T20 World Cup; શ્રીલંકા અને ઝિમ્બાબ્વે માંથી કોણ બનશે ટેબલ ટોપર? : સુપર-8 સ્ટેજની શરૂઆત પહેલા પ્રેક્ટિસ જેવી મેચોમાં કોણ મારશે બાજી?

T20 World Cup : ભારત અને શ્રીલંકાના સંયુક્ત યજમાનપદે રમાઈ રહેલા T20 વર્લ્ડ કપ 2026 નો રોમાંચ હવે ચરમસીમાએ છે. ટુર્નામેન્ટના 13 મા દિવસે, એટલે કે 19 ફેબ્રુઆરી 2026 સુધીમાં કુલ 36 મેચો પૂર્ણ થઈ ચૂકી છે. આગામી 21 ફેબ્રુઆરીથી અત્યંત મહત્વનું 'સુપર-8' સ્ટેજ શરૂ થવા જઈ રહ્યું છે, જે પહેલા આજે ત્રણ મહત્વની મેચો રમાશે. જોકે, આજના પરિણામો પહેલા જ 20 માંથી 8 ટીમો સુપર-8 માટે ક્વોલિફાઈ થઈ ચૂકી છે, તેથી આજની મેચો ક્વોલિફાઈ થયેલી ટીમો માટે પ્રેક્ટિસ સમાન રહેશે.

મેચ 1 : વેસ્ટ ઇન્ડિઝ vs ઇટલી (ઈડન ગાર્ડન્સ, કોલકાતા)ગ્રુપ C માં અત્યાર સુધી વેસ્ટ ઇન્ડિઝની ટીમે અદભૂત પ્રદર્શન કર્યું છે. શાઈ હોપની કેપ્ટન્સીમાં કેરેબિયન ટીમે 3 માંથી 3 મેચ જીતીને +1.820 ના NRR સાથે ટોચનું સ્થાન મેળવ્યું છે. બીજી તરફ, વેઈન મેડસનની ઇટલીની ટીમ 3 માંથી માત્ર 1 મેચ જીતવામાં સફળ રહી છે અને ટેબલમાં ચોથા ક્રમે છે. કોલકાતાના ઐતિહાસિક મેદાન પર વેસ્ટ ઇન્ડિઝ પોતાની જીતનો સિલસિલો જાળવી રાખીને સુપર-8 માં આત્મવિશ્વાસ સાથે પ્રવેશવા ઈચ્છશે.

મેચ 2 : શ્રીલંકા vs ઝિમ્બાબ્વે (આર. પ્રેમદાસા સ્ટેડિયમ, કોલંબો)યજમાન શ્રીલંકા ગ્રુપ B માં શાનદાર લયમાં છે. દાસુન શનાકાના નેતૃત્વમાં ટીમે 3 માંથી 3 જીત મેળવી +2.462 ના શાનદાર રન રેટ સાથે પ્રથમ સ્થાન કબજે કર્યું છે. તેમની સામે ઝિમ્બાબ્વે છે, જે સિકંદર રઝાની આગેવાનીમાં ઓસ્ટ્રેલિયા અને ઓમાન જેવી ટીમોને હરાવીને બીજા નંબરે છે. ઝિમ્બાબ્વેની છેલ્લી મેચ વરસાદને કારણે રદ થતા તેઓ સુપર-8 માટે ઓફિશિયલી ક્વોલિફાઈ થઈ ચૂક્યા છે, તેથી આ મેચ બંને ટીમો માટે ગ્રુપ ટોપર બનવાની તક છે.

મેચ 3 : અફઘાનિસ્તાન vs કેનેડા (એમ.એ. ચિદમ્બરમ સ્ટેડિયમ, ચેન્નાઈ)'ગ્રુપ ઓફ ડેથ' ગણાતા ગ્રુપ D માંથી સાઉથ આફ્રિકા અને ન્યુઝીલેન્ડ સુપર-8 માં પહોંચી ગયા છે. અફઘાનિસ્તાન માટે આ ટુર્નામેન્ટ નિરાશાજનક રહી છે, કારણ કે રાશિદ ખાનની સેના 3 માંથી માત્ર 1 મેચ જીતી શકી છે. સામે પક્ષે દિલપ્રીત બાજવાની કેનેડાની ટીમ હજુ સુધી એક પણ જીત મેળવી શકી નથી અને પોઈન્ટ ટેબલમાં સૌથી નીચે છે. ચેન્નાઈની સ્પિનરોને મદદરૂપ પિચ પર અફઘાનિસ્તાન જીત સાથે ટુર્નામેન્ટનો સુખદ અંત કરવા પ્રયાસ કરશે.

આજનું મેચ શેડ્યૂલ (19 ફેબ્રુઆરી 2026, ગુરુવાર)