T20 World Cup : T20 વર્લ્ડ કપ 2026 હવે તેના સૌથી નિર્ણાયક તબક્કે પહોંચી ગયો છે. સુપર 8 ના ગ્રુપ 1 માં અત્યારે ભારે રસાકસી જોવા મળી રહી છે. વેસ્ટ ઈન્ડીઝ અને સાઉથ આફ્રિકા પોતાની શાનદાર જીત સાથે મજબૂત સ્થિતિમાં છે, જ્યારે ટીમ ઈન્ડિયા માટે હવે રસ્તો મુશ્કેલ બન્યો છે. સાઉથ આફ્રિકા સામેની હાર બાદ ભારતનો નેટ રન રેટ (NRR) માઈનસમાં છે, જેના કારણે આજની ઝિમ્બાબ્વે સામેની મેચ ભારતીય ચાહકો અને ટીમ માટે 'વર્ચ્યુઅલ નોકઆઉટ' જેવી બની ગઈ છે. સેમીફાઈનલની રેસમાં ટકી રહેવા માટે ભારતે માત્ર જીતવું જ નહીં, પણ મોટા માર્જિનથી વિજય મેળવવો અત્યંત અનિવાર્ય છે.
પહેલો મુકાબલો : વેસ્ટ ઈન્ડીઝ vs સાઉથ આફ્રિકા (અમદાવાદ)
અમદાવાદના નરેન્દ્ર મોદી સ્ટેડિયમમાં આજે બપોરે 3 વાગ્યે ગ્રુપ 1 ની બે દિગ્ગજ ટીમો આમને-સામને ટકરાશે. શાઇ હોપની આગેવાનીમાં કેરેબિયન ટીમે ઝિમ્બાબ્વે સામે 254 રનનો પહાડ જેવો સ્કોર ખડકીને પોતાનો પાવર બતાવ્યો છે, જ્યારે એડન માર્કરામની સાઉથ આફ્રિકાની ટીમ પણ ભારતને હરાવીને આત્મવિશ્વાસથી ભરેલી છે. આ મેચમાં જે જીતશે તેની સેમીફાઈનલની રાહ વધુ સરળ બનશે, કારણ કે બંને ટીમો અત્યારે પોઈન્ટ ટેબલમાં ટોપ પર છે.
બીજો મુકાબલો : ભારત vs ઝિમ્બાબ્વે (ચેન્નાઈ)
સાંજે 7 વાગ્યે ચેન્નાઈના ઐતિહાસિક ચેપુક સ્ટેડિયમ પર સૌની નજર ટકેલી હશે, જ્યાં સૂર્યકુમાર યાદવની કેપ્ટન્સી હેઠળ ટીમ ઈન્ડિયા ઝિમ્બાબ્વે સામે મેદાનમાં ઉતરશે. પ્રથમ મેચમાં સાઉથ આફ્રિકા સામે માત્ર 111 રનમાં ઓલઆઉટ થયા બાદ ભારતનો NRR -3.800 પર પહોંચી ગયો છે. સિકંદર રઝાની ઝિમ્બાબ્વે ટીમને હરાવવા ઉપરાંત ભારતે સેમીફાઈનલની આશા જીવંત રાખવા માટે શાનદાર બેટિંગ અને શિસ્તબદ્ધ બોલિંગના જોરે રન રેટમાં મોટો સુધારો કરવો પડશે.
આજનો મેચ રિપોર્ટ અને વિગતો
મેચ 1 : વેસ્ટ ઈન્ડીઝ vs સાઉથ આફ્રિકા
સમય : બપોરે 3:00 વાગ્યે (ટોસ: 2:30)
સ્ટેડિયમ : નરેન્દ્ર મોદી સ્ટેડિયમ, અમદાવાદ
કેપ્ટન : શાઇ હોપ (WI) vs એડન માર્કરામ (SA)
મેચ 2 : ભારત vs ઝિમ્બાબ્વે
સમય : રાત્રે 7:00 વાગ્યે (ટોસ: 6:30)
સ્ટેડિયમ : એમ. એ. ચિદમ્બરમ સ્ટેડિયમ, ચેન્નાઈ
કેપ્ટન : સૂર્યકુમાર યાદવ (IND) vs સિકંદર રઝા (ZIM)
