T20 World Cup : T20 વર્લ્ડ કપ 2026 હવે તેના અંતિમ પડાવ પર છે. રવિવારે અમદાવાદના નરેન્દ્ર મોદી સ્ટેડિયમમાં ભારત અને ન્યૂઝીલેન્ડ વચ્ચે રસાકસીભરી ફાઇનલ રમાવાની છે. ફેન્સમાં ગજબનો ઉત્સાહ છે, પરંતુ 2023 ના વનડે વર્લ્ડ કપની ફાઇનલની હારની યાદો હજુ પણ તાજી છે. શું કેપ્ટન સૂર્યકુમાર યાદવની યુવા ટીમ તે હારનો બદલો લઈ શકશે? જોકે, ફાઇનલ જીતવા માટે ભારતે પોતાની ત્રણ મોટી નબળાઈઓ પર તાત્કાલિક કામ કરવું પડશે, નહીંતર ફરી એકવાર કરોડો ભારતીયોનું દિલ તૂટી શકે છે.
2023 ની હારનો હિસાબ અને સૂર્યાની કસોટી
ફ્લેશબેકમાં જઈએ તો, 2023 ના વનડે વર્લ્ડ કપમાં ભારતે સળંગ જીત મેળવી હતી, પણ ફાઇનલમાં હારનો સામનો કરવો પડ્યો હતો. ત્યારે હાર્દિક પંડ્યાની ઈજા અને સૂર્યાનું વનડેમાં નબળું ફોર્મ હારનું મોટું કારણ બન્યું હતું. આજે સૂર્યા T20 ટીમનો કેપ્ટન છે, પરંતુ મોટા મંચ પર તેનું પ્રદર્શન ચિંતાનો વિષય છે. ગ્રુપ સ્ટેજમાં USA સામે ફિફ્ટી ફટકાર્યા બાદ સૂર્યાનું બેટ શાંત છે. શું તે ફાઇનલ જેવા હાઇ-વોલ્ટેજ ડ્રામામાં કેપ્ટન ઇનિંગ રમી શકશે?
સપાટ પિચ અને બોલિંગની મુશ્કેલી
અમદાવાદની પિચ બેટ્સમેનો માટે સ્વર્ગ સમાન માનવામાં આવે છે, પરંતુ આ જ પિચ ભારતીય બોલર્સ માટે માથાનો દુખાવો બની શકે છે. ઈંગ્લેન્ડ સામેની સેમીફાઇનલમાં ભારતે 253 રન જેવો મોટો સ્કોર બનાવ્યો હોવા છતાં બોલર્સ સંઘર્ષ કરતાં દેખાયા હતા. વરુણ ચક્રવર્તી અને અક્ષર પટેલ જેવા સ્પિનર્સ મોંઘા સાબિત થયા હતા. જસપ્રીત બુમરાહ સિવાય ભારત પાસે એવો કોઈ બોલર નથી દેખાતો જે ફ્લેટ ટ્રેક પર રન રોકી શકે. હાર્દિક અને દુબેએ બોલિંગમાં વધુ જવાબદારી ઉઠાવવી પડશે.
ફિલ્ડિંગમાં ખામી : 13 કેચ છૂટ્યા!
ક્રિકેટમાં કહેવાય છે કે, 'કેચ જીતો, મેચ જીતો'. પરંતુ આ ટૂર્નામેન્ટમાં ભારતીય ફિલ્ડર્સે અત્યાર સુધીમાં 13 કેચ છોડ્યા છે, જે ચિંતાજનક છે. અમદાવાદની 'રિંગ ઓફ લાઈટ્સ'માં ઊંચા કેચ પકડવા હંમેશા મુશ્કેલ રહ્યા છે. અભિષેક શર્મા જેવા યુવા ખેલાડીઓએ ફિલ્ડિંગમાં સુધારો કરવો પડશે. ન્યૂઝીલેન્ડ જેવી ટીમ સામે એક નાની ભૂલ પણ ટ્રોફી હાથમાંથી છીનવી શકે છે.
યુવા જોશ અને અનુભવની ખોટ
રોહિત શર્મા અને વિરાટ કોહલીની નિવૃત્તિ બાદ આ એક સંપૂર્ણપણે યુવા ટીમ છે. અભિષેક શર્મા ફોર્મમાં નથી અને રિંકુ સિંહ પણ સંઘર્ષ કરી રહ્યો છે. જો શરૂઆતમાં વિકેટો પડે તો મધ્યક્રમમાં પ્રેશર સહન કરી શકે તેવા અનુભવી બેટ્સમેનની અછત વર્તાય છે. ગૌતમ ગંભીર અને સૂર્યકુમાર યાદવે સાથે મળીને એવો 'પ્લાન-બી' તૈયાર કરવો પડશે જે ન્યૂઝીલેન્ડની રણનીતિને માત આપી શકે.
