નંબર 1 બેટ્સમેન અભિષેક શર્મા લીગ સ્ટેજની 3 મેચમાં શૂન્ય (Duck) રને આઉટ થયા છે, જે ભારત માટે નબળી કડી સાબિત થઈ શકે છે. બીજી તરફ, ગ્રુપ-B માં ઝિમ્બાબ્વેએ ઓસ્ટ્રેલિયા જેવી દિગ્ગજ ટીમને હરાવીને ટેબલ ટોપર તરીકે ક્વોલિફાય કરીને સૌને આશ્ચર્યમાં મૂકી દીધા છે. ગ્રુપ-C ની વેસ્ટ ઈન્ડિઝ અને ગ્રુપ-D ની સાઉથ આફ્રિકા પણ હજુ સુધી એક પણ મેચ હાર્યા નથી.
સુપર-8 ગ્રુપનું વિભાજન
ગ્રુપ 1 (અજેય ટીમો) : ભારત, સાઉથ આફ્રિકા, વેસ્ટ ઈન્ડિઝ અને ઝિમ્બાબ્વે.
ગ્રુપ 2 : ઈંગ્લેન્ડ, ન્યુઝીલેન્ડ, પાકિસ્તાન અને શ્રીલંકા.
